នាដើមខែកញ្ញានេះ ធនាគារជាតិនៃកម្ពុជាNBCបានធ្វើអន្តរាគមន៍នៅលើទីផ្សារប្តូរប្រាក់ ដើម្បីរក្សាស្ថិរភាពអត្រាប្តូរប្រាក់ផ្អែកតាមមូលដ្ឋាននៃការប្រែប្រួលសេដ្ឋកិច្ច ដោយប្រកាសដាក់ដេញថ្លៃលក់ប្រាក់ដុល្លារអាមេរិកសរុបចំនួន ៧០លានដុល្លារអាមេរិក។

កាលពីថ្ងៃទី ៦ខែកញ្ញា NBCបានដាក់ដេញថ្លៃលក់ប្រាក់ដុល្លារអាមេរិកចំនួន ២០លានដុល្លារអាមេរិក និងនៅថ្ងៃទី ៨ខែកញ្ញានេះ NBCក៍បានដាក់ដេញថ្លៃលក់ប្រាក់ដុល្លារអាមេរិកចំនួន ២០លានដុល្លារអាមេរិកទៀតខណៈនៅថ្ងៃទី ១០ខែកញ្ញាខាងមុខ នឹងប្រកាសដាក់ដេញថ្លៃចំនួន ៣០លានដុល្លារអាមេរិកបន្ថែមទៀត។

គួរបញ្ចាក់ថាការដាក់ដេញថ្លៃប្រាក់ដុល្លារអាមេរិកនេះ គឺជាគោលនយោបាយគ្រប់គ្រងទីផ្សារប្តូរប្រាក់របស់ធនាគារជាតិនៃកម្ពុជា ដែលតែងតែធ្វើបែបនេះ ក្នុងគ្រាដែលតម្លៃប្រាក់រៀលធ្លាក់ចុះ បើធៀបនឹងប្រាក់ដុល្លារអាមេរិក ក្នុងគោលបំណងរក្សាស្ថិរភាពទីផ្សារប្តូរប្រាក់ រក្សាលំនឹងកម្រិតអត្រាអតិផរណានៅក្នុងស្រុក និងរក្សាស្ថិរភាពម៉ាក្រូសេដ្ឋកិច្ច ស្របពេល កម្ពុជា ក៏ដូចជា ពិភពលោកកំពុងប្រយុទ្ធប្រឆំាងនឹងជំងឺកូវីដ១៩។

មួយរយៈពេលប៉ុន្មានចុងក្រោយនេះ គិតចាប់តាំងពីខែសីហាមក តម្លៃប្រាក់រៀល ហាក់មានការធ្លាក់ចុះ បើធៀបជាមួយនឹងប្រាក់ដុល្លារអាមេរិក។ ទោះជាយ៉ាងនេះក្តី បន្ទាប់ពីធនាគារជាតិនៃកម្ពុជាNBCបានធ្វើអន្តរាគមន៍ តម្លៃប្រាក់រៀលនៅថ្ងៃនេះចាប់ផ្តើមងើបឡើងបន្តិចវិញ ដែលក្នុងតម្លៃ ៤.០៧៩រៀល ក្នុងមួយដុល្លារអាមេរិក បើធៀបកាលពីម្សិលមិញ មានតម្លៃ ៤.០៨០រៀល ក្នុងមួយដុល្លារអាមេរិក។ នេះបើយោងតាមធនាគារជាតិនៃកម្ពុជា។

ការធ្លាក់ចុះនៃតម្លៃប្រាក់រៀល អាចបណ្តាលមកពីការថយចុះនៃលំហូរចូលប្រាក់ដុល្លារអាមេរិកពីភ្ញៀវទេសចរអន្តរជាតិ និងវិនិយោគផ្ទាល់ពីបរទេស ការថយចុះតម្រូវការប្រាក់រៀលសម្រាប់បង់ពន្ធ និងកំណើនចំណាយរបស់រាជរដ្ឋាភិបាល។ ម៉្យាងវិញទៀត ចាប់តាំងពីពិភពលោកបានធ្លាក់ចូលក្នុងវិបត្តិជំងឺកូវីដ១៩ ក្នុងរយៈពេលជាង ១ឆ្នាំមកនេះ ប្រាក់ដុល្លារអាមេរិក នៅតែរក្សាបានតម្លៃថ្លៃ និងរឹងមាំនៅលើទីផ្សារបើធៀបជាមួយរូបិយប័ណ្ណផ្សេងៗ ក្នុងនោះរួមបញ្ចូលទាំងរូបិយប័ណ្ណប្រាក់រៀលរបស់កម្ពុជាផងដែរ។

សូមជម្រាបថា នៅឆមាសទី ១ឆ្នាំ ២០២១នេះ ធនាគារជាតិនៃកម្ពុជា NBCបានធ្វើអន្តរាគមន៍នៅលើទីផ្សារប្តូរប្រាក់ ដើម្បីរក្សាស្ថិរភាពអត្រាប្តូរប្រាក់ផ្អែកតាមមូលដ្ឋាននៃការប្រែប្រួលសេដ្ឋកិច្ច បានលក់ប្រាក់ដុល្លារអាមេរិកសុទ្ធមានចំនួន ៤៨,៥លានដុល្លារអាមេរិក ក្នុងនោះការលក់សុទ្ធពីគ្រឹះស្ថានធនាគារ និងអាជីករប្តូរប្រាក់ចំនួន ៧៥,២លានដុល្លារអាមេរិក៕