នៅយប់ថ្ងៃអាទិត្យ ទី២៨ ខែសីហាកន្លងទៅនេះ សិល្បករជាច្រើនបានទទួលបានពានរង្វាន់ទៅតាមប្រភេទរបស់ខ្លួននៅក្នុងកម្មវិធីប្រគល់ពានរង្វាន់ MTV VMAs 2022 ហើយក្នុងនោះដែរក៏ឃើញថាកញ្ញា Taylor Swift តារាចំរៀងជនជាតិអាមេរិកដ៏ល្បីឈ្មោះក៏ទទួលបានពានរង្វាន់ដល់ទៅ៣ឯណោះនៅលើបទចំរៀង All too well របស់នាង ដែលមាន២រង្វាន់ជាប់ដោយការបោះឆ្នោតគាំទ្រលើផ្នែក​​​ Video of the year, Best longform video និងពានរង្វាន់ផ្អែកទៅលើការដាក់ពិន្ទុដោយមិនការបោះឆ្នោតលើផ្នែក Best Direction។បន្ទាប់ពីឆ្លងការឡើងទទួលយកពានរង្វាន់ និងបង្ហាញចំណាប់អារម្មណ៍ជាច្រើនសារ កញ្ញា Taylor Swift បានសម្តែងអារម្មណ៍ប្រាប់បណ្តាអ្នកគាំទ្ររបស់នាងថាបើសិនបើពួកគេទាំងអស់គ្នាពិតជាល្អនឹងនាងបែបនេះ នាងមានតែពាំនាំដំណឹងល្អមួយជូនសំរាប់ពួកគេ។

បន្ទាប់មកកញ្ញា Taylor Swift ក៏រៀបរាប់ប្រាប់ទាំងស្នាមញញឹមស្រស់ស្រាយថានាងនឹងមានគំរោងចេញអាល់ប៊ុមថ្មីនៅក្នុងថ្ងៃទី២១ ខែតុលាខាងមុននេះហើយ។ ក្រោយមក Taylor Swift ក៏បានបង្ហោះពត៌មានមួយចំនួនទាក់ទងនឹងអាល់ប៊ុមថ្មីរបស់នាងនៅក្នុងគណនី Instagram ជាមួយនឹងផ្ទាំងរូបភាពអាល់ប៊ុមឈ្មោះ Midnight និងបទចំរៀងទាំង១៣បទដែលត្រូវបានបែងចែកជា Side A និង Side B។ 

Taylor Swift បានបញ្ជាក់អោយដឹងថាបទចំរៀងទាំង១៣បទនេះ នាងសរសេររៀបឡើងនៅក្នុងពេលពាក់កណ្តាលយប់ នូវអ្វីៗដែលមានស្កេស្កះនៅក្នុងខួរក្បាលរបស់នាងពោរពេញដោយអារម្មណ៍ច្របូកច្របល់ទាំងភាពភ័យខ្លាចទាំងភាពកក់ក្តៅ តែទោះជាយ៉ាងម៉េចក៏ដោយក៏នាងមិនបោះបង់ក្តីសង្ឃឹមបន្តដើរទៅមុខដើម្បីជួបខ្លួនឯងម្តងទៀតនៅរាល់ពេលពាក់កណ្តាលអធ្រាត្រ។ គួរបញ្ជាក់ផងដែរ​​​អាល់ប៊ុមមួយនេះគឺជាស្ទូឌីអូអាល់ប៊ុមទី១០របស់កញ្ញា Taylor Swift ហើយដែលហៅថា TS10។