1. ប្រធានសភាកាណាដាសុំទោសបន្ទាប់ពីអបអរអតីតយុទ្ធជនអ៊ុយក្រែនប្រយុទ្ធក្នុងសង្គ្រាមលោកលើកទី2
យោងតាមសារព័ត៌មាន CNN ចុះផ្សាយថ្ងៃទី២៥ ខែកញ្ញាបានអោយដឹងថា វាគ្មិននៃសភាកាណាដាបានសុំទោសបន្ទាប់ពីបាននិយាយអបអរសាទររំលឹកដល់អតីតយុទ្ធជនអ៊ុយក្រែនម្នាក់ដែលបានប្រយុទ្ធដើម្បីអង្គភាពយោធាណាស៊ីនៅក្នុងសង្គ្រាមលោកលើកទី ២។ នៅក្នុងសុន្ទរកថាមួយកាលពីថ្ងៃសុក្រក្នុងអំឡុងពេលដំណើរទស្សនកិច្ចរបស់ប្រធានាធិបតីអ៊ុយក្រែនលោក Volodymyr Zelensky ទៅកាន់សភាកាណាដា ប្រធានសភាលោក Anthony Rota បានទទួលស្គាល់ និងកោតសរសើរដល់លោក Yaroslav Hunka ដែលមានវ័យ 98 ឆ្នាំថាជាអតីតយុទ្ធជនអ៊ុយក្រែននិងកាណាដាដែលបាន "តស៊ូដើម្បីឯករាជ្យភាពជាតិអ៊ុយក្រែនប្រឆាំងនឹងអ្នកឈ្លានពានរុស្ស៊ីកាលពីសម័យកាលនោះ និងបន្តគាំទ្រកងទ័ពរហូតដល់សព្វថ្ងៃ”។ចាប់តាំងពីពេលនោះមក អង្គការសិទ្ធិមនុស្ស និងជនជាតិជ្វីហ្វជាច្រើននាក់បានថ្កោលទោសការលើកឡើងនេះ ដោយនិយាយថាលោក Hunka បានបម្រើការនៅក្នុងអង្គភាពយោធាណាស៊ីដែលត្រូវបានស្គាល់ថាជា កងពលធំទី 14 Waffen Grenadier នៃ SS ។ លោក Rota បាននិយាយនៅក្នុងសភាកាលពីថ្ងៃចន្ទថា"ខ្ញុំចង់សុំទោសទៅកាន់សភា។ ខ្ញុំសោកស្ដាយយ៉ាងខ្លាំងដែលខ្ញុំបានធ្វើឱ្យមនុស្សជាច្រើនអាក់អន់ចិត្តនឹងការលើកឡើងរបស់ខ្ញុំ" នៅក្នុងសេចក្តីថ្លែងការណ៍មុនរបស់លោក Rota ក៏បានពង្រីកនូវការសុំទោសដ៏ជ្រាលជ្រៅបំផុតរបស់លោកចំពោះសហគមន៍ជ្វីហ្វនៅក្នុងប្រទេសកាណាដា និងជុំវិញពិភពលោកផងដែរ។
2. ព័ត៌មានសម្ងាត់អាមេរិចទម្លាយថាការវាយបកអ៊ុយក្រែនគឺបរាជ័យ
យោងតាមសារព័ត៌មាន Sputnik ចុះផ្សាយថ្ងៃទី២២ ខែកញ្ញាបានអោយដឹងថា មន្ត្រីចារកម្មអាមេរិកម្នាក់បានប្រាប់អ្នកកាសែតជើងចាស់លោក Seymour Hersh អោយដឹងថាជម្លោះប្រូកស៊ីរវាងអាមេរិចជាមួយរុស្ស៊ីនៅក្នុងប្រទេសអ៊ុយក្រែនគឺជាបុព្វហេតុដែលឈានទៅរកភាពបរាជ័យ។ អ្នកយកព័ត៌មានដែលទទួលបានពានរង្វាន់ជាច្រើនបានសរសេរឡើងនៅលើ Blog របស់លោកថា "ធាតុសំខាន់ៗនៅក្នុងសហគមន៍ស៊ើបការណ៍សម្ងាត់អាមេរិក" បានវាយតម្លៃថា "កងទ័ពអ៊ុយក្រែនបានបាក់ទឹកចិត្ត និងបោះបង់ចោលនូវលទ្ធភាពយកឈ្នះលើខ្សែការពារបីជាន់របស់រុស្ស៊ីហើយ" ។ ភ្នាក់ងារស៊ើបការណ៍សម្ងាត់បាននិយាយថា ប្រធានាធិបតីអាមេរិកលោក Joe Biden កំពុងតែធ្វើរឿងល្ងង់ៗដូចជាការបំពាក់អាវុធដល់អ៊ុយក្រែន និងត្រៀមមូលដ្ឋានសម្រាប់ជំលោះទាំងដែលដឹងថាប្រធានាធិបតីរុស្ស៊ីច្បាស់ជាត្រូវបង្ខំចិត្តឆ្លើយតបវិញដោយកំលាំងយោធាហើយ។ លោកបានលើកឡើងថា«រុស្ស៊ីបានឈ្នះហើយ។ ហើយក៏មិនមានការវាយបករបស់អ៊ុយក្រែនទៀតដែរ ប៉ុន្តែសេតវិមាន និងប្រព័ន្ធផ្សព្វផ្សាយអាមេរិកនៅតែត្រូវរក្សាការភូតភរ។ ការពិតគឺប្រសិនបើកងទ័ពអ៊ុយក្រែនត្រូវបានបញ្ជាឱ្យបន្តការវាយបកនោះ កងទ័ពនឹងបះបោរព្រោះមិនចង់ស្លាប់ទៀតទេ ប៉ុន្តែនេះមិនសមទៅនឹងការនិពន្ធតាក់តែងឡើងដោយសេតវិមានឡើយ»។
3. ឧត្តមសេនីយ៍កំពូលថាកម្លាំងអ៊ុយក្រែនបានវាយលុកចូលភូមិ Verbove
យោងតាមសារព័ត៌មាន CNN ចុះផ្សាយថ្ងៃទី២៣ ខែកញ្ញាបានអោយដឹងថា ឧត្តមសេនីយដែលដឹកនាំការវាយបករបស់អ៊ុយក្រែនកាត់តាមខ្សែបន្ទាត់ជួរមុខទីតាំងភាគខាងត្បូងនិយាយថា កងកម្លាំងរបស់លោកបានវាយលុកដល់ភូមិ Verbove ហើយបានរំពឹងថានឹងមានការដណ្តើមបានធំជាងនេះទៅទៀត។ លោក Oleksandr Tarnavsky បានប្រាប់អ្នកយកព័ត៌មានអន្តរជាតិជាន់ខ្ពស់ CNN លោក Frederik Pleitgen ក្នុងអំឡុងពេលបទសម្ភាសន៍មួយកាលពីថ្ងៃសុក្រថា "នៅផ្នែកខាងឆ្វេង ដែលនៅជិតភូមិ Verbove យើងបានទំលុះចូលហើយ និងបន្តឆ្ពោះទៅមុខបន្ថែមទៀត"។ លោកបាននិយាយថា"វាមិនលឿនដូចការរំពឹងទុកនោះទេ ព្រោះវាមិនដូចទៅនឹងខ្សែភាពយន្តអំពីសង្គ្រាមលោកលើកទីពីរឡើយ"។ ការអះអាងរបស់ឧត្តមសេនីយរូបនេះគឺជាការបង្ហាញចុងក្រោយរបស់មន្ត្រីអ៊ុយក្រែនដែលថាផ្លូវកំពុងត្រូវបានត្រួសត្រាយហើយដើម្បីទៅកាន់ទីតាំងជួរមុខភាគខាងត្បូងនៅក្នុងសង្រ្គាមជាមួយរុស្ស៊ីនេះ។
