ភ្នំពេញ៖ នៅក្នុងពិធីប្រគល់សញ្ញាបត្រជូននិស្សិតជ័យលាភីនៃសាកលវិទ្យាល័យវេស្ទើននាព្រឹកថ្ងៃព្រហស្បតិ៍ ទី២៦ ខែមករា ឆ្នាំ២០២៣នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានណែនាំដល់រដ្ឋមន្ត្រីក្រសួងព័ត៌មានគួរហៅអ្នកកាសែត Online ទាំងអស់ទៅទទួលការអប់រំបន្ថែម។ ការណែនាំនេះបានកើតឡើងក្រោយពេលមានការរិៈគន់លើអ្នកកាសែត Online មួយចំនួនដែលធ្វើសកម្មភាពលើសដែនកំណត់វិជ្ជាជីវៈនាពេលកន្លងទៅ។

នៅក្នុងពិធីនេះសម្តេចតេជោ ហ៊ុន សែន បានមានប្រសាសន៍លើកឡើងថា សូមល្មមបញ្ចប់សកម្មភាពអ្នកកាសែតលើស្ពានជ្រោយចង្វារ ដែលជាសកម្មភាពមួយខុសឆ្គងមិនអាចទទួលយកបាន។ សម្ដេចតេជោបានជំរុញដល់លោក ខៀវ កាញារីទ្ធ រដ្ឋមន្ត្រីក្រសួងព័ត៌មានគួរហៅអ្នកកាសែត Online ទាំងអស់ទៅទទួលការអប់រំបន្ថែមចៀសវាងការកើតឡើងបាតុភាពផ្សេងៗនៅក្នុងសង្គមដូចករណីអ្នកកាសែត Online ម្នាក់ ដែលហួងហែងរឿងសកម្មភាពចរាចរណ៍លើស្ពានជ្រោយចង្វារកាលពីពេលថ្មីៗនេះ។ មន្រ្តីក្រសួងព័ត៌មានម្នាក់បានឱ្យដឹងថា ក្រសួងនឹងកោះហៅម្ចាស់គេហទំព័រមកសាកសួរលើករណីដែលបានកើតឡើងនាពេលកន្លងទៅ៕