ភ្នំពេញ៖ អាជ្ញាធររាជធានីភ្នំពេញបានប្រកាសឱ្យប្រជាពលរដ្ឋដែលបាត់ម៉ូតូត្រូវភ្ជាប់ឯកសារនានានិងទៅពិនិត្យមើលម៉ូតូដែលសមត្ថកិច្ចបានដកហូតពីទីតាំងបញ្ចាំមួយចំនួន ហើយកំពុងស្តុកទុកនៅឃ្លាំង OCIC ខណ្ឌជ្រោយចង្វារ។

លោក ឃ្លាំង ហួត អភិបាលរងរាជធានីភ្នំពេញបានប្រកាសនៅថ្ងៃទី២១ ខែកញ្ញា ឆ្នាំ២០២២នេះ ពលរដ្ឋដែលបាត់ម៉ូតូនាពេលកន្លងទៅអាចមកត្រួតពិនិត្យម៉ូតូដែលសមត្ថកិច្ចបានដកហូតពីឃ្លាំងបញ្ចាំមួយចំនួនយកទៅរក្សាទុកនៅទីតាំងរបស់ OCIC ស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារ។

លោក ឃ្លាំង ហួត បានណែនាំដល់ពលរដ្ឋឱ្យភ្ជាប់ឯកសារពាក់ព័ន្ធមកជាមួយដើម្បីផ្ទៀងផ្ទាត់និងបង្កភាពងាយស្រួលក្នុងការស្វែងរកខណៈការបើកឱ្យត្រួតពិនិត្យនេះមិនកំណត់រយៈពេលឡើយហើយក្នុងករណីរកឃើញគឺសមត្ថកិច្ចនឹងប្រគល់ជូនវិញតែម្តងដោយពុំអស់ថវិកាអ្វីឡើយ។

ជាមួយគ្នានេះអភិបាលរងរាជធានីភ្នំពេញបានអំពាវនាវដល់សាធារណជនដែលដឹងពីទីតាំងលួចលេងល្បែងស៊ីសង និងទីតាំងហាងបញ្ចាំខុសច្បាប់ឱ្យជួយរាយការណ៍ដើម្បីអាជ្ញាធរចុះអនុវត្តវិធានការតាមច្បាប់៕