កាន់តែញ៉ាក់! អតីតបេក្ខជន The Rapper ម្នាក់ៗមិនបានធ្លាក់ដោយភាពអស់សង្ឃឹមនោះទេ ផ្ទុយមកវិញពួកគេបានត្រលប់មកវិញជាមួយនឹងការប្រឹងប្រែងបង្ហាញសមត្ថភាពជាថ្មីនូវអ្វីដែលពួកគេសក្តិសមនឹងទទួលបានយ៉ាងពិតប្រាកដ។ ការបើកទំព័រថ្មីជាមួយនឹងថាមពលដ៏ខ្លាំងក្លាលើសមុនច្រើនដងនេះ គួរអោយចាប់អារម្មណ៍បានថាមានដូចជា កញ្ញា Roxy ដែលបានបញ្ចេញជា Sport ពាណិជ្ជកម្មភេសជ្ជៈ Yeos លោក Changster ដែលបានបញ្ចេញបទថ្មីជាបន្តបន្ទាប់មាដូចជា បទ«កូនបី» និង«HI! 88RISING» កាលពីពេលថ្មីៗនេះ ក៏ដូចជាលោក GMENGZ ដែលទើបតែបញ្ចេញបទ«She don’t know» ជាដើម។ ហើយយើងក៏មិនអាចមើលរំលឹងអតីតបេក្ខជន២រូបផងដែរ គឺលោក The Sing និងលោក Emi ដែលទើបតែបានចាប់ដៃគ្នាស្ងាត់ៗទំលាក់បទថ្មីរបស់ខ្លួនរួមគ្នាមានចំណងជើងថា«SIPPIN»។
នៅលើផេក Universe 404 លើបណ្តាញសង្គមហ្វេសប៊ុក ដែលបាននិយាយពី Young Artist បានបង្ហាញចំណាប់អារម្មណ៍អោយដឹងថា បទ«SIPPIN» នេះ អ្នកទាំងពីរបានធ្វើរួមគ្នាយ៉ាងល្អ ដោយមានទាំង Vibes, Flow, Lyrics និងរួមទាំង Punchlines ផងដែរ។ ជាពិសេសគឺលោក The Sing ធ្វើបានយ៉ាងល្អនៅលើ Rap Melody ដែលមាន Flow យ៉ាងអេមតែម្តង ដូចជាត្រង់ចំនុចថា «CO កាន់ដែកកេះ» ជាដើម។ ចំណែកលោក Emi វិញគឺធ្វើបានល្អនៅត្រង់ Rap lyrical ដែលមាន Punchline យ៉ាងទាក់ទាញ។ យ៉ាងណាមិញផងដែរ បន្ទាប់ពីបទចម្រៀងរបស់ពួកគេទទួលបាន១សែន Views នៅលើយូធូបហើយ លោក Emi ក៏បានបង្ហាញការអរគុណដល់អ្នកគាំទ្រ ក៏ដូចជាអបអរសាទរដល់បទចម្រៀងរបស់លោកផងដែរ។ ខណៈដែលលោក The Sing ក៏បានបង្ហោះរូបភាពរបស់លោកអមនឹងឃ្លាសារអំណរអរគុណមួយថា«100K ហីចាំគប់ទៅអោយមួយបទទៀតគ្នាយើង»។ ចុះទស្សនិកជនយល់ឃើញយ៉ាងណាដែរសម្រាប់បទចម្រៀងរបស់ពួកគេ?
