អ្នកទាំងអស់គ្នាច្បាស់ជាស្គាល់ហើយ ម្ចាស់បទ Waka Waka សម្រាប់ FIFA World Cup 2010។ គាត់គឺជាតារាចម្រៀងស្រីម្នាក់ ដែលក្លាយស្ត្រីដែលមានឥទ្ធិពលបំផុតទី 58 នៅលើពិភពលោក។ ក៏ប៉ុន្តែមានហេតុផលអ្វីបានជាគាត់ទទួលបានរហ័សនាមបែបនេះ? ដើម្បីស្រាយចម្ងល់មួយនេះ មានតែស្តាប់ពីជីវិតជោគជ័យរបស់គាត់ទាំងអស់គ្នា។
Shakira មានស្រុកកំណើតនៅប្រទេសកូឡុំប៊ី ក្នុងគ្រួសារដ៏មានសុភមង្គលមួយ ប៉ុន្តែអ្វីៗចាប់ផ្តើមផ្លាស់ប្តូរ នៅពេលដែលនាងមានអាយុត្រឹមតែ 2 ឆ្នាំ គ្រួសាររបស់នាងពិបាកចិត្តជាខ្លាំង នៅពេលដែលប្អូនប្រុសរបស់នាងបានស្លាប់ក្នុងគ្រោះថ្នាក់ចរាចរណ៍មួយ។ ប៉ុន្មានឆ្នាំក្រោយមក អាជីវកម្មគ្រឿងអលង្ការរបស់ឪពុកនាងបានក្ស័យធន ហើយគាត់បានបាត់បង់អ្វីៗទាំងអស់។ Shakira ត្រូវបានបញ្ជូនទៅរស់នៅជាមួយពូរបស់នាង រហូតដល់ឪពុកម្តាយរបស់នាងដោះស្រាយបញ្ហារួចរាល់ ប៉ុន្តែនៅពេលដែលនាងត្រលប់មកផ្ទះវិញ អ្វីគ្រប់យ៉ាងគឺខុសស្រឡាសពីអ្វីដែលនាងធ្លាប់មាន។ ជីវិតរបស់នាងបានក្រឡាប់ចាក់ទាំងស្រុង។
"យើងបានបាត់បង់ឡាន បាត់បង់គ្រឿងសង្ហារឹម ហើយខ្ញុំចាំបានយ៉ាងច្បាស់ថា ថ្ងៃដែលខ្ញុំដើរចូលផ្ទះរបស់ខ្ញុំម្តងទៀត ហើយគ្រឿងសង្ហារឹមទាំងអស់ក៏លែងមាននៅទីនោះ ព្រោះឪពុករបស់ខ្ញុំត្រូវសងបំណុលគេ ហើយពេលខ្ញុំឃើញបែបនេះ ខ្ញុំពិតជាក្តុកក្តួលខ្លាំងណាស់។ ខ្ញុំបានអន់ចិត្តនឹងឪពុកម្តាយរបស់ខ្ញុំ ព្រោះខ្ញុំមិនអាចយល់ពីរបៀបដែលពួកគាត់រកស៊ីមិនបានល្អបែបនេះ"។
ប៉ុន្តែឪពុកម្តាយរបស់នាងបានរកឃើញវិធីមួយ ដើម្បីធ្វើឱ្យនាងសប្បាយចិត្តឡើងវិញ និងត្រេកអរចំពោះអ្វីដែលនាងមាន។ ពួកគេបាននាំនាងទៅសួនកម្សាន្តមួយ ដែលមានក្មេងៗរស់នៅក្នុងភាពកខ្វក់ មានការស្រេកឃ្លាន មានជើងទទេរ និងសម្លៀកបំពាក់រហែក។ នាងបានឃើញគ្រួសារ និងក្មេងៗជាច្រើនដែលមិនសូវមានសំណាងដូចនាង ហើយនៅពេលនោះ នាងបានសន្យានឹងខ្លួនឯងថា នាងនឹងខិតខំប្រឹងប្រែងដើម្បីទទួលបានជោគជ័យ ហើយថ្ងៃណាមួយនឹងត្រលប់មកជួយក្មេងៗទាំងនោះវិញ។ ដូច្នេះនៅពេលនាងមានអាយុ ៨ ឆ្នាំ នាងបានចាប់ផ្ដើមនិពន្ធបទចម្រៀង និងទំនប់ភ្លេង។ ហើយនាងចូលចិត្តការរាំ និងច្រៀង ហើយមិនយូរប៉ុន្មានក៏ទទួលបានរហស្សនាមថា "The Belly Dancer Girl"។ ប៉ុន្តែក្តីសុបិនចង់ក្លាយជាអ្នកចម្រៀងត្រូវបានដួលរលំ នៅពេលដែលនាងត្រូវបានគេបដិសេធពីការចូលរួមជាមួយក្រុមចម្រៀងរបស់សាលា ដោយសារតែសំឡេងរបស់នាងខ្លាំងពេក។ នាងត្រូវបានគេប្រាប់ថា នាងមិនអាចច្រៀងបាន ហើយនាងមានសំឡេងដូចពពែ។
"ជីវិតខ្ញុំពោរពេញទៅដោយសុបិន។ តាំងពីអាយុ១០ឆ្នាំ ខ្ញុំបានជ្រើសរើសអាជីពមួយ។ ខ្ញុំដឹងថា ខ្ញុំចង់ក្លាយជាអ្នកចម្រៀង ហើយបុរសម្នាក់នេះមិនអនុញ្ញាតឱ្យខ្ញុំចូលរួមក្រុមចម្រៀងនៅសាលាឡើយ"។
នាងខូចចិត្តជាខ្លាំង ប៉ុន្តែឪពុកនាងបានជំរុញទឹកចិត្តនាងកុំឲ្យឈប់ច្រៀង។ ដូច្នេះ Shakira បានសម្រេចចិត្ត មិនផ្លាស់ប្តូររបៀបនៃការច្រៀងរបស់នាងឡើយ ហើយមិនព្យាយាមធ្វើត្រាប់តាមនរណាម្នាក់នោះទេ។ នាងបានចាប់យកសំឡេងដ៏ពិសេសរបស់នាង ហើយបានបង្កើតអាណាចក្រមួយនៅលើវា។ ប៉ុន្តែអាណាចក្រនោះមិនត្រូវបានសាងសង់ក្នុងរយៈពេលមួយយប់ទេ។ ផ្លូវទៅកាន់ភាពជោគជ័យរបស់នាង គឺពោរពេញទៅដោយការបរាជ័យ ដូច្នេះហើយបន្ទាប់ពី Shakira បានក្លាយជាអ្នកសិល្បៈម្នាក់ ហើយព្យាយាមបង្កើតវានៅក្នុងឧស្សាហកម្មតន្ត្រី ជាអកុសលអាល់ប៊ុមពីរដំបូងរបស់នាងគឺបរាជ័យយ៉ាងខ្លាំង ប៉ុន្តែនាងមិនខ្វល់ឡើយ នាងដឹងថានាងចង់ធ្វើវា និងគ្មានអ្វីដែលមិនអាចឈោងដល់សម្រាប់នាងនោះទេ។ ដូច្នេះនៅអាយុ ១៨ឆ្នាំ នាងបានចេញអាល់ប៊ុមមួយផ្សេងទៀតដែលបានក្លាយជាការជោគជ័យដ៏ធំមួយ ហើយ Shakira នៅតែរក្សាការសន្យារបស់នាង។ នាងបានបង្កើតអង្គការសប្បុរសធម៌មួយ ដើម្បីជួយកុមារក្នុងប្រទេសកូឡុំប៊ី ហើយចាប់តាំងពីពេលនោះមកអង្គការរបស់នាង បានពង្រីកទៅប្រទេសជាច្រើននៅទូទាំងពិភពលោក។ ដូច្នេះហើយ នារីកំសត់ដែលធ្លាប់គេលេងសើចដាក់ ព្រោះតែសំឡេងរបស់នាង បានក្លាយសិល្បៈករម្នាក់ដែលមានអ្នកស្រលាញ់រាប់អាន និងទទួលស្គាល់ច្រើនជាងគេនៅលើពិភពលោក។ នាងបានឈ្នះពានរង្វាន់ជាច្រើន ហើយបានក្លាយជាសិល្បករដែលលក់ដាច់បំផុតគ្រប់ពេលវេលា។ ហើយនៅក្នុងឆ្នាំ 2014 Shakira ត្រូវបានចុះបញ្ជីជាស្ត្រីដែលមានឥទ្ធិពលបំផុតទី 58 នៅលើពិភពលោកដោយទស្សនាវដ្តី Forbes ។
ខ្សែជោគជ័យរបស់ Shakira គឺជាការបំផុសគំនិត និងការលើកទឹកចិត្តយ៉ាងខ្លាំង ដោយសារតែនាងមិនអនុញ្ញាតឱ្យខ្លួនឯងបោះបង់ក្តីសុបិនរបស់នាង ហើយក្លាយជាជនរងគ្រោះនៃរឿងអាក្រក់ទាំងអស់ដែលបានកើតឡើងចំពោះនាងឡើយ។ ជីវិតមិនខ្វល់ពីការចាប់ផ្តើមដ៏លំបាក ការតស៊ូ និងការបរាជ័យរបស់អ្នកឡើយ អ្នកអាចសម្រេចចិត្តមិនបន្តក្តីសុបិនរបស់អ្នក អ្នកអាចគិតអ្នកអាចជឿថាពិភពលោកទាំងមូលប្រឆាំងនឹងអ្នក ហើយពេលខ្លះមនុស្សនឹងរិះគន់អ្នកសម្រាប់ភាពខុសប្លែកពីគេ ពេលខ្លះពួកគេនឹងប្រាប់អ្នកថា អ្នកមិនល្អគ្រប់គ្រាន់ និងអ្នកគួរតែបោះបង់ចោលទៅ។ ប៉ុន្តែកុំដាក់កម្រិតលើសុបិនរបស់អ្នក។ ប្រសិនបើអ្នកចង់ក្លាយជាមនុស្សអស្ចារ្យ និងជោគជ័យក្នុងជីវិត អ្នកត្រូវស្តាប់តែសំឡេងបេះដូងរបស់អ្នក ហើយស្វែងរកចំណង់ចំណូលចិត្តរបស់អ្នក។ ហើយនៅពេលដែលអ្នកធ្វើដូច្នេះ ចូរទុកភាពអសន្តិសុខ និងភាពភ័យខ្លាចរបស់អ្នកនៅដោយឡែក។ ខិតខំប្រឹងប្រែងជារៀងរាល់ថ្ងៃ ហើយកុំឱ្យនរណាម្នាក់ប្រាប់អ្នកពីអ្វីដែលអ្នកអាចធ្វើបាន ឬមិនអាចធ្វើបាន៕