រូបថតមួយសន្លឹករបស់លោក វណ្ណដា អមជាមួយនឹងតារាស្រីស្រស់ស្អាតម្នាក់ក្នុងឈុតពណ៌ស្វាយធ្វើអោយផ្ទុះចំណាប់អារម្មណ៍ជាមួយនៅលើប្រព័ន្ធអ៊ីធឺណែតកាលពីពេលថ្មីៗនេះ មហាជនមានការចង់ដឹងឡើងថាតើសិល្បករស្រីរូបនេះជានរណា? ហើយហេតុអ្វីក៏ចូលរំលែករូបថតរួមគ្នាជាមួយលោកវណ្ណដាតែម្នាក់ដូច្នេះខណៈដែលចូលរួមនៅក្នុងកម្មវិធី Big Mountain Music Festival មានសិល្បករដទៃទៀតជាច្រើននាក់? យ៉ាងណាមិញផងដែរលោកវណ្ណដារបស់យើងហាក់ដូចជាទទួលរាក់ទាក់គេបានយ៉ាងល្អ ដោយគេសង្កេតឃើញថាលោកបានចែករំលែកបន្តការបង្ហោះរូបភាពរបស់តារាស្រីរូបនោះមកលើទំព័រហ្វេសប៊ុករបស់លោកផងដែររួមទាំងដាក់ Emoji សំពះ និងបេះដូងហាក់ដូចជាបង្ហាញការគោរពអោនលំទោនជាមួយនឹងក្តីស្រលាញ់រាប់អានយ៉ាងកក់ក្តៅផងដែរ។ កុំអោយទន្ទឹងរង់ចាំយូរអេដមីនសុំធ្វើការណែនាំតារាស្រីរូបនេះតែម្តងចុះ! នាងគឺជាតារារ៉េបស្រីដ៏ល្បីប្រចាំប្រទេសវៀតណាមវ័យ៣២ឆ្នាំទទួលរហ័សនាមថា "Queen of Hip Hop" មានឈ្មោះពេញថា Hang Lam Trang Anh និងត្រូវបានស្គាល់ដោយឈ្មោះលើឆាកថា Suboi។ 

យ៉ាងណាមិញផងដែរ Suboi គឺជាតារាស្រីម្នាក់ដែលបានចូលទៅក្នុងទស្សនាវដ្តី Forbes នៅលើមាតិកា Asia Forbes 30 Under 30 ដែលបង្ហាញពីបុគ្គលមានឥទ្ធិពលជាច្រើននៅលើផ្នែកផ្សេងរាប់តាំងពីវិស័យជំនួញរហូតដល់វិស័យសិល្បៈកម្សាន្ត។ ក្រៅពីនេះផងដែរ បទល្បីៗរបស់ Suboi មានដូចជា Bet On Me, N-Sao?, Doi, Run, Nguoi ta hieu, Sai Gon, Noi voi em ជាដើម។ គួរបញ្ជាក់ផងដែរក្រោយពី Suboi បានបង្ហោះរូបថតនាងជាមួយវណ្ណដារួចមក នាងក៏ថែមទាំងបានបង្ហោះវិដេអូសម្តែងលើឆាកខ្លីមួយនៅក្នុងកម្មវិធីនោះទៀតផង ដែលបង្ហាញសម្តែងរបស់នាង និងលោកវណ្ណដានៅក្បែរគ្នាលើឆាកកាន់តែខ្លាំង នេះអាចសបញ្ជាក់អោយឃើញថាពួកគេបានចែករំលែកបរិយាកាសល្អជាមួយគ្នានៅក្នុងការសម្តែងមួយនេះពិតមែន ហើយ Suboi អាចពេញចិត្តការទំនាក់ទំនងនឹងលោកវណ្ណដាជាពិសេសសំរាប់បេសកម្មការងាររបស់នាងលើកនេះនៅក្នុងប្រទេសថៃ។