លោក The Homie បានធ្វើអោយមហាជនស្គាល់រូបលោកតាមរយៈបទចំរៀងមួយចំនួនដូចជា ដូចតែគ្នា Phabo ភាសាស្នេហ៍ មិត្តអូន សិសិររដូវ ពេលរាត្រី Lost in Phnom Penh ចូលឆ្នាំចាំចូលបេះដូង ជាដើម។ លោកគឺជាដៃគូរួមការងារសិល្បៈម្នាក់ជាមួយនឹងលោកហេង ហើយថ្មីៗនេះលោកក៏បានបង្ហាញខ្លួននៅក្នុង MV ថ្មី កញ្ញា LV របស់លោកហេងផងដែរ។ ទន្ទឹមនឹងនេះផងដែរ បន្ទាប់ពីការចេញផ្សាយទៅបទចម្រៀងកញ្ញាLV លោក The Homie ក៏បានបញ្ចេញបទចម្រៀងថ្មីផ្ទាល់ខ្លួនរបស់លោកផងដែរចំណងជើងថា«Drill ស្នេហា»។ បទចម្រៀងមួយនេះត្រូវបានចេញផ្សាយទៅនៅក្នុងថ្ងៃទី១៣ ខែកញ្ញាកន្លងទៅនេះនៅលើឆាណែលយូធូបផ្លូវការរបស់ក្រុមតន្រ្តី WassGood Music។ អ្វីដែលគួរអោយចាប់អារម្មណ៍ចេញពីបទចម្រៀងមួយនេះគឺថាលោក The Homie បានដកស្រង់យកព្រឹត្តិការណ៍នៃរឿងរ៉ាវស្នេហាបែបរសជាតិពិតៗមកបញ្ចូលនៅក្នុង MV នៃបទចម្រៀងមួយនេះ ដោយមានបញ្ជាក់ថ្ងៃកាលបរិច្ឆេទច្បាស់លាស់នៅតាមឈុតឆាកកំណត់ហេតុស្នេហារបស់លោកនៅលើវីឌីអូនោះថែមទៀតផង។ ទស្សនិកជនមួយចំនួនយល់ឃើញថាការបង្ហាញនូវ MV បែបនេះគឺមានលក្ខណៈប្លែក ហើយរួមទាំងសំលេងផ្អែមស្រួយស្រែសរបស់លោកទៀតនោះកាន់តែធ្វើអោយស៊ីនឹងបរិយាកាសនៃចង្វាក់ភ្លេងបែប Drill មួយនេះ ហើយក៏មានអ្នកខ្លះរំពឹងថានឹងឃើញបទចម្រៀងចង្វាក់ Drill បែបនេះនឹងមានច្រើននៅក្នុងប្រទេសកម្ពុជានាពេលខាងមុខផងដែរ។​​​ សំរាប់អត្ថន័យនៃបទចម្រៀងមួយនេះផងដែរ លោកហាក់ច្រៀងរៀបរាប់អំពីអំពីអារម្មណ៍មនោសញ្ចេតនារបស់លោកទៅកាន់មិត្តស្រីរបស់លោក ដែលលោកសរសើរនាងថាល្អដូចអប្សរា និងស្រលាញ់នាងខ្លាំងហើយមិនចង់អោយបេះដូងរបស់លោកប្រេះស្រាំជាលើកទី២នោះទេបន្ទាប់ពីជួបរឿងស្នេហ៍ចាស់កន្លងមក។