United Nations-

អគ្គលេខាធិការអ.ស.ប. Antonio Guterres បានប្រកាសកាលពីថ្ងៃច័ន្ទ ថាលោកបានតែងតាំងសង្គមវិទូជនជាតិសឹង្ហបុរី អ្នកស្រី Noeleen Hayzer ជាបេសកជនពិសេសប្រចាំមីយ៉ាន់ម៉ា។ អ្នកស្រីនឹងជំនួស Christine  Schraner ដែលជាជនជាតិស្វីស។ 

Hayzer អាយុ ៧៣ឆ្នាំធ្លាប់បានកាន់តំណែងជាន់ខ្ពស់ជាច្រើននៅអ.ស.ប. ,ជាពិសេសនៅក្នុងឆ្នាំ២០០៧ដល់២០១៤ ជាប្រធានគណៈកម្មាធិការសង្គមនិងសេដ្ឋកិច្ចសំរាប់អាស៊ីប៉ាស៊ីហ្វីក។ ក្នុងចន្លោះឆ្នាំ២០១៣និង២០១៥ លោកស្រីធ្លាប់បំរើការជាទីប្រឹក្សារពិសេសរបស់ ទីម័រខាងកើត ។

ដោយសារការងារលោកស្រីពាក់ព័ន្ធទៅនឹងគណៈកម្មាធិការសង្គមនិងសេដ្ឋកិច្ច Hayzer ធ្លាប់បានធ្វើការងារជាមួយនឹងអាស៊ាននិងជាមួយអាជ្ញាធរមីយ៉ាន់ម៉ាផងដែរក្នុងការងារអភិវឌ្ឍន៍និងបំបាត់ភាពក្រីក្រ។ ចាប់តាំងពីរដ្ឋប្រហារនៅថ្ងៃទី១ខែកុម្ភះនៅក្នុងប្រទេសមីយ៉ាន់ម៉ា ដែលបញ្ចប់នូវរយៈពេល១០ឆ្នាំនៃលទ្ធិប្រជាធិបតេយ្យ ,អ.ស.ប. និងអាស៊ានមិនបានទទួលនូវជោគជ័យក្នុងការជំរុញពួកយោធាមីយ៉ាន់ម៉ាឲ្យរៀបចំឡើងវិញនូវការសន្ទនាខាងផ្នែកនយោបាយនិងដោះលែងនិងមន្ត្រីស៊ីវិលដែលត្រូវបានចាប់ខ្លួននៅក្នុងរដ្ឋប្រហារ។

ទាំង Burgener ,ដែលបានចាកចេញពីការងារជាមួយអ.ស.ប.បន្ទាប់ពីបំរើការអស់រយៈពេលជាង៣ឆ្នាំ ហើយត្រឡប់ទៅធ្វើការឲ្យរដ្ឋាភិបាលស្វីសវិញ,ទាំងអនុរដ្ឋមន្ត្រីក្រសួងការបរទេសប្រ៊ុយណេ Erywan Yusof ដែលតែងតាំងជាបេសកជនពិសេសរបស់អាស៊ាន ដែលធ្លាប់បានធ្វើដំណើរទៅកាន់ មីយ៉ាន់ម៉ា គ្មាននរណាម្នាក់អាចមានលទ្ធភាព ជួបជាមួយអ្នកស្រី អូងសាន ស៊ូជី ដែលជាអតីតមេដឹកនាំស៊ីវិលដូចការរំពឹងទុកនោះទេ។

នៅក្នុងសេចក្តីថ្លែងការណ៍មួយទៅកាន់ប៉ុស្ត៍ព័ត៌មានអាស៊ី ( CNA ) Hayzer បាននិយាយថា លោកស្រីមានកិត្តិយសជាពន់ពេកដែលត្រូវបានតែងតាំងជា បេសកជនពិសេសប្រចាំមីយ៉ាន់ម៉ា។