ភាពជោគជ័យរបស់លោកលីមតិចម៉េងបានធ្វើអោយកក្រើកបណ្តាញសង្គមនានាជាច្រើនមានដូចជា ហ្វេសប៊ុក TikTok Instagram ជាដើម។ យ៉ាងណាមិញនៅលើបណ្តាញសង្គមហ្វេសប៊ុកយើងឃើញថាមានបណ្តាសិល្បករជាច្រើនបានបង្ហាញចំណាប់អារម្មណ៍របស់ខ្លួនមកលើបេក្ខជនជាប់ក្នុងការប្រលងចំរៀងកំរិតថ្នាក់ពិភពលោកម្នាក់នេះ។ ដោយនៅក្នុងនោះមានដូចជាលោកហេងសុខវិសាល ដែលលោកបានធ្វើការចែករំលែកការបង្ហោះពត៌មានលោកលីមតិចម៉េងផ្តល់កិច្ចសម្ភាសន៍ក្នុងទូរទស្សន៍ហង្សមាសថាលោកចូលចិត្តបុរសម្នាក់នេះ។ ងាកមកមើលលោក​​​Q-Winម្នាក់ទៀតដែលជាInfluencerល្បីល្បាញម្នាក់នៅលើបណ្តាញសង្គមក៏បានបង្ហោះវីឌីអូ Reaction របស់លោករួមជាមួយដៃគូបែប កំប្លែងៗនៅពេលស្តាប់លទ្ធផលប្រកាសនៅក្នុងវគ្គផ្តាច់ព្រ័ត្រទាំងអារម្មណ៍បុកពោះតានតឹងពេលពិធីករពន្យារពេលប្រកាស។ 

ចំនែកឯលោកចេនវិញដែលជាសមាជិករបស់ក្រុមតន្រ្តី Nevrmind ក៏បានបសរសេរបង្ហោះជាសាធារណៈតែម្តងអបអរសាទរទៅកាន់លោកលីមតិចម៉េងដោយលោកបាននិយាយថាដោយក្តីស្រលាញ់ និងការខិតខំតស៊ូជីវិតរហូតដល់ពេលនេះតិចម៉េងអាចធ្វើបានសប្បាយអោយអស់ពីចិត្តរយៈពេលខ្លីបានហើយប្អូនប្រុស ហើយឆាប់ត្រលប់រៀបចំខ្លួនអោយបានល្អវិញ ព្រោះនេះគ្រាន់តែជាការចាប់ផ្តើមប៉ុណ្ណោះ ផ្លូវនៅវែងឆ្ងាយទៀត។ បន្ទាប់មកលោកក៏ចែកចាយនូវឳវាទខ្លះៗដល់លោកលីមតិចម៉េងអោយលោកព្យាយាមចេញបទOriginal ដោយខ្លួនឯង និងកុំបោះបង់អាជីពមួយនេះអោយសោះព្រោះវានឹងនៅជាមួយយើងរហូតតទៅទោះយើងខ្លួនទទេមិនសល់អ្វីទាំងអស់។ រីឯលោកជាវណ្ណារិទ្ធក៏បានបង្ហោះសារនិងរូបថតមួយចំនួនផងដែរអមនឹងការប្រកាសលទ្ធផលថាលោកលីមតិចម៉េងសម្លេង ពិរោះបត់បែនបានតាមស្ថានភាពបទចំរៀង ពូកែលេងសើច និងមានប្រជាប្រិយភាពបំផុត។ មិនតែប៉ុណ្ណោះរហូតដល់ថ្នាក់ដឹកនាំកំពូល សម្តេចហ៊ុនសែនក៏បានបង្ហោះសារបង្ហាញការគាំទ្រឡើងថាសូមអបអរសាទរចៅលីមតិចម៉េង ទីបំផុតជោគជ័យត្រូវបានទៅលើអ្នកឈ្នះ។