កាលពីពេលថ្មីៗនេះ បទ “ពូធំជាងប៉ា” របស់ Tik Tok Rapper Star មួយរូបដែលមានឈ្មោះថា REOUN កំពុងបានដុតពង្វក់ចំណាប់អារម្មណ៍ទស្សនិកជនជាច្រើន ជាពិសេសអ្នកនិយមលេងនៅលើបណ្តាញសង្គម Tik Tok ផ្ទាល់។
គួរអោយចាប់អារម្មណ៍ផងដែរ បទចម្រៀង “ពូធំជាងប៉ា” នេះត្រូវបានតាក់តែង និងនិពន្ធបទភ្លេងឡើងដោយ Tik Tok Rapper Star របស់យើងមួយរូបនេះផ្ទាល់តែម្តង ដោយលោកក៏ជាបេក្ខភាពចូលរួមប្រកួត និងទទួលបានជ័យលាភីលេខ៣នៅក្នុងកម្មវិធី The Rap Fighter របស់ផលិតកម្ម Fun Entertainment។
លោក REOUN ក៏មានឈ្មោះក្រៅម្យ៉ាងទៀតហៅថា Toro ដែលនៅពេលចូលរួមប្រកួត លោកក៏បានប្រើប្រាស់ឈ្មោះនេះសំរាប់ដំណើរក្នុងវិថីជា Rap Star។ ថ្វីបើនៅលើ Tik Tok លោកក៏ធ្លាប់បានប្រាប់ទស្សនិកជនថា លោកពេញចិត្តសម្រាប់ការហៅឈ្មោះមួយណាក៏បាន។
អ្វីដែលទស្សនិកជនប្រហែលជាមិនបានដឹងទៀតនោះ លោក REOUN មិនត្រឹមតែជា Tik Tok Star ប៉ុណ្ណោះទេលោកក៏ជាសមាជិក Rapper មួយរូបរបស់ក្រុម GO SQUAD ផងដែរ ដែលដឹកនាំ និងគ្រប់គ្រងដោយលោក 1NE សមាជិកនៃក្រុម Hip Hop ជើងចាស់ CG Movement។
ទាក់ទងនឹងបទចំរៀងផ្ទុះមួយបទនេះរបស់លោកផងដែរ សង្កេតឃើញថាលោក Toro កាន់តែទទួលបានការគាំទ្រយ៉ាងទូលំទូលាយ ដោយមានអ្នកនិយមលេងនៅលើ Tik Tok ស្រាប់អាចធ្វើការដាក់ពិន្ទុលើសមត្ថភាព ស្នាដៃបទចំរៀង និងទេពកោសល្យរបស់លោកបានយ៉ាងជាក់ស្តែង។ ដោយនៅពេលនេះ បទចម្រៀងមួយនេះរបស់លោកបានក្លាយជា Top Hit Song ដ៏ពេញនិយមហើយនៅលើ Tik Tok ជាមួយនឹងចំនួនទស្សនា 527.1K។