ក្រុមហ៊ុនតាក់ស៊ីដ៏ធំបំផុតរបស់ទីក្រុងប៉ារីស G7 បានផ្អាកការប្រើប្រាស់រថយន្ត Tesla Model 3 របស់ខ្លួន បន្ទាប់ពីអ្នកបើកបរតាក់ស៊ីរបស់ខ្លួនបានជាប់ពាក់ព័ន្ធក្នុងគ្រោះថ្នាក់ដ៏ធ្ងន់ធ្ងរមួយ កាលពីចុងសប្តាហ៍។ មនុស្សម្នាក់បានស្លាប់និង ២០នាក់ ផ្សេងទៀតរងរបួស បន្ទាប់ពីអ្នកបើកបរម្នាក់បាត់បង់ ការគ្រប់គ្រងលើរថយន្ត។ ប៉ុន្តែ Tesla បានបដិសេធរាល់បញ្ហាបច្ចេកទេសជាមួយរថយន្ត ដែលមាន មុខងារបើកបរដោយខ្លួនឯង ដូចជាការបញ្ជាដោយស្វ័យប្រវត្តិ។

ព្រះរាជអាជ្ញាទីក្រុងប៉ារីស បានបើកការស៊ើបអង្កេតលើការចោទប្រកាន់ពីបទមនុស្សឃាត និងបង្ករបួសស្នាមដោយអចេតនា។
កាលពីថ្ងៃពុធ រដ្ឋមន្ត្រីដឹកជញ្ជូនរបស់ប្រទេសបារាំង លោក Jean-Baptiste Djebbari ក៏បាននិយាយផងដែរថា មិនមានការណែនាំណាមួយទេនៅដំណាក់កាលនេះ ដែលថាគ្រោះថ្នាក់នេះត្រូវបានផ្សារភ្ជាប់ទៅនឹងបញ្ហាបច្ចេកទេសរបស់រថយន្តនោះទេ។ ចំណែកឯនាយកប្រតិបត្តិរបស់ក្រុមហ៊ុន Tesla Europe បានប្រាប់រដ្ឋមន្ត្រីថា មិនមានការជូនដំណឹងសុវត្ថិភាពអំពីម៉ូដែលនេះទេនៅពេលដែលពួកគេនិយាយអំពីវា កាលពីយប់ថ្ងៃអង្គារ។

សេចក្តីរាយការណ៍បានឲ្យដឹងថា គ្រោះថ្នាក់នេះបង្កឡើងដោយអ្នកបើកបរតាក់ស៊ី ដែលនៅក្រៅម៉ោងធ្វើការបាននាំគ្រួសារទៅភោជនីយដ្ឋាន។ ប្រព័ន្ធផ្សព្វផ្សាយបារាំងក៏បាននិយាយថា រថយន្តបានបុកអ្នកថ្មើរជើងចំនួនពីរនាក់ភ្លើងសញ្ញាចរាចរណ៍មួយនិងរថយន្តដឹកអ្នកដំណើរមួយគ្រឿង។ បច្ចេកវិជ្ជាជំនួយរបស់ Tesla អនុញ្ញាតឱ្យរថយន្តរបស់ខ្លួនធ្វើការកាច់ចង្កូតបង្កើនល្បឿន និងចាប់ហ្វ្រាំងដោយស្វ័យប្រវត្តិ។ ប៉ុន្តែក្រុមហ៊ុននេះត្រូវបានគេចោទប្រកាន់ថា មានការបំភាន់ដល់អ្នកប្រើប្រាស់ ដោយសារតែបច្ចេកវិទ្យានេះមិនបានបើករថយន្តដោយស្វ័យប្រវត្តិនោះទេ ហើយអ្នកបើកបរត្រូវរក្សាការគ្រប់គ្រង និងការយកចិត្តទុកដាក់គ្រប់ពេលវេលា។

Tesla បានធ្វើទីផ្សារពីលក្ខណៈពិសេស "Autopilot" របស់ខ្លួន ហើយបានសន្យាថា "វាអាចបើកបរដោយខ្លួនឯងយ៉ាងពេញលេញ (full self-driving)" ដែលឥឡូវនេះមានសម្រាប់អ្នកប្រើប្រាស់មួយចំនួននៅក្នុងកំណែទម្រង់ដំបូងមួយ។ អ្នកប្រើប្រាស់បានបំពានប្រព័ន្ធនេះជាញឹកញាប់កាលពីមុន ជាមួយនឹងឧទាហរណ៍ជាច្រើន ចាប់ពីការប្រើប្រាស់ទូរស័ព្ទរបស់ពួកគេ ខណៈពេលដែលរថយន្តបើកបរដោយមិនមានអ្នកមើលផ្លូវរហូតដល់ការទៅអង្គុយនៅកៅអីក្រោយ ហើយមិនមានអ្នកបើកបរនៅកាន់ចង្កូត។ កាលពីដើមឆ្នាំនេះ អាជ្ញាធរអាមេរិកបានបើកការស៊ើបអង្កេតជាផ្លូវការលើប្រព័ន្ធ Autopilot បន្ទាប់ពីមានគ្រោះថ្នាក់រថយន្ត Tesla ចំនួន 11 គ្រឿង ចាប់តាំងពីឆ្នាំ 2018។

អត្ថបទដកស្រង់ពី BBC
បកប្រែនិងកែសម្រួលដោយ Mr. Blue