ទន្ទឹមនឹងកម្មវិធី The Voice Kids Cambodia 2022 កំពុងដំណើរការបានជាច្រើនសប្តាហ៍កន្លងមក ផលិតកម្មហង្សមាសវិញបានបន្ត Promote សិល្បកររបស់ខ្លួនជាប់ជ័យលាភីនៅក្នុងកម្មវិធីប្រលងលំដាប់ថ្នាក់ពិភពលោកជាហូរហែតាមរយៈMV បទចំរៀងរបស់ពួកគេ។ ជាក់ស្តែងនៅក្នុងពេលថ្មីៗនេះ ហង្សមាសទើបតែបានបញ្ចេញ Teaser បទចម្រៀងថ្មីមួយទៀតរបស់ម្ចាស់ពានកម្មវិធីលំដាប់ថ្នាក់ពិភពលោកទាំង៤រូបដែលបានបង្ហាញទស្សនីយភាពរាំដ៏ទាក់ទាញរបស់ពួកគេរួមគ្នានៅខាងមុខឧទ្ធម្ភាគចក្រមួយគ្រឿងកាលពីថ្ងៃទី២៦​​​ ខែតុលាកន្លងមកនេះ។ អ្នកទាំងបួនរូបគឺជាម្ចាស់ពានមកពីកម្មវិធីខុសៗគ្នា ដែលក្នុងនោះរួមមានលោកលីម តិចម៉េង ជ័យលាភី Cambodian Idol រដូវកាលទី៤, ភឿន សុភាព ជ័យលាភី Cambodian Idol Junior, ចាន់ សុបញ្ញា ជ័យលាភី X Factor Cambodia រដូវកាលទី១ និងពេជ្រថៃ ជ័យលាភី The Voice Kids Cambodia 2017។ នេះគឺជាបទដំបូងហើយដែលពួកគេទាំងបួននាក់បង្ហាញខ្លួនរួមគ្នា ហើយក៏មានមហាជនជាច្រើនចាប់អារម្មណ៍ឃើញថាម្ចាស់ពានជាច្រើនរដូវកាលកន្លងមកនេះសំបូរដោយបេក្ខជនមានសមត្ថភាពមកពីខេត្តកំពង់ចាម ជាក់ស្តែងលោកលីម តិចម៉េង លោកចាន់សុបញ្ញា និងលោកភឿន សុភាពសុទ្ធតែជាអ្នកខេត្តកំពង់ចាមទាំងអស់លើកលែងតែកំលោះតូចពេជ្រថៃមានស្រុកកំណើតនៅឯខេត្តបាត់ដំបង។ មិនតែប៉ុណ្ណោះក៏មានអ្នកមួយចំនួនទៀតលើកឡើងថាចង់អោយលោកទេពពិសិដ្ឋម្នាក់ទៀតដែលជាជ័យលាភី The Voice Kids Cambodia រដូវកាលទី២ ចូលរួមសម្តែងនឹងពួកគេផងដែរ ទើបនោះហើយម្ចាស់ពានក្មេងៗសង្ហាទាំងអស់មកគ្រប់ទឹកតែម្តង!