ក្រុមហ៊ុន Netflix បានចាប់ផ្តើមបញ្ចេញហ្គេមទូរស័ព្ទចំនួន 5 ដំបូងរបស់ខ្លួន ដែលអាចលេងបាននៅក្នុងកម្មវិធី Android ជាមុនសិន ហើយបន្ទាប់មកនឹងអាចលេងនៅក្នុងកម្មវិធី Apple iOS ក្នុងរយៈពេលប៉ុន្មានខែខាងមុខនេះ។ ហ្គេមនេះ អាចរកបានភ្លាមៗសម្រាប់អ្នកប្រើប្រាស់ទូរស័ព្ទ ឬថេប្លេត Android៖ ពួកវាត្រូវបានដាក់ក្នុងបញ្ជីនៅក្នុង Google Play Store ដែលមានដូចជា Stranger Things: 1984 និង Stranger Things 3: The Game ហ្គេមទាំងពីរ បានបង្កើតឡើងដោយ BonusXP; Shooting Hoops និង Teeter Up បង្កើតឡើងដោយ Frosty Pop; និង Card Blast បង្កើតឡើងដោយ Amuzo និង Rogue Games ។ ហ្គេមចំនួនបីចុងក្រោយនេះ គឺជាផ្នែកមួយនៃការធ្វើតេស្តរបស់ Netflix លើហ្គេមទូរស័ព្ទនៅក្នុងប្រទេសប៉ូឡូញ អេស្ប៉ាញ និងអ៊ីតាលី កាលពីដើមឆ្នាំនេះ។
ការផ្លាស់ប្តូរនេះ គឺជាជំហានដ៏ធំមួយ ហើយចុងក្រោយបង្អស់របស់ក្រុមហ៊ុន នៅក្នុងកិច្ចខិតខំប្រឹងប្រែងក្នុងការធ្វើឱ្យហ្គេមវីដេអូ ជាផ្នែកមួយនៃការបង្កើនការភ្ជាប់គណនី Netflix របស់ខ្លួន។ ក្រុមហ៊ុន Netflix បានបញ្ជាក់កាលពីខែកក្កដាថា ខ្លួននឹងពង្រីកការបង្កើតហ្គេម ដោយចាប់ផ្តើមជាមួយនឹងហ្គេមដែលគ្មានការផ្សាយពាណិជ្ជកម្ម សម្រាប់ឧបករណ៍ចល័តដូចជាទូរស័ព្ទ និងថេប្លេត ដែលមានភ្ជាប់គណនី Netflix របស់ខ្លួនដោយមិនគិតថ្លៃបន្ថែមទៀត។
វត្តមានរបស់ហ្គេមទាំងនេះ នឹងបានពង្រីកក្រុមហ៊ុន Netflix ពីអាជីវកម្មស្នូលនៃកម្មវិធីទូរទស្សន៍ និងភាពយន្ត ដែលជាសេវាកម្មវីដេអូដែលមានអ្នកប្រើប្រាស់ច្រើនបំផុតនៅលើពិភពលោក។ ការកើនឡើងនៃការចាប់អារម្មណ៍លើឧស្សាហកម្មហ្គេមក្នុងអំឡុងពេលជំងឺរាតត្បាតកូវីដ-19 កាលពីឆ្នាំមុន បានធ្វើឲ្យទីផ្សារសកលសម្រាប់ហ្គេមវីដេអូអាចរកចំណូលបានជិត 178 ពាន់លានដុល្លារ ហើយត្រូវបានគេរំពឹងថានឹងកើនឡើងដល់ 200 ពាន់លានដុល្លារក្នុងឆ្នាំ 2023៕
អត្តបទដកស្រង់ពី Joan E. Solsman
បកប្រែនិងកែសម្រួលដោយលោក គីមម៉េង