NRP-Moscow

ដំបូងសហរដ្ឋអាមេរិកជួបជាមួយអ្នកការទូតរុស្សីនៅទីក្រុងហ្សឺណែវ បន្ទាប់មក NATO បានទទួលជួបជាមួយគណប្រតិភូរុស្សីនៅ Brusels ជាចុងក្រោយ អង្គការសំរាប់សន្តិសុខ និងកិច្ចសហប្រតិបត្តិការណ៍អឺរ៉ុប នឹងមានការជជែកជាមួយនៅទីក្រុងវីយ៉េន។ រុស្សីបានចាត់វិធានការណ៍លើរឿងនេះដោយបានប្រមូលផ្តុំទ័ពជាង១សែននាក់ នៅជិតព្រំប្រទល់អ៊ុយក្រែន ដែលបណ្តាលឲ្យមានការភ័យខ្លាចនៃការឈ្លានពានរបស់រុស្សី។ អ្នកវិភាគបានមើលឃើញថា ការប្រមូលផ្តុំកងទ័ព គឺជាការប៉ុនប៉ង ដើម្បីដាក់សម្ពាធទៅលើសហរដ្ឋអាមេរិក និងសម្ព័ន្ធមិត្តអឺរ៉ុបឲ្យធ្វើសម្បទានដោយមានការធានាសន្តិសុខសំរាប់រុស្សី។

តើអ្វីទៅដែលរុស្សីចង់បាន? ហើយហេតុដូចម្តេចបានជាអាមេរិកមានការពិបាកក្នុងការជួបជាមួយរុស្សីក្នុងពេលខ្លះ?

ទី១ រុស្សីចង់ឲ្យមានការធានាមិនឲ្យអ៊ុយក្រែនចូល NATO វាជាការទាមទារដ៏ចាំបាច់ ដើម្បីបញ្ចប់សម្ព័ន្ធមិត្តលោកខាងលិចមិនឲ្យពង្រីកខ្លួនបន្ថែមទៀត មកក្នុងអតីតសហភាពសូវៀត ជាពិសេសអ៊ុយក្រែន។ អ្នកសង្កេតការជាច្រើនមើលឃើញថាផ្លូវនៅវែងឆ្ងាយណាស់ ក្នុងការដែលអ៊ុយក្រែនអាចចូលជាសមាជិក NATO ដោយសារមិនទាន់មានលក្ខណៈសម្បត្តិពេញលេញតាមតម្រូវការរបស់ NATO ។ ប៉ុន្តែសហរដ្ឋអាមេរិកបានជំទាស់ថា ប្រទេសទាំងឡាយមានសិទ្ធនឹងជ្រើសរើសសម្ព័ន្ធមិត្ត ហើយ NATO មាននយោបាយបើកចំហរទ្វារសំរាប់លទ្ធភាពជាសមាជិកភាព ហើយសហរដ្ឋអាមេរិកក៏មិនដែលបង្ខំឬក៏រុករានទន្រ្ទាននោះដែរ។

ទី២ រុស្សីចង់ឲ្យហាមឃាត់ NATO មិនឲ្យពង្រាយសព្វាវុធ និងកងកម្លាំងនៅអឺរ៉ុបកណ្តាល និងខាងកើត ដែលចូលរួមជាមួយសម្ព័ន្ធមិត្ត បន្ទាប់ពី១៩៩៧។ នៅក្នុងទស្សនៈរបស់ Putin លោកយល់ថា ឆ្លៀតឱកាសដែលរុស្សីចុះខ្សោយ អាមេរិកបានកេងចំណេញក្នុងការពង្រីកនូវសម្ព័ន្ធមិត្តឆ្ពោះទៅកាន់សំយ៉ាបផ្ទះរបស់រុស្សី។

ចំពោះជំហរបស់ NATO លើបញ្ហានេះ អាមេរិកបានបញ្ជាក់ច្បាស់ថា សូម្បីតែរុស្សីខ្លួនឯងក៏យល់ថាការទាមទារនេះវាគ្មានភាពប្រាកដនិយម និងហេតុផលដែលត្រូវទាមទារនោះទេ ហើយក៏មិនអាចសម្រេចបានដែរ។ មន្ត្រីលោកខាងលិចបានប្រឆាំងទៅនឹងគំនិតមិនឲ្យសម្ព័ន្ធមិត្តពង្រីកខ្លួន ដោយនិយាយថា គឺជាទង្វើររបស់រុស្សីទេ ដែលនាំឲ្យ NATO ពង្រឹងកម្លាំង និងដាក់ពង្រាយកងទ័ពព្រមទាំងសព្វាវុធនៅក្នុងរដ្ឋជាសមាជិកថ្មីរបស់ខ្លួន “NATO មិនត្រូវការដាក់ទ័ពទៅជិតរុស្សីទេ រហូតដល់ពេលដែលរុស្សីបានចាប់យក Crimea និងឈ្លានពានភាគខាងកើតអ៊ុយក្រែនក្នុងឆ្នាំ២០១៤។ Victoria Nuland ឧបការីរដ្ឋមន្ត្រីក្រសួងការបរទេសផ្នែកកិច្ចការនយោបាយបាននិយាយកាលពីថ្ងៃអង្គារ៍៕