កាលពីពេលថ្មីៗនេះ បែកធ្លាយអ្នកលេងនៅលើបណ្តាញសង្គម Tik Tok ចែករំលែកបទថ្មីដែលមិនទាន់ពេញរបស់លោកទេពពិសិដ្ឋមួយបទទៀតក្រោមចំណងជើងថា«20 Out Now»។ គួរបញ្ជាក់ផងដែរ បទមួយនេះទៀតសោតក៏សង្ស័យបានថាជាបទចម្រៀង Main Song នៅក្នុងអាល់ប៊ុម V9.17 របស់លោកទេពពិសិដ្ឋផងដែរ។ 

ព្រោះគួររំលឹកបានថាបើត្រលប់ទៅកាលចេញផ្សាយបទចំរៀងតាំងពីដើមរបស់លោកទេពពិសិដ្ឋវិញ ចាប់អារម្មណ៍ឃើញថាលោកក៏ធ្លាប់បានរំលើក Cover ចម្រៀងដាក់ជាមួយនឹងពាក្យទាំងនេះជំនួសអោយចំណងជើងនៃអាល់ប៊ុមចម្រៀងរបស់លោក។ គួរបញ្ជាក់ផងដែរ អាល់ប៊ុម V9.17 របស់លោកបានចាប់ផ្តើមចេញផ្សាយឡើងតាំងពីពាក់កណ្តាលខែឧសភាមកម្លេ៉ះ ដែលមកទល់ពេលនេះមានរយៈពេលប្រហែលជា៣ខែហើយ។ 

យ៉ាងណាមិញ ទាក់ទងនឹងអត្ថន័យខ្លឹមសារនៃបទចម្រៀង«20 Out Now»នេះវិញ សង្កេតឃើញថាប្រហែលជាមានអត្ថន័យទាក់ទងនឹងអាយុរបស់លោកទេពពិសិដ្ឋ ដែលមិនខុសពីឈ្មោះនៃចំណងជើងអាល់ប៊ុមរបស់លោកនោះទេ ដែលទាក់ទងនឹងថ្ងៃខែកំណើតរបស់លោក។ លោកទេពពិសិដ្ឋជាមួយនឹងបទ«20 Out Now» ប្រហែលជាកំពុងរៀបរាប់អំពីវ័យរបស់លោក ដែលស្ថិតនៅក្នុងយុវភាព ទាមទារនូវឯករាជ្យទាំងចិត្ត ទាំងគំនិត និងក្តីសុបិន្តរបស់ខ្លួនឯង។

ម្យ៉ាងវិញទៀត គួរអោយចាប់អារម្មណ៍ផងដែរថា​​​ ក្រោយចេញផ្សាយបទមួយនេះភ្លាមទាំងមិនទាន់ពេញជាផ្លូវការ ក៏បានធ្វើអោយទស្សនិកជនមួយចំនួនធំមានការភ្ញាក់ផ្អើល និងពេញចិត្តរួចមកហើយទៅលើបទមួយនេះ ទាំងទៅលើ Flow ចម្រៀង បទភ្លេង ក៏ដូចជាប៉ារ៉ូលចម្រៀង មានការ Mix បញ្ចូលគ្នាត្រូវរសជាតិត្រូវអារម្មណ៍តែម្តង ដែលធ្វើអោយទាំងអស់គ្នាអន្ទះអន្ទែងរង់ចាំបទចម្រៀងពេញចេញជាផ្លូវការ។ ចុះទស្សនិកជនវិញយល់ឃើញយ៉ាងណាដែរ?