តារារ៉េបរបស់ប្រទេសថៃមួយរូបមកពីផលិតកម្ម HypeTrain មានឈ្មោះថា Og bobby មួយរយៈពេលចុងក្រោយនេះឃើញថាលោកកំពុងមានសកម្មភាពមួយចំនួននៅក្នុងប្រទេសកម្ពុជា។ តាមរយៈបទ YoungMan ដែលជាការរួមសហការរបស់លោកជាមួយនឹងផលិតកម្មបារមី បានធ្វើអោយអ្នកគាំទ្រនៅកម្ពុជាជាច្រើននាក់បានចាប់ផ្តើមស្គាល់លោកច្រើនឡើងៗបន្ទាប់ពីទស្សនាការសម្តែងរួមគ្នារបស់លោកជាមួយនឹងលោកវណ្ណដាហើយ។​​​ យ៉ាងណាមិញគេសង្កេតឃើញថាលោកOgBobby និងលោកវណ្ណដាមានសកម្មភាពនៅលើបណ្តាញសង្គមជាមួយគ្នាច្រើនដែរ ដូចជាថ្មីៗនេះលោកOgBobbyក៏បានបង្ហេាះរូបថតលោកជាមួយនឹងលោកវណ្ណដា ព្រមទាំងមានការចែកលែកសាររបស់គ្នាជាញឹកញាប់ ដែលធ្វើអោយមហាជនអាចទាយបានថាពួកគេទាំងពីរនាក់កំពុងមានសកម្មភាពការងារជាមួយគ្នា និងមានភាពស្និទ្ធស្នាលនឹងគ្នាទៀតផង។ ហើយនៅក្នុងដើមខែសីហានេះ បន្ទាប់ពីបទចំរៀង«YoungMan»របស់ពួកគេបានធ្វើការចេញផ្សាយបានរយៈពេលមួយខែផលិតកម្ម HypeTrain ក៏បានបញ្ចេញវីឌីអូដំណើរបេសកកម្មរបស់លោកOgBobbyមកក្នុងប្រទេសកម្ពុជាផងដែរដែលបង្ហាញពីសកម្មភាពខ្លះៗរបស់លោកក្នុងការថតបទចំរៀងYoungManជាមួយក្រុមការងារបារមីនៅលើឆាណែលយូធូប និងហ្វេសប៊ុកផេកផ្លូវការរបស់ពួកគេ។ 

តាមរយៈវីឌីអូ​​​មួយនេាះបានផ្តិតជាប់នូវហេតុការណ៍ផ្សេងនៅក្នុងរយៈពេល៣ថ្ងៃនៃបេសកកម្មការងាររបស់លោករាប់ចាប់តាំងពីថ្ងៃមកដល់កម្ពុជាដំបូងរហូតមកដល់ថ្ងៃដែលលោក និងក្រុមការងារវិលត្រលប់ទៅវិញ។ បេសកកម្មមួយនេះធ្វើអោយអ្នកគាំទ្រនៅក្នុងប្រទេសកម្ពុជាស្គាល់ពីរូបលោកកាន់តែច្បាស់ និងធ្វើអោយអ្នកគាំទ្រក្នុងស្រុករបស់លោកក៏ពេញចិត្តនឹងដំណើរការងារសិល្បៈរបស់លោកជាមួយឆាកអន្តរជាតិ។ កត់សំគាល់ផងដែរថានៅក្នុងបទចំរៀងRunthetownដែលជាការបកស្រាយរួមគ្នារបស់លោកវណ្ណដា និងក្រុមសិល្បករមកពីប្រទេសថៃ លោកOgbobbyក៏ជាបុគ្គលម្នាក់ដែលបានចូលរួមសរសេរប៉ារ៉ូលចំរៀងផងដែរ។ ការសហការរបស់សិល្បករថៃនិងកម្ពុជាបានធ្វើអោយអ្នកគាំទ្ររបស់ពួកគេស្គាល់ពីគ្នារឹតតែច្បាស់ ហើយការលាយបញ្ចូលគ្នានៃរបាំងភាសានិងវប្បធម៌នេះនឹងបណ្តុះអោយមានការស្រលាញ់ជាតិសាសន៍ផ្ទាល់ខ្លូន និងគោរពដល់ជាតិសាសន៍ដទៃទៀតដោយទឹកចិត្តមនុស្សធម៌។