Tena Old School Come Back! ក្រោយបែកគ្នាមួយរយៈ លោកថេណាបានទម្លាក់បទថ្មីរបស់លោក «ប្រពន្ធកំសត់» ដែលនាំអារម្មណ៍ទស្សនិកជនទៅកាន់បទស៊េរីមុនៗរបស់លោក។ សិល្បៈនៃការបង្កើតបទនេះទៀតសោត ក៏គួរអោយចាប់អារម្មណ៍ផងដែរ ដោយផ្ទៃនៃ MVទាំងមូល ត្រូវបានផលិតដោយច្នៃជាតួអង្គនៃល្ខោនស្បែកតូច ក៏ដូចជាបញ្ចូលនូវល្ខោនយីកេផងដែរ។ មួយបទនេះបានធ្វើអោយមហាជនលាន់មាត់សរសើរមិនដាច់ពីមាត់ ពីការចូលរួមលើកស្ទួយមរតកសិល្បៈវប្បធម៌ខ្មែររបស់លោកថេណា។
ម្យ៉ាងវិញទៀត អត្ថន័យដ៏ចាក់ដោតនៃបទចំរៀង ក៏ធ្វើអោយអ្នកជាបុរសៗលាន់មាត់សរសើរថា អរគុណថេណា ឥលូវខ្ញុំដឹងខ្លួនខុសហើយ! ខណៈដែលលោកថេណាក៏បានចេញវិដេអូនិយាយទៅកាន់ហ្វេនរបស់លោកផងដែរថា មូលហេតុដែលលោកធ្វើបទនេះឡើង ក៏ព្រោះតែចង់ដាស់តឿនទៅដល់គូស្នេហ៍ចាស់ទុំ រឺអ្នកដែលទើបតែរៀបការទាំងអស់ ស្តាប់ទៅពេលខ្លះពួកគេអាចភ្ញាក់ខ្លួនដែរ កុំអោយភ្លើតភ្លើន ចៀសវាងការហើយថ្មីថ្មោងក៏បែកគ្នា។ ម្យ៉ាងទៀតបទនេះក៏ត្រូវបានអ្នកគាំទ្រដទៃទៀតកត់សម្គាល់ឃើញថា មួយបទនេះគឺបានលាយឡំជាមួយនឹងអត្ថរសរបស់បទពីមុនៗរបស់លោកថេណាជាច្រើន ដូចជាបទ កង់សាគួរ គូរកម្ម Love is singular ក៏ដូចជាបទពលីជាដើម។ និងមួយទៀត បទនេះលោកថេណាថែមទាំងបានប្រើតាក់តិចក្នុងការច្រៀងរលាក់ថែមទៀតផង កាន់តែប្លែក និងពិសេស។ ចុះទស្សនិកជនយល់ឃើញយ៉ាងណាដែរ?
