តារាទូតសុឆន្ទៈតំណាងអោយ Hanuman អ្នកនាងទេពបូព្រឹក្សសំរេចចិត្តបញ្ចេញដំណឹងល្អមួយចែករំលែកដល់សាធារណជន។ កន្លងមកអ្នកនាងទេពបូព្រឹក្សតែងតែចែករំលែកសកម្មភាពការងាររបស់អ្នកនាង និងជីវីតឯកជនខ្លះៗដល់បណ្តាអ្នកគាំទ្ររបស់នាងដើម្បីបង្ហាញភាពស្និទ្ធស្នាលមួយដែលគ្មានអ្វីជាអាថ៌កំបាំងសំរាប់ក្តីស្រលាញ់អាយដលនិងហ្វេន។ ទន្ទឹមនឹងការងារផលិត M/V ថ្មីៗ និងការសម្តែងការប្រគំតន្រ្តីមួយចំនួនបានបង្ហាញអោយឃើញថាអ្នកនាងទទួលបានការគាំទ្រលើសលប់និងជោគជ័យខ្លាំងលើជីវិតការងារសិល្បៈ មិនថាដំណើរជីវិតផ្ទាល់ខ្លួនយ៉ាងណាក៏អ្នកនាងនៅតែទទួលបានក្តីស្រលាញ់ឥតលក្ខខណ្ឌពីបណ្តាហ្វេនរបស់អ្នកនាងផងដែរ។ ជាក់ស្តែងកាលពីថ្ងៃទី២១ ខែតុលាកន្លងទៅនេះមានដំណឹងភ្ញាក់ផ្អើលមួយកើតឡើងនៅលើបណ្តាញសង្គម ដោយអ្នកនាងទេពបូព្រឹក្សបានបង្ហោះសារមួយអមជាមួយនឹងរូបភាពអ្នកនាងកំពុងពរពោះដោយមានរំលេចតួអក្សរ Goddess នៅពីក្រោយ​​គួរជាទីមោទនភាពនៅលើ Official Page របស់អ្នកនាងផ្ទាល់។

ដោយសារនោះមានអត្ថន័យថាអំណោយដែលមិនអាចកាត់ថ្លៃបានជាក្តីប្រាថ្នាកើតពីចិត្តស្រ្តីនិងមនុស្សគ្រប់រូបដែលប្រាថ្នាក្លាយជាមាតាបិតាពោរពេញដោយព្រហ្មវិហារធម៌ដែលបង្កើតជាឈ្មោះថា មាតាជាព្រះ។ អ្នកនាងក៏បានបញ្ជាក់ថាលោកជីដេវីតនឹងជិតក្លាយជាឪពុកថ្មីថ្មោងម្នាក់ហើយ ហើយអ្នកនាងក៏សូមចែករំលែកដំណឹងល្អនេះមកកាន់អ្នកស្រលាញ់គាំទ្ររបស់អ្នកនាងផងដែរ។ ជាងនេះទៅទៀតអ្នកនាងក៏មានដំណឹងពិសេសមួយទៀតមកប្រាប់ទស្សនិកជននោះគឺការជិតចេញនូវ M/V ពិសេសថ្មីដែលទាក់ទងនឹងភាពជាមាតានេះផងដែរ មានចំណងជើងថា «Goddess» រឺហៅថាម្យ៉ាងទៀតថា «មាតាជាព្រះ» ដែលនឹងចេញផ្សាយនៅក្នុងខែវិច្ឆិកាឆាប់ៗនេះ។