មហាជនកំពុងតែទន្ទឹងរង់ចាំមើលថាលោកលីមតិចម៉េងនឹងមានអ្វីថ្មីមកបង្ហាញទស្សនិកជនបន្ទាប់ពីទទួលបានជ័យជំនះនៅក្នុងការប្រកួតចំរៀងហើយនោះ លោកលីមតិចម៉េងក៏មិនបានធ្វើអោយខកបំណងជាមួយការត្រលប់មកបំរើទស្សនិកជនរបស់លោកតាមរយៈបទចំរៀងដំបូងបំផុតរបស់លោកមួយបទមានចំណងជើងថា«អរគុណហ្វេន»។ ផលិតកម្មរស្មីហង្សមាសបានធ្វើ Pre-release បទចំរៀងមួយនេះនៅក្នុងថ្ងៃទី១៨ ខែកញ្ញាកន្លងទៅនេះ ជាមួយនឹងការបញ្ចេញសកម្មភាពថតMVបទចំរៀងមួយនេះនៅក្នុងថ្ងៃតែមួយ ដែលបានបង្ហាញសកម្មភាពសម្តែងរាំ «ប៉ាក់ពើងៗ» ក្នុងបទនេះរបស់លោកលីមតិចម៉េង ជាមួយនឹងលោកពូកុយ ពូក្រឹម និងពេជ្រថៃ ដោយមានភាពកំប្លុកកំប្លែង។ នៅលើឆាណែលយូធូបផ្លូវការរបស់ផលិតកម្មហង្សមាស ក៏ទទួលបានចំនួនអ្នកចូលទស្សនាបទនេះរហូតទៅដល់ 1.1 ក្នុងរយៈពេលត្រឹមតែ៣ថ្ងៃប៉ុណ្ណោះ និងទទួលបាន Trending ចំណាត់ថ្នាក់លេខ២នៅលើយូធូបប្រទេសកម្ពុជាផងដែរ។ សំរាប់MV Pre-Release នេះ ដែលជាAudioVersion បានចងក្រងឡើងនូវសកម្មភាពពីមុនៗរបស់លោកលីមតិចម៉េងក្នុងពេលចូលរួមប្រកួតនៅក្នុងកម្មវិធី CambodianIdol រដូវកាលទី៤នេះ ដែលធ្វើអោយទស្សនិកជនហាក់បានរំភើបជាមួយលោកសារជាថ្មី និងអបអរសាទរចំពោះសិល្បករថ្មីនៅលើវិថីសិល្បៈ។ ម្យ៉ាងទៀតអ្នកគាំទ្រមួយចំនួនទៀតក៏មានការពេញចិត្តជាខ្លាំងចំពោះការថ្លែងអំណរគុណរបស់លោកមកកាន់អ្នកគាំទ្រតាមរយៈបទចំរៀងមួយនេះ រួមទាំងពេញចិត្តនូវប៉ារ៉ូលចំរៀង និងចង្វាក់ភ្លេងមានភាពច្នៃប្រឌិតផងដែរ។ គួរបញ្ជាក់ផងដែរបទចំរៀងនេះត្រូវបាននិពន្ធបទភ្លេង និងទំនុកច្រៀងដោយលោកឈិត តេងរិទ្ធ អ្នកនិពន្ធរបស់ផលិតកម្មហង្សមាស។ លោកឈិត តេងរិទ្ធបានប្រាប់អោយដឹងថាលោកចំណាយពេលធ្វើត្រឹមតែមួយសប្តាហ៍ប៉ុណ្ណោះ ដោយប្រើពេល១ថ្ងៃនិពន្ធបទភ្លេង ហើយ១ថ្ងៃទៀតសរសេរទំនុកច្រៀង និងចំណាយពេលប៉ុន្មានថ្ងៃទៀតដើម្បីកែកន់វាអោយល្អប្រសើរ។ លោកក៏បានប្រាប់បន្តថាលោកនឹងមានគំរោងចេញបទជាច្រើនទៀតសំរាប់លោកលីមតិចម៉េង ដែលជាបទសេធៗ ចំនែកបទមួយនេះវាមានលក្ខណៈពិសេសបន្តិចដោយសារតែជារដូវកាលបុណ្យភ្ជុំបិណ្ឌទើបពួកលោកសំរេចចិត្តធ្វើចង្វាក់ភ្លេងបែបរាំសប្បាយៗនេះឡើង។
