មនុស្សម្នាក់ៗតែងតែចង់បានភាពជោគជ័យក្នុងជីវិតរបស់គេ ប៉ុន្តែអ្វីដែលពួកគេចង់បានអាចជាអាវុធមុខពីរ ព្រោះភាពជោគជ័យ អាចជាថ្នាំទិព្វ សម្រាប់មនុស្សដែលបានត្រៀមខ្លួនទទួលយកវា តែវាអាចជាថ្នាំពុល សម្រាប់មនុស្សដែលមិនបានត្រៀមខ្លួន ហើយជះឥទ្ធិពលអាក្រក់ដល់ជីវិតរបស់ពួកគេទៀតផង។ នេះគឺជាដំណើរជីវិតរបស់តារាចម្រៀងប៉ុប ដែលទទួលបានភាពល្បីល្បាយតាំងពីក្មេង។
ចាសស្ទីន ប៊ីប័រ (Justin Bieber) មិនដែលមានផ្ទះសំបែងសមរម្យមួយនោះទេ។ ម្ដាយរបស់គាត់ មានអាយុត្រឹមតែ១៨ឆ្នាំប៉ុណ្ណោះ នៅពេលគាត់មាន ចាសស្ទីន (Justin)។ មួយរយៈក្រោយមក ឪពុកម្តាយរបស់គាត់ក៏បែកបាក់គ្នា ហើយឪពុករបស់គាត់ក៏ចាកចេញពីគ្រួសារ។ ដូច្នេះហើយគាត់ និងម្តាយគាត់ មានការពិបាកក្នុងការរកដំណោះស្រាយសម្រាប់ជីវភាពរបស់ពួកគេ។ ក្នុងនាមជាម្តាយតែម្នាក់ នាងត្រូវធ្វើការងារដែលមានប្រាក់ខែតិច និងការលះបង់ជាច្រើន ដើម្បីផ្គត់ផ្គង់កូនប្រុសរបស់នាង។ ពួកគេរស់នៅក្នុងផ្ទះដ៏កខ្វក់ដែលពោរពេញទៅដោយសត្វកណ្ដុរ ហើយនឹងមានទូរទឹកកកដែលតែងតែគ្មានអ្វីនៅក្នុងនោះ។ គាត់មិនមានគ្រែត្រឹមត្រូវសម្រាប់ដេកនោះទេ ដូច្នេះគាត់បានត្រឹមតែដេកលើសាឡុងប៉ុណ្ណោះ។
"ខ្ញុំធំឡើងក្រោមបន្ទាត់នៃភាពក្រីក្រ។ ខ្ញុំមិនមានអ្វីច្រើនដូចអ្នកដទៃនោះទេ"។
គាត់ក៏មិនមានមិត្តភ័ក្តិច្រើនដែរ ហើយត្រូវបានគេមើលងាយជាញឹកញាប់ទៀតផង។
"ខ្ញុំចាំថា ខ្លួនក្រហើយត្រូវក្មេងដទៃលេងសើចជាមួយទៀតផង”។
ប៉ុន្តែតាំងពីក្មេងមក គាត់តែងតែចូលចិត្តតន្ត្រី ហើយគាត់រៀនលេងស្គរ ហ្គីតា ព្យាណូ ដោយខ្លួនឯងទាំងអស់។ កាលពីក្មេង គាត់ក៏ធ្លាប់ដើរច្រៀងតាមផ្លូវដើម្បីរកលុយផងដែរ។
"ខ្ញុំនឹងលេងហ្គីតា ច្រៀង ហើយមនុស្សនឹងបោះលុយក្នុងប្រអប់ហ្គីតារបស់ខ្ញុំ"។
ម្តាយរបស់គាត់តែងតែដឹងថា កូនប្រុសរបស់គាត់មានទេពកោសល្យខាងតន្ត្រី ដូច្នេះហើយគាត់បានសម្រេចចិត្តចែករំលែកទេពកោសល្យនោះទៅកាន់ពិភពលោក។ គាត់បានចាប់ផ្ដើមថតវីដេអូ ចាសស្ទីន (Justin) នៅពេលគាត់ច្រៀងចម្រៀង និងសម្ដែង។ ហើយបន្ទាប់មក នាងនឹងបង្ហោះពួកវានៅលើ YouTube ។ មនុស្សចាប់ផ្តើមមើលវីដេអូរបស់គាត់ ហើយគាត់ទទួលបានការចូលមើលរាប់ពាន់ដង។ នៅពេលដែលចំនួនអ្នកទស្សនារបស់គាត់ចាប់ផ្តើមកើនឡើង មានភ្នាក់ងារស្វែងរកមនុស្សមានទេពកោសល្យម្នាក់ បានចុចមើលវីដេអូមួយរបស់ ចាសស្ទីន (Justin) ដោយចៃដន្យ ហើយគាត់មានការចាប់អារម្មណ៍យ៉ាងខ្លាំង ចំពោះទេពកោសល្យរបស់ក្មេងប្រុសតូចម្នាក់នេះ។
វាហាក់បីដូចជា ចាសស្ទីន ប៊ីប័រ (Justin Bieber) ជាក្មេងជំទង់ដែលមិនស្គាល់ឈ្មោះម្នាក់នៅប្រទេសកាណាដា ធ្លាប់ច្រៀងតាមដងផ្លូវដើម្បីរកលុយ បានក្លាយជាតារាប៉ុបអន្តរជាតិក្នុងរយៈពេលត្រឹមតែមួយយប់។ គាត់មានអាយុត្រឹមតែដប់បីឆ្នាំប៉ុណ្ណោះ នៅពេលគាត់មានភាពល្បីល្បាញទូទាំងពិភពលោក ហើយជីវិតរបស់គាត់បានផ្លាស់ប្តូរជារៀងរហូត។ ហើយនោះ គឺជាសម្ពាធដ៏ច្រើនលើសលប់សម្រាប់គាត់ ដែលស្ថិតនៅក្រោមការវិនិច្ឆ័យពីមនុស្សរាប់លាននាក់ ខណៈដែលគាត់ព្យាយាមដឹកនាំជីវិត និងកិត្តិនាមរបស់គាត់ក្នុងពេលជាមួយគ្នា។ ហើយអ្វីដែលគួរឲ្យសោកស្ដាយទៀតនោះ គឺគាត់បានរកឃើញវិធីមិនល្អដើម្បីទប់ទល់នឹងកិត្តិនាមរបស់គាត់។ គាត់មានជំងឺធ្លាក់ទឹកចិត្ត និងថប់អារម្មណ៍ ហើយមិនយូរប៉ុន្មានក៏ធ្លាក់ខ្លួនទៅជាការប្រើប្រាស់ថ្នាំញៀន។ គាត់ថែមទាំងបានជាប់ឃុំឃាំងមួយយប់ ហើយអ្វីៗកាន់តែតានតឹងរហូតឈានដល់ចំណុចមួយដែលគាត់មានអារម្មណ៍ថា គាត់ចង់បោះបង់នឹងជីវិតមួយនេះ។
“សន្តិសុខ និងបុគ្គលិករបស់ខ្ញុំ នឹងចូលមកក្នុងបន្ទប់របស់ខ្ញុំនៅពេលយប់ ដើម្បីពិនិត្យជីពចររបស់ខ្ញុំ”។
វាជាពេលវេលាសម្រាប់ការផ្លាស់ប្តូរ ដូច្នេះគាត់ត្រូវចំណាយពេលផ្តោតអារម្មណ៍ និងពិចារណាពីខ្លួនឯង និងសម្រាកព្យាបាល ទើបគាត់អាចក្លាយជាមនុស្សដែលគាត់តែងតែចង់បាន។
“អ្នកមិនអាចទទួលបានអ្វីដែលអ្នកចង់បានគ្រប់ពេលនោះទេ ប៉ុន្តែប្រសិនបើអ្នកមានសំណាង អ្នកនឹងទទួលបានអ្វីដែលអ្នកត្រូវការ”។
មានពេលដែលយើងធ្វើការសម្រេចចិត្តយ៉ាងសំខាន់មួយនៅក្នុងជីវិតរបស់យើង នោះគឺជាពេលដែលយើងដឹងយ៉ាងស៊ីជម្រៅថា យើងត្រូវការផ្លាស់ប្តូរជីវិតរបស់យើងយ៉ាងខ្លាំង ដើម្បីឱ្យមានសុភមង្គលពិតប្រាកដមួយ។ ពេលខ្លះ គ្រាដែលគួរឱ្យភ័យខ្លាច នឹងនាំទៅរកការផ្លាស់ប្តូរដែលអាចឱ្យអ្នកវិវត្តន៍បាន ហើយទីបំផុតការបោះបង់អ្វីដែលលែងនាំមកនូវផលល្អសម្រាប់អ្នក គឺជាជម្រើសដ៏មានតម្លៃមួយ។ ប៉ុន្តែមិនមានរូបមន្តសម្ងាត់ណាមួយ ដើម្បីអាចបំភ្លឺផ្លូវដែលអ្នកត្រូវដើរនោះទេ យើងតែងតែបង្កើតកំហុស ហើយយើងនឹងមានអារម្មណ៍ថា បំណែកមួយនៅក្នុងខ្លួនរបស់យើងបានបាត់បង់ ប៉ុន្តែយើងនឹងមិនអាចដឹងថាវាជាអ្វីនោះទេ។ មានតែការស្តាប់តាមបេះដូងរបស់យើង ទើបអាចស្វែងរកបំណែកដែលបាត់នោះ ហើយព្យាយាមផ្គុំវាដោយខ្លួនឯង ដូចដែលអ្នកអាចធ្វើឱ្យខ្លួនអ្នកសប្បាយចិត្ត, មានក្តីស្រឡាញ់, និងសម្រេចបំណងរបស់អ្នក, ប៉ុន្តែ តើចិត្តរបស់អ្នកជាកន្លែងដ៏ស្រស់ស្អាត ឬក៏ជាកន្លែងដែលអ្នកស្អប់? យើងចង់ឱ្យអ្នកយកចិត្តទុកដាក់យ៉ាងខ្លាំងចំពោះរបៀបដែលអ្នកនិយាយទៅកាន់ខ្លួនអ្នក។ តើអ្នកមានចិត្តល្អ និងពោរពេញដោយក្តីស្រឡាញ់ ឬជាមនុស្សដែលឃោរឃៅ និងពោរពេញដោយការវិនិច្ឆ័យមិនល្អ? នៅពេលអ្នកចាប់ផ្តើមយកចិត្តទុកដាក់នូវរឿងទាំងនេះ នោះអ្នកនឹងភ្ញាក់ឡើងវិញទទួលយកការពិត។
ការមើលឃើញរបស់អ្នកនឹងច្បាស់ លុះត្រាតែអ្នកក្រឡេកមើលទៅក្នុងចិត្តរបស់អ្នក អ្វីដែលអ្នកមើលនៅខាងក្រៅ គឺជាសុបិន អ្វីដែលអ្នកមើលទៅខាងក្នុង គឺជាការពិត៕
