គណនី “តីកតុក” (TikTok) ក្លែងក្លាយរាប់រយត្រូវបានគេបង្កើតឡើងដោយប្រើឈ្មោះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ប៉ុន្តែនៅថ្ងៃនេះ សម្តេចនាយករដ្ឋមន្រ្តីបានស្នើឲ្យអ្នកបង្កើតទាំងនោះលុបចេញវិញជាបន្ទាន់ បើមិនដូច្នេះទេ នឹងមានវិធានការផ្លូវច្បាប់ នេះបើតាមសារសម្លេងនាព្រឹកថ្ងៃទី០៧ ខែកក្កដា ឆ្នាំ២០២៣។ តាមរយៈសារជាសំឡេងនោះ សម្ដេចតេជោ ហ៊ុន សែន បានអះអាងថា អ្នកដែលបង្កើតគណនី TikTok ទាំងនោះ មិនមានបំណងអាក្រក់ចំពោះសម្ដេចឡើយ ប៉ុន្តែការធ្វើបែបនេះ នឹងធ្វើឲ្យមានការប៉ះពាល់ ប្រសិនបើមានការធ្វេសប្រហែស ព្រោះមានការបង្កើតរហូតដល់រាប់សិបគណនី Tik Tok ក្លែងក្លាយ។ សម្ដេចបានបញ្ជាក់បែបនេះថា “ខាងលើនេះ ជាប្រភេទគណនី Tik Tok ក្លែងក្លាយ ដែលយកឈ្មោះខ្ញុំទៅប្រើ ខ្ញុំសុំស្នើឲ្យមានការលុបចោលទាំងស្រុង នូវគណនីដែលយកឈ្មោះខ្ញុំទៅប្រើនេះ ដែលវានឹងបង្កើតឲ្យការភ័ន្តច្រឡំ ដូច្នេះសូមឲ្យជំនួយការរបស់ខ្ញុំធ្វើការបន្ទាន់ ជាមួយនឹងក្រុមហ៊ុន Tik Tok ក៏ដូចជាបងប្អូន ដែលទទួលបានសារសំឡេងរបស់ខ្ញុំនេះហើយ ត្រូវលុបចោលជាបន្ទាន់ បើដូច្នេះទេយើងខ្ញុំនឹងចាត់ការតាមផ្លូវច្បាប់ ដោយមិនអាចលើកលែងបានទេ ព្រោះអាចនឹងមានការយល់ខុស នៅពេលដែលបង្ហោះសារ ឬបង្ហោះរូបភាពចេញទៅតាមរយៈគណនី ដែលប្រើឈ្មោះខ្ញុំ”។ បើតាមសម្ដេចតេជោ ហ៊ុន សែន សូម្បីតែគណនី Tik Tok ឈ្មោះ Hun Sen Fans ក៏មិនអនុញ្ញាតឲ្យមានដែរ ដោយសម្ដេចត្រូវការភាពជាក់លាក់មួយ នោះគឺគណនី Tik Tok តែមួយរបស់សម្ដេចតែម្ដង។ គួររំលឹកថា សម្តេចនាយករដ្ឋមន្ត្រី កាលពីនៅយប់ថ្ងៃទី២៩ ខែមិថុនា ឆ្នាំ២០២៣ បានប្រកាសឈប់ប្រើ និងលេង Facebook ជាស្ថាពរ និងស្នើឲ្យក្រុមហ៊ុន Facebook លុបចោលឈ្មោះសម្តេចចេញពីបញ្ជីក្រុមហ៊ុន Facebook ទៀតផង។ ការសម្រេចបែបនេះ ដោយសាររយៈពេលកន្លងមក មានការក្លែងបន្លំគណនីហ្វេកបុក (Facebook) របស់សម្តេចយ៉ាងច្រើន ដែលមានរហូតជាង ២០ ធ្វើឲ្យមានការភ័នច្រឡំពីអ្នកប្រើប្រាស់ Facebook ដូចគ្នា។ ម្យ៉ាងទៀតមួយរយៈពេលចុងក្រោយនេះ បណ្តាញទំនាក់ទំនងដែលមានប្រសិទ្ធភាពជាង គឺបណ្តាញតេឡេក្រាម (Telegram) ដែលមិនបារម្មណ៍ពីការចូលលួចដូច Facebook។ ដូច្នេះបានប្រកាសប្រើប្រព័ន្ធ Telegram និង TikTok ៕
