ណៃ ម៉ា (Neymar) គឺជាកីឡាករបាល់ទាត់ដែលមានទេពកោសល្យបំផុត។ ប៉ុន្តែនៅពេលដែលគាត់មានអាយុត្រឹមតែ 4 ខែ អ្វីគ្រប់យ៉ាងស្ទើរតែបានបញ្ចប់មុនពេលវាចាប់ផ្តើម។ គាត់បានរួចផុតពីគ្រោះថ្នាក់ចរាចរណ៍ដ៏គួរឲ្យរន្ធត់មួយ ដែលរថយន្តបានឈប់នៅច្រាំងថ្មមួយនៅពីលើអូរ។
គ្រួសារទាំងមូលស្ថិតក្នុងស្ថានភាពគ្រោះថ្នាក់ ទារកនោះត្រូវបានគេរកឃើញមានហូរឈាម ប៉ុន្តែសំណាងល្អគាត់បានរត់គេចខ្លួនដោយរបួសស្រាល ហើយឪពុករបស់គាត់មានរបួសបាក់ត្រគាកប៉ុណ្ណោះ។ ណៃ ម៉ា (Neymar) បានធំឡើងជាក្មេងដែលមានភាពស្វាហាប់ខ្លាំង ប៉ុន្តែគ្រួសាររបស់គាត់រស់នៅក្នុងភាពក្រីក្រ។ គាត់មានស្រុកកំណើតនៅទីក្រុង សាវ ផលឡូ (Sao Paulo) ហើយរស់នៅក្នុងសង្កាត់ដ៏គួរឱ្យភ័យខ្លាចមួយ។ ឪពុករបស់គាត់បានបោះបង់អាជីពបាល់ទាត់របស់គាត់ដើម្បីផ្គត់ផ្គង់គ្រួសារ ហើយបានធ្វើការងារចំនួនបី ដើម្បីដោះស្រាយពីជីវភាពប្រចាំថ្ងៃ។ ស្ថានភាពពិតជាលំបាកខ្លាំងណាស់ ហើយគ្រួសាររបស់គាត់ក្រីក្រខ្លាំងពេក រហូតដល់មិនមានលទ្ធភាពបង់ថ្លៃភ្លើងប្រើប្រាស់ផងដែរ។ ណៃ ម៉ា (Neymar) បានចូលរៀននៅសាលាដ៏អាក្រក់បំផុតមួយ ហើយនៅពេលដែលគាត់ត្រលប់មកផ្ទះវិញ គាត់ត្រូវសិក្សាបន្ថែមទៀត ហើយធ្វើកិច្ចការផ្ទះក្រោមពន្លឺភ្លើងទៀននៅក្នុងផ្ទះដ៏តូចរបស់គាត់។
"មានរឿងជាមួយម្តាយខ្ញុំ ហើយខ្ញុំគិតថាមនុស្សភាគច្រើនច្បាស់ជាដឹងពីរឿងនេះ។ មានពេលមួយនោះ ខ្ញុំពិតជាចង់ញ៉ាំនំខូគីខ្លាំងណាស់ ប៉ុន្តែយើងអត់មានវាទេ ដូច្នេះម៉ាក់ខ្ញុំបាននិយាយថា កូន យើងអត់មានលុយទេ ដូច្នេះគ្មានវិធីណារកនំខូគីឲ្យកូនញ៉ាំឡើយ។ ម្តាយនឹងជំពាក់នំកូនសិននៅអាទិត្យនេះ ប្រហែលជាអាទិត្យក្រោយ នៅពេលដែលឪពុករបស់កូនទទួលបានប្រាក់ខែរបស់គាត់ យើងអាចទិញវាឲ្យកូនញ៉ាំ។ ក្នុងពេលជាមួយគ្នានោះ ខ្ញុំបានប្រាប់ទៅកាន់ម្តាយរបស់ខ្ញុំថា មិនអីទេម៉ាក់ ថ្ងៃណាមួយខ្ញុំនឹងក្លាយជាអ្នកមាន ខ្ញុំនឹងទិញរោងចក្រខូគី ដូច្នេះខ្ញុំអាចញ៉ាំបានគ្រប់ពេលដែលខ្ញុំចង់ញ៉ាំ"។
ដើម្បីសន្សំប្រាក់បានខ្លះ គ្រួសារទាំងមូលត្រូវផ្លាស់ទៅរស់នៅជាមួយតាយាយរបស់ ណៃ ម៉ា (Neymar) ហើយពួកគេត្រូវដេកក្នុងបន្ទប់គេងដ៏តូចមួយ រួមជាមួយនឹងពូកតែមួយគត់។ ចំណែកឯទេពកោសល្យរបស់គាត់ក្នុងវិស័យបាល់ទាត់វិញ មិនអាចពិពណ៌នាបានទេ។ នៅអាយុ 11 ឆ្នាំ Neymar បានក្លាយជាកីឡាករបាល់ទាត់តាមដងផ្លូវដ៏ល្អបំផុតនៅក្នុងស្រុកកំណើតរបស់គាត់ ហើយមិនយូរប៉ុន្មានក្រោយមក គាត់បានរីកចម្រើនពីការលេងបាល់ទាត់តាមដងផ្លូវ ទៅជាការលេងនៅលើទីលានបាល់ទាត់វិញ។ ណៃ ម៉ា (Neymar) ទៅលេងឱ្យក្លឹប សាន តូស (Santos) រហូតដល់ឆ្នាំ 2013 នៅពេលដែលគាត់ត្រូវបានចុះហត្ថលេខាជាមួយក្លឹប បាសេឡូណា (Barcelona) ក្នុងតម្លៃ 57 លានដុល្លារ ដែលជាឱកាសដ៏អស្ចារ្យមួយសម្រាប់គាត់ក្នុងការលេងជាមួយ លីអូណែល ម៉ែសស៊ី (Lionel Messi) ។
4 ឆ្នាំក្រោយមក គាត់ត្រូវបានចុះហត្ថលេខាដោយ ប៉ារីស សែន ចឺម៉ាន (Paris Saint-Germain) ក្នុងតម្លៃ 263 លានដុល្លារ គាត់បានបំបែកកំណត់ត្រាសម្រាប់ការផ្ទេរកីឡាករបាល់ទាត់ថ្លៃបំផុតក្នុងវិស័យនេះ។ ដូច្នេះហើយ ក្មេងប្រុសដ៏កំសត់ម្នាក់នេះ បានក្លាយជាកីឡាករបាល់ទាត់ថ្លៃបំផុតក្នុងប្រវត្តិសាស្ត្រ ហើយអ្វីទៅជាអាថ៌កំបាំងរបស់គាត់?
គាត់មិនមែនលេងបាល់ដើម្បីទទួលបានលេខមួយ ឬល្អបំផុតនោះទេ គាត់លេងបាល់ព្រោះគាត់ស្រឡាញ់វា។ ណៃ ម៉ា (Neymar) មិនខ្វល់ពីការប្រកួតប្រជែងនោះទេ គាត់គិតតែពីការអភិវឌ្ឍន៍សមត្ថភាពរបស់គាត់ប៉ុណ្ណោះ។
“ខ្ញុំគ្រាន់តែចង់ធ្វើឲ្យមានការរីកចម្រើនជារៀងរាល់ថ្ងៃប៉ុណ្ណោះ មិនមែនល្អជាងអ្នកដទៃឡើយ” ។
ដូច្នេះតើអ្នកដឹងទេថា នរណាកំពុងឈរនៅលើផ្លូវឆ្ពោះទៅរកជោគជ័យរបស់អ្នក? ម្នាក់នោះមិនមែនជាអ្នកជិតខាងរបស់អ្នក មិនមែនជាមិត្តភក្តិរបស់អ្នក ឬឪពុកម្តាយរបស់អ្នក ម្នាក់នោះគឺជាអ្នក។ ពេលខ្លះអ្នកអាចមានអារម្មណ៍ថាជាអ្នកចាញ់ម្នាក់ ហើយមនុស្សនៅជុំវិញខ្លួនអ្នកតែងតែឈ្នះ ដូច្នេះអ្នកគ្រាន់តែចង់បានភាពជោគជ័យម្តងដូចគេប៉ុណ្ណោះ។ មិត្តភ័ក្តិរបស់អ្នកទាំងអស់ហាក់បីដូចជាមានការងារដែលគេស្រមៃ គ្រប់គ្នាសុទ្ធតែជោគជ័យ មានទំនាក់ទំនងស្នេហាដ៏ល្អ អាជីពដ៏អស្ចារ្យ មានលុយច្រើនជាងអ្នក ហើយអ្នកហាក់ដូចជាជាប់គាំងនៅមួយកន្លែង មិនដឹងថាត្រូវទៅមុខ ឬទៅក្រោយនោះទេ ដូច្នេះចុងក្រោយអ្នកបានត្រឹមតែអន់ចិត្តនឹងខ្លួនឯង អន់ចិត្តនឹងអ្នកដទៃ ព្រោះវាជារឿងតែមួយគត់ ដែលអ្នកអាចធ្វើបាន។ ទោះបីជាយ៉ាងណាក៏ដោយ ឈប់ប្រៀបធៀបសមិទ្ធិផលរបស់អ្នកជាមួយអ្នកដទៃដែលនៅជុំវិញខ្លួនអ្នក។ វាមិនយុត្តិធម៌សម្រាប់ខ្លួនឯងឡើយ ហើយក៏មិនយុត្តិធម៌សម្រាប់អ្នកដទៃផងដែរ។
“ប្រៀបធៀបនឹងខ្លួនឯងកាលពីម្សិលមិញ មិនមែននឹងអ្នកដទៃនៅថ្ងៃនេះឡើយ។ មនុស្សតែម្នាក់គត់ដែលអ្នកអាចប្រៀបធៀបខ្លួនអ្នកបាន និងមានឱកាសល្អក្នុងការយកឈ្នះនោះ គឺខ្លួនអ្នកកាលពីម្សិលមិញ។ ពួកគេរស់នៅក្នុងជីវិតដូចអ្នក ពួកគេមានគុណសម្បត្តិដូចអ្នក អ្នកទាំងពីរបានចាប់ផ្តើមជីវិតនៅលើបន្ទាត់ដូចគ្នា ហើយអ្នកអាចឈានមុខគេដោយអភិវឌ្ឍន៍ខ្លួនឯងនៅថ្ងៃនេះ។ ដៃគូរប្រកួតប្រជែងរបស់អ្នក មិនមែនជាមួយអ្នកដ៏ទៃឡើយ ដៃគូរប្រកួតប្រជែងរបស់អ្នក គឺជាការពន្យាពេលរបស់អ្នក អត្មារបស់អ្នក អាហារមិនល្អដែលអ្នកកំពុងញ៉ាំ ចំណេះដឹងដែលអ្នកមិនព្រមទទួលយក អាកប្បកិរិយាអវិជ្ជមានដែលអ្នកកំពុងមាន ភាពច្នៃប្រឌិតដែលអ្នកខ្វះខាត ហើយត្រូវយកឈ្នះជាមួយរឿងទាំងនេះ។”
ដូច្នេះហើយ អ្នកត្រូវយកឈ្នះលើខ្លួនអ្នកកាលពីម្សិលមិញ អភិវឌ្ឍន៍ខ្លួនឯងនៅថ្ងៃនេះ ភាពជោគជ័យនៅថ្ងៃស្អែកនឹងជារបស់អ្នក៕