តើការបើកទំព័រនៃឆ្នាំ២០២៣នេះនឹងនាំយកនូវអារម្មណ៍ថ្មីអ្វីខ្លះដល់អ្នកស្តាប់តន្រ្តីទាំងអស់គ្នា? មិនថាសិល្បករក្នុងនិងក្រៅស្រុករបស់យើងសុទ្ធតែមានគំរោងរួចជាស្រេចក្នុងការបញ្ចេញអាល់ប៊ុមថ្មីរបស់ពួកគេនាពេលខាងមុខ ដែលបូកបញ្ចូលនូវការរុករករសជាតិថ្មីដែលឆ្លុះបញ្ចាំងពីសោភ័ណមនោសញ្ចេតនា និងអារម្មណ៍របស់ពួកគេ។ មិនថា Olivia Rodrigo រហូតដល់កញ្ញា Sopheak Kosoma តារាចម្រៀងកំប្លែងប្រចាំចិត្តទស្សនិកជនទាំងអស់គ្នាសុទ្ធតែបានទម្លាយនឹងជិតចេញអាល់ប៊ុមបន្ទាប់របស់ពួកគេនៅក្នុងដើមឆ្នាំ ២០២៣នេះ។ 

តួយ៉ាងធ្លាប់តែឃើញកញ្ញាកុសុម៉ាធ្វើជា MC លលេងនឹងផ្លូវចិត្តទស្សនិកជនទាំងអស់គ្នា ចុះត្រលប់មកច្រៀងចំរៀងមនោសញ្ចេតនាបែបនេះវិញនឹងធ្វើស៊ីចាក់ដោតផ្លូវចិត្តអោយទុក្ខសោកយ៉ាងណាវិញ? ក្រៅពីជោគជ័យជា Influencer ម្នាក់ ហើយក៏ជា MC ម្នាក់ដ៏អស្ចារ្យពេលនេះកញ្ញាកុសុមាបានត្រលប់មករំលឹកនៅលើចំនុចចាប់ផ្តើមនៃវិថីសិល្បៈចាស់ ជាអ្នកចម្រៀងម្នាក់ដ៏ផ្អែមក្រអួនក្រអៅ។ តាមរយៈបទចម្រៀងថ្មីដែលគ្រោងនឹងចេញផ្សាយជាផ្លូវការឆាប់ៗនេះមានចំណងជើងថា«បេះដូងមួយចំហៀង» និងត្រូវចេញនៅថ្ងៃទី០៤ ខែមករា ឆ្នាំ២០២៣ខាងមុខនេះហើយនៅលើបណ្តាញចែកចាយបទចម្រៀងផ្សេងៗ។ តន្រ្តីបង្ហើរសំណៀងកំដរត្រចៀក រីអត្ថន័យប្រៀបដូចជាគ្រឿងក្លែមកំដរអារម្មណ៍ តើទស្សនិកជនទន្ទឹងរង់ចាំអាហារផ្លូវអារម្មណ៍នេះដែររឺទេ?