កាលពីថ្ងៃទី២៧ ខែមីនាកន្លងទៅនេះ តារារ៉េប Baddie Boy លោក Tempo Tris នៃផលិតកម្ម Galaxy Navatra បានធ្វើការទំលាក់បទចម្រៀងថ្មីរបស់លោក ក្រោមចំណងជើងថា«អូន អូន» នៅលើឆាណែលយូធូបផ្លូវការរបស់ផលិតកម្មផ្ទាល់ និងនៅលើឆាណែលយូធូបផ្លូវការរបស់លោកផងដែរ។ គួរបញ្ជាក់ផងដែរថាតារាចម្រៀង និងអ្នកនិពន្ធបទចម្រៀងរូបនេះធ្លាប់បានចេញផ្សាយបទចម្រៀងជាច្រើនបទរួចមកហើយនៅក្នុងផលិតកម្មនេះដែលមានដូចជាបទ «វាលខ្នង» «រ៉ូបខ្មៅ» «ងូតទឹក» និង«Late Night» ជាដើម។ ចំណែកបទ«អូន អូន» នេះត្រូវបានចេញផ្សាយបន្ទាប់ពីបទចុងក្រោយរបស់លោកដែលមានចំណងជើងថា«No More Fake Friend»។ លោក Tempo Tris បានសរសេររៀបរាប់នៅលើបណ្តាញសង្គមហ្វេសប៊ុកទាក់ទងនឹងបទចម្រៀងមួយនេះថា«សុំពាំនាំនៅរសជាតិបែបថ្មីសម្រាប់ពុកម៉ែបងប្អូន» ដែលធ្វើអោយទស្សនិកជនជាច្រើនចាប់អារម្មណ៍ឃើញថានៅលើបទចម្រៀងថ្មីរបស់លោកនេះជាបទរ៉េបដែលមានចង្វាក់សក្តិសមនឹងបរិយាកាសបទចម្រៀងចូលឆ្នាំ។ រំលឹកទៅកាលពី៤ឆ្នាំមុន លោក Tempo Tris បានធ្វើអោយមហាជនកត់សម្គាល់បទចម្រៀងលោកជាខ្លាំងដូចជាតាមរយៈបទ «អែនអន» និងបទដ៏ល្បីរបស់លោក«Player» ដែលមានរួមគ្នាជាមួយនឹងលោកវណ្ណដា, Rawyer, Snooga និង Reezy ផងដែរ។ កាលពីចុងខែវិច្ឆិកា ឆ្នាំ២០២២កន្លងទៅនេះ លោក Tempo Tris ក៏បានធ្វើការចែករំលែករូបភាពសាជាថ្មីទាក់ទងនឹងការថតបទចម្រៀងនេះរួមគ្នាជាមួយនឹងលោកវណ្ណដានៅលើហ្វេកប៊ុកផេករបស់លោក។ តើទស្សនិកជនពេញចិត្តបទចម្រៀងថ្មីរបស់លោកកម្រិតណា? តោះខមមែនប្រាប់អេដមីនម្នាក់មួយផងណា!