កាលពីយប់ថ្ងៃទី៣១ ខែតុលាកន្លងទៅនេះ លោក Tempo Tris បានបញ្ចេញបទចម្រៀងថ្មីមួយដែលមានចំណងជើងថា No more fake friend នៅលើឆាណែលយូធូប និងហ្វេសប៊ុកផេកផ្លូវការរបស់លោក។
បន្ទាប់ពីបទចម្រៀងមួយនេះត្រូវបានបញ្ចេញមកស្របពេលនៅក្នុងរង្វង់ក្តៅគគុកនៃរដូវកាលសង្គ្រាមរ៉េប ធ្វើអោយមហាជនមានការចាប់អារម្មណ៍ជាច្រើន។ ជាងនេះទៅទៀតបទថ្មីរបស់លោក Tempo Tris ក៏មានលក្ខណៈប្លែកគួរអោយចាប់អារម្មណ៍ថែមទៀត ដោយខនសេបបទចំរៀង No More Fake Friend នោះលោកបានឆ្លុះបញ្ចាំងបង្ហាញដោយប្រើក្រាហ្វិករូបសត្វក្រពើតោងជិះយន្តហោះកន្ទុំរុយ ដែលមើលទៅហាក់ដូចជាកំប្លែងគួរអោយអស់សំណើចបន្តិច និងឈឺចាប់ក្នុងបេះដូងបន្តិចសំរាប់នរណាម្នាក់ដែលធ្លាប់មានមិត្តបោកប្រាស់មិត្តភាពស្មោះត្រង់របស់ពួកគេ។ យ៉ាងណាមិញផងដែរ ការទំលាក់បទចម្រៀងមួយនេះធ្វើអោយមហាជនជាច្រើនយល់ឃើញថាលោក Tempo Tris តារារ៉េបជាន់ចាស់មួយរូបក៏មានមុខប្រឡូកនៅក្នុងសង្គ្រាម Diss Track ឆ្នាំ២០២២ នេះដែរ ដែលធ្វើអោយពួកគេកាន់តែពុះកញ្ជ្រោលចង់តាមដានទស្សនា។
ប៉ុន្តែនៅមិនទាន់មាននរណាម្នាក់ដឹងច្បាស់នោះទេថាលោក Tempo Tris កំពុងសំដៅដល់អ្នកណា រហូតដល់មានអ្នកខ្លះក៏យល់ឃើញថាលោក Tempo Tris កំពុង Diss អោយលោកវណ្ណដាផងដែរ ព្រោះនៅក្នុងបទចម្រៀងមួយលោកវណ្ណដាក៏មានថតឈុតឆាកនៅជាមួយយន្តហោះកន្ទុំរុយដែរ។ ចៀសវាងការយល់ច្រលំកាន់តែផ្ទុះផ្អើលជាងនេះ នៅវេលាយប់តែមួយលោកវណ្ណដាក៏បានឆ្លើយតបនៃប្រតិកម្មរបស់មហាជននៅលើគណនី Instagram របស់លោកថានៅក្នុងបទចម្រៀង JO 2 នេះលោក Tempo Tris មិនមែនជាមនុស្សម្នាក់ក្នុងចំណោមបុគ្គលដែលរូបលោកសំដៅដល់នោះទេ ផ្ទុយមកវិញរូបលោកគឺជាមិត្តសំឡាញ់ម្នាក់របស់លោកវណ្ណដាថែមទៀត។ បន្ទាប់ពីទម្លាយរឿងរ៉ាវមួយនេះ បណ្តាអ្នកលេងនៅលើបណ្តាញសង្គមក៏ចាប់ផ្តើមធូរទ្រូងខ្សាក ហើយរិះរកតំរុយថ្មីមួយទៀតតាមអត្ថន័យនៃបទចម្រៀងថានរណាអោយប្រាកដដែលលោក Tempo Tris កំពុង Diss អោយ។ យ៉ាងណាផងដែរមហាជនក៏ទាញសេចក្តីសន្និដ្ឋានថ្មីថាប្រហែលជាលោក Tempo Trisមានបំណងចេញបទមួយនេះដើម្បីការពារលោកវណ្ណដាហើយចំពោះប្រធានបទដ៏ក្តៅគគុកនៅជុំវិញការលះបង់នូវមិត្តភាពភាពក្លែងក្លាយ។
