1. លីបង់អូសទាញអ៊ីស្រាអែលចូលរួមសង្រ្គាម
យោងតាមសារព័ត៌មាន The Times of Israel ចុះផ្សាយថ្ងៃទី១២ ខែវិច្ឆិកាបានអោយដឹងថា យ៉ាងហោចណាស់មានជនស៊ីវិល14 នាក់បានរងរបួស ដោយម្នាក់រងរបួសធ្ងន់ នៅក្នុងការវាយប្រហារមួយដោយមីស៊ីលបង្កឡើងដោយក្រុម Hezbollah ពីប្រទេសលីបង់ កាលពីថ្ងៃអាទិត្យ។ នៅក្នុងការវាយប្រហារមួយទៀត មានទាហានប្រាំពីរនាក់បានរងរបួសដោយកាំភ្លើង Mortar នៅជិតភាគខាងជើងនៃសហគមន៍ Menara។ មីស៊ីលរបស់ក្រុម Hezbollah បានវាយប្រហារលើយានជំនិះមួយចំនួននៅជិតភាគខាងជើងនៃសហគមន៍ Dovev ផងដែរ។ ដោយមានជនរងគ្រោះមួយចំនួនគឺជាបុគ្គលិករបស់សាជីវកម្មអគ្គិសនីអ៊ីស្រាអែល ដែលបានមកដល់ទីនេះដើម្បីជួសជុលខ្សែភ្លើងដែលខូចដោយសារការវាយប្រហារមុនពីប្រទេសលីបង់។ កងកម្លាំងការពារអ៊ីស្រាអែល IDF បាននិយាយថា ខ្លួនបានវាយប្រហារលើក្រុមហេសបូឡា នៅពីក្រោយការវាយប្រហារនេះ និងបានវាយប្រហារលើទីតាំងរបស់ពួកគេជាច្រើននៅភាគខាងត្បូងប្រទេសលីបង់ រួមទាំងឃ្លាំងអាវុធផងដែរ។ ចំណែកក្រុមហេសបូឡាពីរផ្សេងទៀតដែលបានបាញ់កាំភ្លើង Mortar ពីប្រទេសលីបង់ នៅក្បែរសហគមន៍ Menara និង Yir'on ក៏ត្រូវបានវាយប្រហារផងដែរ។
2. Netanyahu ប្រកាសថា "មិនចាកចេញពីហ្គាហ្សាដាច់ខាត"
យោងតាមសារព័ត៌មាន The Times of Israel ចុះផ្សាយថ្ងៃទី១២ ខែវិច្ឆិកាបានអោយដឹងថា នៅក្នុងសន្និសីទសារព័ត៌មានរួមគ្នាមួយកាលពីថ្ងៃសៅរ៍ លោកនាយករដ្ឋមន្ត្រី Benjamin Netanyahu លោករដ្ឋមន្ត្រីការពារជាតិ Yoav Gallant និងលោករដ្ឋមន្ត្រី Benny Gantz បានច្រានចោលការរិះគន់ទាំងអស់របស់អន្តរជាតិដែលថាអ៊ីស្រាអែលបានចំណាយអាយុជីវិតជនស៊ីវិលជាច្រើនដោយសារតែសង្គ្រាមនេះ។ ផ្ទុយមកវិញអ៊ីស្រាអែលបានជំរុញឱ្យមេដឹកនាំលោកខាងលិចមេត្តាឈរនៅពីក្រោយរដ្ឋជ្វីហ្វ និងប្តូរមកជាការគាំទ្រពួកគេវិញ ព្រោះថាជ័យជម្នះរបស់ខ្លួនគឺស្មើនឹងជ័យជម្នះរបស់ពិភពលោកទាំងមូលប្រឆាំងនឹងអំពើភេរវកម្ម។ លោក Netanyahu ក៏បានថ្កោលទោសលោកប្រធានាធិបតីបារាំង Emmanuel Macron លើកឡើងកាលពីមួយថ្ងៃមុននេះផងដែរថាអ៊ីស្រាអែលមិនអាចបន្តដោះដូរអំពើភេរវកម្មនេះជាមួយនឹងអាយុជីវិតប្រជាជនស្លូតត្រង់នោះទេ និងស្នើសុំអោយអ៊ីស្រាអែលធ្វើបទឈប់បាញ់ជាបន្ទាន់។ លោក Netanyahu ក៏បានបញ្ជាក់ទៅវិញថាអ៊ីស្រាអែលនឹងប្រឆាំងនឹងការវិលត្រឡប់របស់អាជ្ញាធរប៉ាឡេស្ទីនទៅកាន់តំបន់ហ្គាហ្សាវិញបន្ទាប់ពីសង្រ្គាមនេះចប់ ហើយលោកបាននិយាយថាអ៊ីស្រាអែលនឹងរក្សាការគ្រប់គ្រងសន្តិសុខជារួមនៅក្នុងតំបន់នេះវិញ។
3. មហិច្ឆតារបស់អ្នករស់នៅតំបន់ West Bank
យោងតាមសារព័ត៌មាន The New Yorker ចុះផ្សាយថ្ងៃទី១១ ខែវិច្ឆិកាបានអោយដឹងថា មានបទសម្ភាសន៍មួយទៅកាន់អ្នកស្រី Daniella Weiss ដែលជាមេដឹកនាំចលនាផ្លាស់ការតាំងទីលំនៅរបស់អ៊ីស្រាអែល បានបង្ហាញអោយដឹងថាចលនានៃការតាំងទីលំនៅនេះគឺវិធីសាស្រ្តមួយរបស់អ៊ីស្រាអែលក្នុងការចង់បន្ត និងធ្វើអោយរស់រានឡើងវិញនៃលិទ្ធិ Zionism របស់ប្រជាជនជ្វីហ្វ។ អ្នកស្រីបានបង្ហាញថាព្រំប្រទល់ពិតប្រាកដរបស់ទឹកដីកំណើតរបស់ជនជាតិជ្វីហ្វគឺគួរតែចាប់តាំងពីទន្លេ Euphrates នៅភាគខាងកើត មកកាន់ ទន្លេនីលនៅភាគនិរតី ដែលនេះមានរួមបញ្ចូលទឹកដីប្រទេសមជ្ឈិមបូព៌ាជាច្រើន ក៏ដូចជាទឹកដីដែលអ៊ីស្រាអែលគ្រប់គ្រងសព្វថ្ងៃ។ អ្នកស្រីថ្លែងអោយដឹងទៀតថា មហិច្ឆតារបស់ប្រជាជនជ្វីហ្វនៅតំបន់ West Bank មិនមែនជាការចង់បណ្តេញប្រជាជនប៉ាលេស្ទីនចេញពីអធិបតេយ្យភាពរបស់អ៊ីស្រាអែលនោះទេ ប៉ុន្តែចង់អោយពួកគេគោរពនូវអធិបតេយ្យភាពរបស់អ៊ីស្រាអែល ហើយពួកគេមិនមានសិទ្ធិបោះឆ្នោតទេ។ ចំណែកពេលនេះប្រសិនបើតំបន់ហ្គាហ្សាកំពុងរងនូវការទម្លាក់គ្រាប់បែក ពួកគេគួរតែភៀសខ្លួនទៅឧបទ្វីបស៊ីណៃរឺអេហ្ស៊ីបផងដែរ ដូចគ្នាទៅនឹងប្រជាជនអ៊ុយក្រែនដែលភៀសខ្លួនទៅអឺរ៉ុបរឺបារាំង។
