រាជធានីភ្នំពេញ៖ នាព្រឹកថ្ងៃទី២៨ ខែមករា ឆ្នាំ២០២២នេះ លោក បួន ហេង ប្រធាននាយកដ្ឋានមុខងារ និងធនធាន នៃអគ្គនាយកដ្ឋានរដ្ឋបាល ក្រសួងមហាផ្ទៃ បានដឹកនាំកិច្ចប្រជុំពិនិត្យមើលវឌ្ឍនភាពនៃការប្រើប្រាស់ប្រព័ន្ធទូទាត់វិក្កយបត្រ (Payment Hub) នៅអង្គភាពច្រកចេញចូលតែមួយ ដែលបានរៀបចំដោយ ក្រុមហ៊ុន KESS Innovation Plc នៅសណ្ឋាគារ Sofitel Phnom Penh Phokeethra និងដោយមានការចូលរួមពីលោក ប៉េះ គឹមស្រ៊ាន នាយកប្រតិបត្តិក្រុមហ៊ុន KESS Innovation។
កិច្ចប្រជុំនេះមានការអញ្ជើញចូលរួមពីថ្នាក់ដឹកនាំ និងមន្ត្រីបច្ចេកទេសចំណុះនាយកដ្ឋានមុខងារ និងធនធាន បុគ្គលិកពាក់ព័ន្ធនៃក្រុមហ៊ុន KESS Innovation និងដោយមានការចូលរួមពីលោក លោកស្រីប្រធានអង្គភាពច្រកចេញចូលតែមួយ មន្ត្រីទទួលបន្ទុកប្រគល់-ទទួលឯកសារ និងមន្ត្រីទទួលបន្ទុកការងារបេឡានៃអង្គភាពច្រកចេញចូលតែមួយរាជធានី ខេត្តគោលដៅសាកល្បងចំនួន៣ គឺរាជធានីភ្នំពេញ ខេត្តកំពង់ចាម និងខេត្តសៀមរាប សរុបចំនួន ២៥រូប។
សូមបញ្ជាក់ថា កន្លងមក ក្រសួងមហាផ្ទៃបានអនុញ្ញាតឱ្យក្រុមហ៊ុន ឃេស អ៊ិននើវេសិន (KESS Innovation) អនុវត្តសាកល្បងប្រព័ន្ធទូទាត់វិក្កយបត្រ (Payment Hub) នៅអង្គភាពច្រកចេញចូលតែមួយរាជធានីខេត្តចំនួន០៣ គោលដៅរួមមាន៖ រាជធានីភ្នំពេញ ខេត្តកំពង់ចាម និងខេត្តសៀមរាប ដែលប្រព័ន្ធទូទាត់វិក្កយបត្រ Payment Hub នេះ គឺដើម្បីផ្តល់ភាពងាយស្រួលក្នុងការទូទាត់វិក្កយបត្រ អោយបានឆាប់រហ័ស មានប្រសិទ្ធភាព តម្លាភាព និងគណនេយ្យភាព ប្រជាពលរដ្ឋដែលបានមកស្នើសុំសេវារដ្ឋបាលនៅអង្គភាពច្រកចេញចូលតែមួយ អាចធ្វើការបង់កម្រៃសេវាតាមម៉ាស៊ីនបង់ប្រាក់ KIOSK ដែលបានដាក់នៅក្នុងអង្គភាពច្រកចេញចូលតែមួយ តាមរយៈគណនីធនាគារដែលខ្លួនមាន៕
អត្ថបទដោយ៖ ប.រ