នេះគឺជាដំណើរជីវិតរបស់តារាចម្រៀងស្រីជនជាតិអូស្ត្រាលីម្នាក់ ដែលមានចំណុចពិសេសដែលមនុស្សគ្រប់គ្នាបានដឹងបានស្គាល់ដោយការពាក់សក់ដើម្បីបិទបាំងមុខ នៅពេលដែលនាងឡើងសម្តែងនៅលើឆាករបស់នាង។ ហើយដើម្បីដឹងថា មុនពេលដែលនាងទទួលបានភាពជោគជ័យ នាងត្រូវឆ្លងកាត់ឧបសគ្គយ៉ាងណាខ្លះនោះ មានតែមកស្តាប់ទាំងអស់គ្នា។ Sia មិនដែលមានកុមារភាពធម្មតាដូចក្មេងដទៃនោះទេ។ នាងពិតជាមានជីវិតតស៊ូខ្លាំងជាមួយឪពុករបស់នាង ព្រោះគាត់មានចរិកបុគ្គលិកលក្ខណៈចំនួនពីរ, ដែលចរិកបុគ្គលិកលក្ខណៈមួយត្រូវបានគេហៅថា Phil ហើយគាត់គឺជាឪពុកដ៏ល្អបំផុតដែលនាងមិនធ្លាប់មានពីមុនមក ដោយសារគាត់ជាមនុស្សកំប្លែង, ចូលចិត្តលេងសើចច្រើន, និងគួរឱ្យចាប់អារម្មណ៍ ប៉ុន្តែចរិកបុគ្គលលក្ខណៈមួយទៀតត្រូវបានគេហៅថា Stan ហើយគាត់គឺជាមនុស្សដែលគួរឱ្យខ្លាចបំផុត នៅពេលនៅក្បែរ។ ដូច្នេះហើយ នាងធំឡើងជាក្មេងស្រីដែលមានភាពខ្មាស់អៀនខ្លាំង។ ចំណែកឯតន្ត្រីគឺជាចំណងចំណូលចិត្តរបស់នាង ដូច្នេះនៅពេលដែល Sia ស្ថិនៅក្នុងវ័យជំទង់ នាងបានច្រៀងឱ្យក្រុមតន្រ្តីមួយអស់រយៈពេលពីរបីឆ្នាំ ហើយបន្ទាប់មកនាងបានសាកល្បងអាជីពជាអ្នកចម្រៀងទោល។
ប៉ុន្តែនាងមិនដែលទទួលបានជោគជ័យធំដំណាមួយឡើយ ដែលបណ្តាលឲ្យនាងមានអារម្មណ៍ថាដូចជាមនុស្សបរាជ័យម្នាក់។ ទីបំផុត Sia បានត្រៀមខ្លួនរួចជាស្រេចសម្រាប់ការផ្លាស់ប្តូរក្នុងការចាប់ផ្តើមថ្មី ដូច្នេះនាងក៏សម្រេចចិត្តផ្លាស់ទៅទីក្រុងឡុងដ៍ ដើម្បីនៅជាមួយមិត្តប្រុសរបស់នាង ដែលជាស្នេហាដំបូង។ ពួកគេមិនអាចរង់ចាំដើម្បីនៅជាមួយគ្នាបានទេ ប៉ុន្តែគួរឱ្យសោកស្តាយ សោកនាដកម្មដ៏ធំមួយបានកើតឡើង ដែលនឹងផ្លាស់ប្តូរជីវិតរបស់នាងជារៀងរហូត។ មិត្តប្រុសរបស់នាងបានជួបគ្រោះថ្នាក់ចរាចរណ៍ នៅមុនពេលដែល Sia មានគម្រោងផ្លាស់ប្តូរអាជីបដ៏ធំមួយរបស់នាង។ មិត្តប្រុសរបស់នាងបានបាត់បង់ជីវិតនៅថ្ងៃខួបកំណើតទី 24 របស់គាត់។ នៅពេលនោះគឺជាពេលដែលជីវិតរបស់នាងបានចាប់ផ្តើមធ្លាក់ចុះជិតស្មើសូន្យ។ វាបានបន្សល់ស្លាកស្នាមនៃពេលវេលាដ៏ខ្មៅងងឹតមួយសម្រាប់នាង។ នាងបានចាប់ផ្តើមផឹកស្រាជាច្រើន ហើយថ្នាំញៀនបានក្លាយជាវិធីតែយ៉ាងគត់ ដែលនាងអាចគេចខ្លួនចេញភាពខ្លោចផ្សារមួយនេះ។ Sia កំពុងដោះស្រាយការឈឺចាប់ និងការធ្លាក់ទឹកចិត្តរបស់នាងក្នុងវិធីដែលដ៏អាក្រក់បំផុតមួយ។ ក្រោយមកនាងត្រូវបានគេរកឃើញថា នាងមានជំងឺបាយប៉ូឡា។ ជីវិតរបស់នាងកាន់តែលំបាក និងមិនអាចទ្រាំទ្របាន ដែលបណ្តាលឲ្យនាងមិនអាចរកឃើញគោលបំណងនៃការរស់នៅតទៅទៀត ដូច្នេះហើយ Sia បានសរសេរសារចុងក្រោយរបស់នាង ហើយព្យាយាមយកជីវិតខ្លួនឯង។ ប៉ុន្តែសំណាងល្អ នៅពេលនោះមានមិត្តភ័ក្តិម្នាក់បានទូរស័ព្ទមកនាង ចំពេលដែលនាងជិតសម្រេចផែនការធ្វើអត្តឃាតរបស់នាង ហើយបានបញ្ឈប់សកម្មរបស់នាងភ្លាមៗ។
"ច្បាស់ជាមានផ្នែកមួយរបស់ខ្ញុំដែលពិតជាចង់បន្តរស់នៅ ពីព្រោះនៅពេលនោះ ខ្ញុំគិតថាមានពិភពលោកមួយនៅខាងក្រៅ ហើយខ្ញុំមិនមែនជាផ្នែកមួយរបស់វា ប៉ុន្តែខ្ញុំប្រហែលជាចង់ចូលរួមជាមួយវា"។ វាជាសញ្ញាមួយដែលនាងត្រូវការការគ្រប់គ្រងខ្លួនរបស់នាងមកវិញ ហើយមិនចុះចាញ់នឹងជីវិតដោយងាយៗ។ ដូច្នេះ នាងបានចាប់ផ្តើមកម្មវិធីព្យាបាល 12 ជំហាន។ ទោះបីជាពេលវេលាដ៏លំបាកយ៉ាងណាក៏ដោយ នេះជាពេលវេលាដ៏ធំមួយសម្រាប់អាជីពចម្រៀងរបស់ Sia។ នាងបានប្រើអារម្មណ៍មនោសញ្ចេតនារបស់នាង ដើម្បីនិពន្ធបទចម្រៀងឱ្យសិល្បករល្បីៗផ្សេងទៀត ។ នាងបានសរសេរបទចម្រៀង "diamonds" ដែលជាបទដ៏ល្បីល្បាញបំផុតរបស់ Rihanna ក្នុងរយៈពេលត្រឹមតែ 14 នាទីប៉ុណ្ណោះ។ ប៉ុន្តែមានអារម្មណ៍មួយបានវិលមករកនាងវិញ ដែលប្រហែលជាដល់ពេលត្រូវបញ្ចូលថាមពលនៃគំនិតច្នៃប្រឌិតរបស់នាងក្នុងការសរសេរចម្រៀងសម្រាប់ខ្លួននាងហើយ។ ប៉ុន្តែ Sia មិនដែលមានគម្រោងសម្តែងម្តងទៀតទេ ដោយសារតែនាងមានការភ័យខ្លាចក្នុងការឡើងឆាកសម្តែង។
នាងភ័យខ្លាចក្នុងការសម្ដែង ហើយនាងមានអារម្មណ៍ថាដូចជាមនុស្សបរាជ័យម្នាក់, ប៉ុន្តែវាមិនអាចបញ្ឈប់នាងបានត្រឹមនឹងនោះទេ Sia បានរកឃើញវិធីមួយដែលអ្នកស្រលាញ់បំផុតដោយមិនបង្ហាញមុខរបស់នាង។ Sia បានបង្ហាញខ្លួនម្តងទៀតជាមួយនឹងសក់ពាក់ពណ៌សដែលបិទមុខរបស់នាងទាំងស្រុង ហើយរូបរាងនោះបានក្លាយជានិមិត្តសញ្ញារបស់នាង ហើយនាងបានក្លាយជាតន្ត្រីករដែលមានការស្រលាញ់ពេញចិត្តបំផុតនៅលើពិភពលោក។ នាងបានទទួលជោគជ័យជាសកល ហើយបានធ្វើវាតាមរបៀបរបស់នាងផ្ទាល់។ នាងនៅតែរក្សាភាពស្មោះត្រង់ចំពោះខ្លួនឯងជាមួយនឹងការព្យាបាល ការប្រើថ្នាំពេទ្យ និងកម្មវិធីព្យាបាល 12 ជំហាន, សុខភាពរាងកាយរបស់នាងបានប្រសើរឡើង ហើយទីបំផុតនាងក៏សប្បាយចិត្តម្តងទៀត។ ការតស៊ូរបស់ Sia បង្ហាញថា អ្នកអាចផ្លាស់ប្តូរជីវិតរបស់អ្នកបាន ទោះបីជាអ្នកមានអារម្មណ៍ថា ក្តីសង្ឃឹមទាំងអស់ត្រូវបានរលាយក៏ដោយ។ នាងហៀបនឹងបោះបង់ចោលហើយ ប៉ុន្តែនៅតែអាចរកឃើញកម្លាំងចិត្ត ដើម្បីប្រយុទ្ធនឹងជំងឺធ្លាក់ទឹកចិត្ត តស៊ូដើម្បីជីវិត និងធ្វើអ្វីមួយដ៏អស្ចារ្យ។
Sia បានរស់រានមានជីវិតពីសោកនាដកម្ម និងការបរាជ័យជាច្រើន ហើយបានសំរេចក្តីសុបិនរបស់នាងនៅអាយុ 38ឆ្នាំ។ ដូច្នេះអ្នកក៏អាចធ្វើបានដូចគ្នា! វាមិនដែលយឺតពេលនោះទេក្នុងការផ្លាស់ប្តូរជីវិតរបស់អ្នក, ប្រសិនបើអ្នកចង់ចាប់ផ្តើមអាជីវកម្ម, ផ្លាស់ប្តូរអាជីពរបស់អ្នក, ក្លាយជាអ្នកដឹកនាំដ៏អស្ចារ្យ, ក្លាយជាមនុស្សល្អជាងមុន, សរសេរសៀវភៅដែលអ្នកតែងតែចង់ធ្វើ, ឬគ្រាន់តែធ្វើអ្វីដែលប្លែកពីគេ, អ្វីដែលអ្នកមិនធ្លាប់សាកល្បងពីមុនមកនោះ។ ចិត្តរបស់អ្នកគឺជាកម្លាំងដ៏ខ្លាំងក្លាបំផុតនៅលើសកលលោក ហើយអ្នកមានថាមពលដ៏អស្ចារ្យដើម្បីក្លាយជាបុគ្គលដែលអ្នកចង់ក្លាយទៅជា និងជីវិតរបស់អ្នកគ្មានដែនកំណត់ឡើយ។ ដូច្នេះ មិនថាអ្នកជានរណាក៏ដោយ ចូរងើយមុខឡើង កុំបោះបង់នៅពេលនេះ៕