ដូចអ្វីដែលអ្នកប្រហែលជាបានដឹងរួចមកហើយ លោក Drake និងលោក Kendrick Lamar កំពុងតែស្ថិតនៅក្នុងសង្គ្រាមរ៉េបជាមួយគ្នាដ៏សន្ធោសន្ធៅ។ ថ្វីបើសិល្បករទាំងពីរនេះបានមានភាពរកាំរកូសជាមួយគ្នាជាយូរលង់ណាស់មកហើយ ប៉ុន្តែថ្មីៗនេះពួកគេទើបតែបានបញ្ចេញផ្កាភ្លើងថ្មីសង្គ្រាមរ៉េបម្តងទៀត ដោយទើបតែចាប់តាំងពីខែមីនាកន្លងមកនេះទេ ដោយផ្តើមឡើងពីបទ«Like That» របស់លោក Kendrick Lamar។ នៅលើបទនេះ Lamar បានសំដៅថារូបលោកកំពុងស្ថិតនៅក្នុង Big Three ជាមួយនឹង Drake ហើយនឹង J.Cole ប៉ុន្តែលោកបានរ៉េបឡើងថា«It’s just big me»។ បន្ទាប់មកនៅថ្ងៃទី១៣ ខែមេសា ក៏បានបញ្ចេញបទ«Push Ups»តបវិញថា«You ain’t in no Big Three, SZA got you wiped down…»។ Drake ក៏បានបញ្ចេញមួយបទទៀត«Taylor Made Freestyle» នៅថ្ងៃទី១៩ ខែមេសា ដោយលោកបានធ្វើសំលេង AI អាយដលរបស់ Lamar លោក Tupac និង Snoop Dogg តាមពីក្រោយលោកផងដែរ។ នៅថ្ងៃទី៣០ ខែមេសា Lamar ក៏បានតបជាមួយបទ«Euphoria» ដែលបានពីចំណងជើងរឿងដែលលោក Drake ជាអ្នកផលិតនៅលើប៉ុស្តិ៍ HBO និងបានសរសេរប៉ារ៉ូលចំរៀងឡើងថា«You not a rap artist, you a scam artist with the hopes of being accepted»។
បន្ទាប់មកលោក Lamar ក៏បានបញ្ចេញមួយបទទៀត«6:16» ដោយលើបទនេះលោកបានលួចខ្សឹបឡើងថា លោកមានអ្នកយកការណ៍សំងាត់នៅក្នុងក្រុមរបស់លោក Drake ផងដែរ និងហៅលោក Drake ថាជា Fake Bully។ នៅថ្ងៃទី០៣ ខែឧសភា Drake បានបញ្ចេញបទវិញ«Family Matters» ដោយនិយាយឡើងថាកូនរបស់ Lamar ការពិតគឺជាកូនរបស់ Manager របស់លោក, Dave Free នោះទេ។ ស្អែកឡើងមក Lamar ក៏បានដាក់មួយបទវិញ«Meet the Grahams» ដោយទំលាយថា Drake មានកូនស្រីលួចលាក់ម្នាក់ ហើយក៏សុំទោសកូនប្រុសរបស់ Drake ដែលមានឪពុកដូចជាគេ។ មិនយូរប៉ុន្មានទៀត Lamar ក៏បានបញ្ចេញនូវមួយបទទៀត«Not Like Us» ដោយចោទប្រកាន់ Drake បន្ថែមទៀតថា លោកគឺជាបុរសចូលចិត្តក្មេងស្រីមិនទាន់គ្រប់អាយុ។ នៅថ្ងៃទី០៥ ខែឧសភា Drake ក៏បានបញ្ចេញបទតវិញ«The Heart Part 6» ដែលបានពីចំណងជើងវិដេអូឯកសារ The Heart Series របស់លោក Lamar។ នៅក្នុងបទនេះផងដែរ លោកបានបកស្រាយទៅលើការចោទប្រកាន់មួយចំនួន ដោយនិយាយថាកូនស្រីលួចលាក់នោះមិនមែនជាការពិតទេ និង«You gotta learn to fact check things and be less impatient»។
