ការប្រគំតន្រ្តីដ៏ធំអស្ចារ្យ  Big Mountain Music Festival លើកទី១២របស់ប្រទេសថៃដែលមនុស្សជាច្រើនកំពុងទន្ទឹងរង់ចាំនេះបានកៀកខិតចូលមកដល់ហើយឆាប់ៗនេះដែលធ្វើឡើងក្នុងថ្ងៃទី១១ ខែធ្នូ ឆ្នាំ២០២២ នៅឯឧទ្យាន Khao Yai នៃខេត្ត Phetchaburi។ យ៉ាងណាមិញការអញ្ជើញសិល្បករអាស៊ានមកចូលរួមប្រមាណជា២៨នាក់ ដោយក្នុងនោះក៏មានរូបលោកវណ្ណដាតារារ៉េបប្រចាំប្រទេសកម្ពុជាផងដែរ អាចនិយាយបានថាមិនមែនជារឿងចៃដន្យនេះទេ។ ព្រោះបើក្រលេកទៅមើលវីដេអូមួយរបស់លោក​​​Ted Yuthana Boonorm ដែលជាអនុប្រធានកម្មវិធីផលិតនៃក្រុមហ៊ុន GMM Grammy និងជាProducer នៃការប្រគំតន្រ្តីBig Mountain Music Festival ផ្ទាល់គឺធ្លាប់បានបង្ហោះវីដេអូ Reaction មួយរបស់លោកនៅលើបទចំរៀង«Time To Rise» របស់លោកវណ្ណដាកាលពីមួយឆ្នាំមុនមកម្ល៉េះ។ នេះអាចសបញ្ជាក់អោយឃើញថាលោកវណ្ណដាត្រូវបានលោក Ted ដៅទុកយូរណាស់មកហើយអញ្ជើញមកចូលរួមនៅក្នុង Festival របស់លោក។ 

គួរបញ្ជាក់ផងដែរវិដេអូ Reaction មួយនេះត្រូវបានបង្ហោះឡើងនៅលើឆាណែលយូធូបផ្លូវការរបស់ Asean Music Showcase Festival ផងដែរនៅក្នុងថ្ងៃទី០៨ ខែកញ្ញា ឆ្នាំ២០២១កន្លងទៅនេះ។ ដោយនៅក្នុងនោះផងដែរលោក Ted បានលើកឡើងសរសើរនូវចំនុចជាច្រើនទៅលើបទចំរៀង «Time To Rise» របស់លោកវណ្ណដា។ លោកចាប់អារម្មណ៍ឃើញថាសិល្បៈវប្បធម៌របស់ប្រទេសថៃគឺមានលក្ខណៈស្រដៀងគ្នាទៅនឹងសិល្បៈវប្បធម៌របស់ប្រទេសខ្មែរ ហើយលោកជឿជាក់ថាប្រជាជនថៃនឹងចូលចិត្តបទចំរៀងរបស់លោកវណ្ណដាមួយបទនេះជាមិនខាន។ លោកក៏ប្រាប់ថាពេញចិត្តទឹកមុខ និងឥរិយាបថនៃការសម្តែងរបស់លោកវណ្ណដាផងដែរ។ រួមជាមួយនឹងគ្នានេះផងដែរលោកក៏ចាប់អារម្មណ៍ព្រឹទ្ធាចារ្យគង់ណៃ ដែលបង្ហាញភាបចំណាស់បុរាណនៃសិល្បៈតន្រ្តីកម្ពុជាបានយ៉ាងល្អ និងពេញចិត្ត Concept ដែលសិល្បករជំនាន់ក្រោយបង្ហាញការគោរពទៅកាន់រាមច្បងចាស់ព្រឹទ្ធាចារ្យ និងបន្ទាប់មកទៀតក៏ធ្វើពិធីជប់លៀងជួបជុំគ្នាសប្បាយៗតាមបែបជីវិតរស់នៅរបស់ប្រជាជនខ្មែរ។លោក Ted បង្ហាញការចាប់អារម្មណ៍បន្ថែមទៀតទៅលើការវេញបញ្ចូលគ្នានៃតន្រ្តី Hip Hop និងភ្លេងបុរាណ ដោយលោកយល់ឃើញថាអាចនាំអារម្មណ៍អ្នកស្តាប់ទទួលបានរសជាតិទាំងពីរក្នុងពេលតែមួយតែម្តង។