កាលពីព្រឹកថ្ងៃទី១៤ ខែកញ្ញាថ្មីៗនេះ ក៏មានផ្ទុះហេតុការណ៍ភ្ញាក់ផ្អើលមួយកើតមានឡើងនៅក្នុងផ្សារថ្មី ដោយគេប្រទះឃើញកំលោះតូចលីមតិចម៉េង ម្ចាស់ជ័យលាភីនៃកម្មវិធី Cambodian Idol រដូវកាលទី៤កំពុងថតសម្តែងMVបទចម្រៀងថ្មី ដោយក្នុងនោះលោកបានដើរច្រៀងជាក្រុមព្យុះហយាត្រាជាមួយនឹងពូកុយ និងពូក្រឹម ព្រមទាំងកំលោះតូចពេជ្រថៃម្ចាស់ពានកម្មវិធី The Voice Kid Cambodia កាលពីឆ្នាំ២០១៧។ មិនតែប៉ុណ្ណោះក៏មានរំលេចនូវឧបករណ៍ភ្លេងខុសៗគ្នាក្នុងដៃមានគែន ម៉ូនីកា និងស្គរ។ 

ការសម្តែងរបស់ពួកគេទាំងបីនាក់ពិតជាទាក់ទាញមែនទែន​​​ ធ្វើអោយទស្សនិកជនជាច្រើនតាមមើលមិនដាក់ភ្នែករហូតធ្វើអោយអ្នកខ្លះទាញទូរសព្ទ័យកមកថតផ្តិតយករូបភាពផងដែរ។ គួរបញ្ជាក់ផងដែរកាលពីប៉ុន្មានថ្ងៃកន្លងទៅនេះ លោកលីមតិចម៉េងបានធ្វើការបង្ហោះប្រាប់សាធារណៈជនខ្លះៗរួចមកហើយអំពីដំណឹងនៃការជិតចេញបទចម្រៀងថ្មីរបស់លោកជាមួយនឹងគ្រូភ្លេងរបស់លោក លោក THO MEET កាលពីថ្ងៃទី០៩ ខែកញ្ញាមកម៉្លេះ។ ទើបមហាជនមានការសន្និដ្ឋានថា​​​នេះប្រហែលជាសកម្មភាពថតសម្តែងរបស់លោកនៅក្នុង MV បទចម្រៀងថ្មីនោះហើយ។ ពិតជាមិនគួរអោយជឿសោះ លោកលីមតិចម៉េង ទើបតែទទួលបានជ័យជំនះក្នុងកម្មវិធី Cambodian Idolថ្មីៗសោះក៏អាចចេញបទចម្រៀងដំបូងរបស់ខ្លួនបានយ៉ាងលឿនដូច្នេះនិងបានថែមទាំងសហការជាមួយកំពូលតារាកំប្លែងជើងចាស់របស់យើងដល់ទៅពីររូបរួមគ្នាថែមទៀត ។

គួរបញ្ជាក់ផងដែរលោកលីមតិចម៉េងទើបតែបញ្ចប់កម្មវិធីប្រកួតនេះភ្លាមក៏ទទួលបានការចូលរួមក្នុងកម្មវិធីជាច្រើនដូចជាកម្មវិធីរបស់ស្រាបៀគ្រុឌ Meet&Talk និងការប្រគុំតន្រ្តីជាច្រើននៅតាមផ្សារទំនើបនានាដែលធ្វើអោយមហាជនមានការចាប់អារម្មណ៍ខ្លាំងមែនទែន។ ចង់ដឹងថាបទចម្រៀងដំបូងរបស់លោកមានអត្ថន័យយ៉ាងណា សូមរង់ចាំទស្សនាទាំងអស់គ្នា។