បន្ទាប់ពីបញ្ចប់កម្មវិធី Triple FFFParty របស់លោកជីដេវីតរួចមកមិនបានប៉ុន្មានផងកញ្ញាទេពបូព្រឹក្សក៏បានបញ្ចេញពត៌មានក្តៅៗនៅលើបណ្តាញសង្គមរបស់នាងដែរ។ ដូចជានៅថ្ងៃទី២៨ ខែកក្កដា កន្លងទៅនេះ កញ្ញាបានផ្សព្វផ្សាយដំណឹងល្អមួយមកកាន់អ្នកគាំទ្ររបស់នាងអំពីការជិតចេញមកដល់អាល់ប៊ុមថ្មីបន្ទាប់ពីបទចំរៀងចុងក្រោយ Top of the Lady របស់នាងផ្សាយចេញទៅដោយទទួលបានការគាំទ្រយ៉ាងខ្លាំង និងទទួលបានពានរង្វាន់ជាច្រើនផងដែរពី Smart ។
ម្យ៉ាងទៀតដែរមុននឹងការចេញអាល់ប៊ុមថ្មីនេះ កញ្ញាភ្ជាប់នូវដំណឹងល្អមួយទៀតនៃការធ្វើកម្មវិធី TBP Fan Meeting នាំមកជូនដោយហនុមាននិងការប្រគុំតន្រ្តីលើកទី១របស់នាងផងដែរនៅថ្ងៃអាទិត្យ ទី១៤ ខែសីហា នៅផ្សារទំនើបអ៊ីអនសែនសុខ ស៊ីធី នៅវេលាម៉ោង៥ល្ងាច ហើយទាំងអស់គ្នាអាចធ្វើការចុះឈ្មេាះបានពីពេលនេះទៅរហូតដល់ថ្ងៃ៣១ ខែកក្កដាខាងមុខនេះ។ យ៉ាងណាមិញយើងនៅមិនទាន់ដឹងទេថាអាល់ប៊ុមថ្មីរបស់កញ្ញាមានចំណងជើងអ្វី និងផ្សាយចេញទៅនៅពេលណាប្រហែលជាដំណឹងមួយនេះនឹងមានបកស្រាយជូននៅក្នុងកម្មវិធី Fan Meeting របស់កញ្ញាទេពបូព្រឹក្សហើយ។ គួរអោយភ្ញាក់ផ្អើលផងដែរ ត្រឹមតែរយៈពេលប្រហែល១ម៉ោងកន្លះប៉ុណ្ណេាះក្នុងថ្ងៃដដែលកញ្ញាក៏បានបង្ហេាះនូវសារមួយទៀតផ្ទួនៗគ្នាអំពីការពេញអស់នៃចំនួនអ្នកចុះឈ្មេាះចូលរួមហើយ និងជំរាបអោយអ្នកចុះឈ្មេាះទាំងអស់គ្នាចាំយកសំបុត្រនៅតង់ទីពីរទៀត។ តេាះរង់ចាំមើលទាំងអស់គ្នាថានៅក្នុងកម្មវិធី TBP Fan Meeting មានកំពូលតារាល្បីៗណាខ្លះមកចូលរួម តែអេដមីនជឿជាក់ថាក្នុងនេាះច្បាស់ជាមានរូបលោកជីដេវីតខានមិនបានតែម្តង!
តើការប្រគុំតន្រ្តីរបស់កញ្ញាទេពបូព្រឹក្សមានការសម្តែងរួមគ្នាជាមួយលោកជីដេវីតដែរទេ? ហើយនៅក្នុងអាល់ប៊ុមថ្មីរបស់កញ្ញាអាចមានការរួមសហការជាមួយលោកជីដេវីតបែបណាខ្លះ ហើយបទចំរៀងលើកនេះមានខនសេបពីអ្វីខ្លះទៅ ពិតជាគួរអោយចង់ដឹងណាស់!
អត្ថបទដោយ វត្តី