ការចាប់ដៃគូសហការរវាងលោក OG Bobby និងលោកVannda លើបទចម្រៀងទី២ជាថ្មីនេះមិនមែនជារឿងចៃដន្យនោះទេក្រោយពីបទទី១របស់ពួកគេ«Young Man» បានចេញផ្សាយកាលពីថ្ងៃទី០១ ខែកក្កដា ឆ្នាំ២០២២កន្លងមក។ យោងទៅតាមបទសម្ភាសន៍មួយរបស់ទស្សនាវដ្តី HipHopDX Asia ជាមួយនឹងលោកវណ្ណដាបានអោយដឹងពីទស្សនៈខ្លះៗរបស់វណ្ណដាអំពីការរួមសហការការងារជាមួយនឹងលោក OG Bobby។ ដោយលោកវណ្ណដាបានសម្តែងប្រាប់ថាលោកនឹងជ្រើសរើសសិល្បករណាជាដៃគូចម្រៀងរបស់លោកដែលមានភាពស៊ីគ្នាជាមួយនឹង Vibe របស់លោក ក៏ដូចជាជាមួយនឹងឧបករណ៍តន្រ្តីរបស់លោក ពីព្រោះលោកគឺជាProducerចម្រៀងម្នាក់ ដូច្នេះហើយលោកត្រូវការជ្រើសរើសដៃគូចម្រៀងណាដែលមានសំលេងត្រូវគ្នាជាមួយនឹងលោក ជាក់ស្តែងដូចជាលោក OG Bobby ផ្ទាល់ ដែលលោកមានសំលេងត្រូវគ្នាជាមួយនឹងលោកវណ្ណដាផងដែរ។ លោកវណ្ណដាក៏បន្ថែមទៀតផងដែរថានេះគឺជាអ្វីដែលលោកគិតដល់ ហើយលោកក៏រំពឹងថានឹងអាចរួមសហការការងារជាមួយនឹងលោក OG Bobby បាននៅក្នុងអាល់ប៊ុម Skull2 Season2ផងដែរ។ សំរាប់បទចម្រៀងថ្មីរបស់ពួកគេដែលមានចំណងជើងថា«បង»នេះផងដែរ ត្រូវបានចេញនៅលើឆាណែលផ្លូវការរបស់ផលិតកម្មផ្ទាល់ដែលមានឈ្មោះថា HYPE TRAIN GROUP កាលពីថ្ងៃទី២០ ខែតុលា ប្រហែលរយៈពេល៤ខែបន្ទាប់ពីការចេញផ្សាយបទទី១របស់ពួកគេ និងទទួលបានការគាំទ្រយ៉ាងខ្លាំងពីបណ្តាប្រទេសទាំងពីរគឺកម្ពុជា និងថៃ ដែលមានចំនួនអ្នកចូលទស្សនារហូតដល់១លានដងនៅលើយូធូបនៅក្រោមរយៈពេល២៤ម៉ោងប៉ុណ្ណោះ។ មិនតែប៉ុណ្ណោះទាំងប្រជាជនថៃនិងកម្ពុជាសុទ្ធតែបានធ្វើការ React លើបទចម្រៀងនេះជាច្រើនផងដែរ។