រុស្សីនិងបែលឡារូស្ស បានធ្វើសមយុទ្ធជាផ្លូវការដែលមានទ្រង់ទ្រាយធំកាលពីថ្ងៃសុក្រ ដែលជាសមយុទ្ធរយៈពេលវែងរហូតដល់មួយសប្តាហ៍ ឆ្លងកាត់តាមព្រំប្រទល់និងទឹកដីនៃប្រទេសទាំង២ និងសមុទ្ទបាល់ទិក ដែលធ្វើឲ្យសមាជិក ណាតូខ្លះមានការព្រួយបារម្ភ។

សមយុទ្ធនេះមានកងទ័ពចូលរួមប្រមាណ ២០០,០០០នាក់ ដែលឲ្យឈ្មោះថា Zapad (លោកខាងលិច)២០២១ ដែលជាកិច្ចព្រមព្រៀងរវាងរុស្សីនិងបែលឡារូស្ស ក្នុងការខិតខំប្រឹងប្រែងទប់ទល់ជាមួយក្រុមបស្ចឹមប្រទេស បង្កើតនូវអ្វីដែលគេហៅថា « លំហការពារតែមួយ»ដែលជាការពង្រឹងកងទ័ពនៅក្បែរព្រំប្រទល់ភាគខាងកើត អ៊ុយក្រែនផងដែរ។

សមយុទ្ធនេះ បានធ្វើឡើងជាប្រកក្រតីរវាងប្រទេសទាំង២ តែពេលនេះ វាហាក់ដូចជាជួនពេលដែលរុស្សីកំពុងតែមានភាពតានតឹងជាមួយណាតូ និងការដាក់ទណ្ឌកម្មសេដ្ឋកិច្ចពីសំណាក់លោកខាងលិច មកលើប្រទេសបែលឡារូស្ស​​ ដែលដឹកនាំដោយ លោកប្រធានាធិបតី Alexander Lukashenko ក្នុងការដែលលោកបានបង្រ្កាបយ៉ាងចាស់ដៃទៅលើការតវ៉ាពីលទ្ធផលឆ្នោតកាលពីដើមឆ្នាំ។

លោក Putin បានហៅប្រទេសរុស្សីនិង បែលឡារូស្ស ថាជារដ្ឋសហភាព ដោយយោងទៅលើមហិច្ឆិតាដ៏យូរអង្វែងរវាងមេដឹកនាំនៃប្រទេសទាំង២។