ទីបំផុតប្រស្នានៃបទ«ទេវរាជ» ត្រូវបានទម្លាយជាសាធារណៈហើយតាមរយៈ Teaser MV ដ៏ថ្មីស្រឡាងមួយរបស់អ្នកនាងទេពបូព្រឹក្សកាលពីយប់ថ្ងៃទី០២ ខែឧសភាកន្លងទៅនេះ។ ម្យ៉ាងវិញទៀតផងដែរ នៅលើខេបសិនមួយរបស់អ្នកនាងទេពបូព្រឹក្សក៏បានបង្ហើបទាក់ទងនឹងបទនេះអោយដឹងថា «ទេវរាជ រឺហៅថា Devaraja នេះ មានអត្ថន័យអោយដឹងថា គឺជាឆព្វណ្ណរង្សីនៃពន្លឺដួងកែវអាចចាក់ធ្លុះគ្រប់អ្វីៗ សំរាប់សរសេរជាសារលើទំព័រសាស្រ្តាដាស់តឿនជនមានឧបនិស្ស័យ»។ មួយវិញទៀតសោត អ្នកនាងក៏បានបញ្ជាក់ផងដែរថា នៅក្នុង MV នៃបទទេវរាជនេះគឺអ្នកនាងចង់រួមបញ្ចូលនូវចំនុចសំខាន់ៗពីក្នុងសម័យកាលទាំង៣នៃយុគសម័យមាសរបស់អាណាចក្រខ្មែរ។
ហើយចេតនានៃបទនេះគឺដើម្បីបំផុសគំនិតបង្កើតនូវវេទិកាសិល្បៈវប្បធម៌បុរាណ សម័យ សហសម័យ ដោយកំណត់បាននូវ បុរាណមិនយឺត សម័យមិនបរទេស ពោលមានអត្ថន័យថា គឺចលនាសាច់ស្រស់ឈាមស្រស់ ពុំមែនជាការស្រមើស្រមៃនោះឡើយ។ ចំណែកនៅលើគណនីហ្វេសប៊ុករបស់លោកជីដេវីតវិញ ក៏បានចែករំលែកអោយដឹងថា នេះគឺជាបទចម្រៀងមួយដែល Teaser ត្រូវបានចេញផ្សាយនៅក្នុងថ្ងៃតែមួយជាមួយនឹងបទ«មហានគរ» របស់លោកដែរ ដែលបានចេញផ្សាយកាលពីឆ្នាំទៅ។ យ៉ាងណាមិញផងដែរ យើងនៅមិនទាន់ដឹងនៅឡើយទេថា Full MV នឹងត្រូវបានទម្លាក់ឡើងជាផ្លូវការនៅពេលណា។ ចុះទស្សនិកជនមានចំណាប់អារម្មណ៍យ៉ាងណាដែរចំពោះ Teaser នៃបទចម្រៀងមួយនេះ?
