កាលពីពេលថ្មីៗនេះ ខណៈដែលបទដ៏លន្លង់លន្លោចរបស់លោកព្រាបសុវត្ថិកាលពីទសវត្សរ៍មុន «ចាំទឹកភ្នែកបងស្ងួតសិន» ត្រូវបាន Remake ឡើងវិញ អ្នកបន្តវេនពីបទបែបលន្លង់លន្លោចរបស់ឪពុក លោកសុវត្ថិមុនីវណ្ណក៏បានបញ្ចេញបទមនោសញ្ចេតនារបស់ខ្លួនឯងមួយបទដូចគ្នា ដែលមានចំណងជើងថា«My Angel»។
មួយបទនេះបានធ្វើអោយទស្សនិកជនជាច្រើនមានការចាប់អារម្មណ៍ជាខ្លាំង និងត្រូវបាន Go Viral នៅលើបណ្តាញសង្គម Tik Tok កាលពីពេលថ្មីៗនេះ។ គួរបញ្ជាក់ផងដែរថា បទ«My Angel» នេះទើបតែបានចេញផ្សាយឡើងកាលពីថ្ងៃទី០៩ ខែធ្នូកន្លងទៅនេះទេនៅឆាណែលយូធូបផ្លូវការទាំងពីររបស់ផលិតកម្ម Galaxy Navatra និងរបស់លោកសុវត្ថិមុនីវណ្ណផ្ទាល់។
តើតាមរយៈបទចម្រៀងនេះ នឹងអាចធ្វើអោយទស្សនិកជនចងចាំពីលោកសុវត្ថិមុនីវណ្ណក្នុងរយៈពេល១០ឆ្នាំខាងមុខដែររឺទេ? តើបទ«My Angel» នឹងអាចស្នងតំណែង និងមានវាសនាដូចបទ«ចាំទឹកភ្នែកបងស្ងួតសិន» ក្នុងរយៈពេល១០ឆ្នាំខាងមុខដែររឺទេ? យ៉ាងណាមិញមហាជនមួយចំនួនបានបង្ហាញការចាប់អារម្មណ៍គួរអោយកត់សម្គាល់ផងដែរថា នៅពេលដែលលោកសុវត្ថិមុនីវណ្ណធ្វើជាខ្លួនឯង នោះលោកពិតជាបានធ្វើអោយបទចម្រៀងមួយទទួលបានភាពជោគជ័យពិតមែន។
ខណៈដែលមានមតិមួយចំនួនទៀតបានលើកឡើងថា បទចម្រៀងនេះសក្តិសមសម្រាប់នារីៗស្តាប់ ព្រោះពួកគេពិតជាសក្តិសមទទួលបានក្តីស្រលាញ់ដ៏ស្រស់ស្អាតបែបនេះខ្លាំងណាស់។ តើទស្សនិកជនយល់ឃើញយ៉ាងណាចំពោះបទ«My Angel» នេះ?