តារារ៉េបស្រីនៅក្នុងប្រទេសកម្ពុជាកំពូលៗគួរអោយកត់សម្គាល់មានមិនច្រើននាក់នោះទេ ដោយនៅក្នុងនោះមានដូចជាកញ្ញាតន់ច័ន្ទសីម៉ា និងកញ្ញាតីជាដើម។ យ៉ាងណាមិញកញ្ញាតន់ច័ន្ទសីម៉ាទើបតែបានបញ្ចេញបទដ៏មានប្រជាប្រិយភាពរបស់នាងរួចមកហើយរួមគ្នាជាមួយនឹង Dj K-La គឺបទមីឆុងមីឆា ខណៈពេលថ្មីៗនេះកំពូលតារារ៉េបស្រីមួយរូបទៀតប្រចាំប្រទេសកម្ពុជា កញ្ញាតីក៏បានធ្វើការបញ្ចេញនូវបទចម្រៀង Hip Hop ថ្មីរបស់នាងដែលមានចំណងជើងថា "Get Your Money" កាលពីថ្ងៃទី២៥ ខែវិច្ឆិកាកន្លងទៅនេះ។ 

គួរបញ្ជាក់ផងដែរកញ្ញាតីគឺជាតារារ៉េបស្រីមួយរូបត្រូវបានមហាជនស្គាល់នាងតាមរយៈបទ "តីវ៉ៃម៉ាលុយ" ហើយសព្វថ្ងៃនេះគឺជាសិល្បករម្នាក់ប្រចាំផលិតកម្មរាមជាមួយគ្នានឹងកំពូលតារាចម្រៀងល្បីៗដទៃទៀតដូចជាលោកដួងវីរៈសិទ្ធ ក៏ដូចជាកញ្ញាមាសសុខសោភាផងដែរ។ កាលពីពេលថ្មីៗនេះតីក៏បានបកស្រាយបទចម្រៀងរួមគ្នាជាមួយតារាចម្រៀងទាំង៥​​​នាក់ទៀតក្នុងបទ "វីរភាពកីឡា" ដែលធ្វើឡើងនៅក្នុងកម្មវិធីបើកកីឡាជាតិលើកទី៣។ ចំពោះបទថ្មី "Get Your Money" របស់នាងនេះ ធ្វើអោយមហាជនពេញចិត្តជាខ្លាំង និងចាប់អារម្មណ៍ឃើញថាចង់់អោយនាងរួមសហការច្រៀងជាមួយលោកវណ្ណដានៅក្នុងពេលខាងមុខណាមួយផង។