ផែនការសម្ងាត់របស់រដ្ឋាភិបាលអាល្លឺម៉ង់ក្នុងការទប់ទល់ជាមួយនឹងការឈ្លានពានរបស់រុស្ស៊ីប្រឆាំងនឹងអង្គការណាតូត្រូវបានបែកធ្លាយឡើងដោយបង្ហាញថាក្រសួងការពារជាតិនៃប្រទេសនេះកំពុងត្រៀមខ្លួនសំរាប់គ្រប់រូបភាពនៃសង្គ្រាមដែលអាចផ្ទុះឡើងនៅក្នុងអឺរ៉ុបនាពេលខាងមុខ។ ទីក្រុងមូស្គូបានចំអកអត្ថបទមួយនៅក្នុងកាសែតអាល្លឺម៉ង់ដែលនិយាយថាទីក្រុងប៊ែរឡាំងកំពុងរៀបចំផែនការទប់ទល់នឹងជម្លោះប្រដាប់អាវុធដែលអាចកើតឡើងរវាងណាតូនិងរុស្ស៊ី។ ប្រព័ន្ធផ្សព្វផ្សាយរដ្ឋបានរាយការណ៍កាលពីយប់ថ្ងៃចន្ទថាកងឆ្មាំបដិវត្តន៍អ៊ីរ៉ង់បាននិយាយថាពួកគេបានវាយប្រហារទីស្នាក់ការចារកម្មរបស់អ៊ីស្រាអែលនៅក្នុងតំបន់ពាក់កណ្តាលស្វយ័ត Kurdistan របស់ប្រទេសអ៊ីរ៉ាក់។
-
អាល្លឺម៉ង់រៀបចំផែនការទប់ទល់នឹងការវាយលុករបស់រុស្ស៊ី?
យោងតាមសារព័ត៌មាន Euronews ចុះផ្សាយថ្ងៃទី16 ខែមករាបានអោយដឹងថា កាសែត Bild របស់អាល្លឺម៉ង់បានរាយការណ៍ថា ផែនការសម្ងាត់របស់រដ្ឋាភិបាលអាល្លឺម៉ង់ក្នុងការទប់ទល់ជាមួយនឹងការឈ្លានពានរបស់រុស្ស៊ីប្រឆាំងនឹងអង្គការណាតូត្រូវបានបែកធ្លាយឡើង ដោយបង្ហាញថាក្រសួងការពារជាតិនៃប្រទេសនេះកំពុងត្រៀមខ្លួនសំរាប់គ្រប់រូបភាពនៃសង្គ្រាមដែលអាចផ្ទុះឡើងនៅក្នុងអឺរ៉ុបនាពេលខាងមុខ។
រដ្ឋាភិបាលអាល្លឺម៉ង់មើលឃើញថានឹងមានការកើនឡើងនៃកងទ័ពរុស្ស៊ីនៅក្នុងប្រទេសបេឡារុស្ស និងតំបន់ Kaliningrad ដែលជាទឹកដីខាងលិចបំផុតរបស់រុស្ស៊ី ដើម្បីដាក់សម្ពាធលើព្រំដែនប៉ូឡូញ។
ជាការឆ្លើយតបទៅនឹងការគំរាមកំហែងកើនឡើងនេះ ផែនការរបស់អាល្លឺម៉ង់នេះព្យាករណ៍ថា NATO នឹងដាក់ពង្រាយកងទ័ពរបស់ខ្លួនទៅកាន់អឺរ៉ុបខាងកើត បង្កអោយមានភាពតានតឹងនៅក្នុងតំបន់។
បន្ទាប់មកអាល្លឺម៉ង់បានលើកសេណារីយ៉ូជាច្រើនដែលអាចកើតឡើងនៅក្នុងពេលបន្ទាប់ថា វិមានក្រឹមឡាំងអាចនឹងកេណ្ឌទ័ពថ្មីៗចំនួន២០០ ០០០នាក់វាយលុកអ៊ុយក្រែនដើម្បីអោយខ្លួនអាចរីកចំរើនឈានទៅមុខរហូតដល់ខែមិថុនា។ នៅខែកក្កដា រុស្ស៊ីអាចនឹងចាប់ផ្តើមយុទ្ធនាការនៃសង្គ្រាមប្រឆាំងនឹងរដ្ឋបាល់ទិក។ ការវាយប្រហារតាមអ៊ីនធឺណិតទាំងនេះនៅក្នុងប្រទេសអេស្តូនី លីទុយអានី និងឡាតវី នឹងអាចអោយរុស្សីបានលេសថាប្រជាជនរុស្ស៊ីភាគតិចដែលរស់នៅក្នុងប្រទេសទាំងនេះកំពុងរងការវាយប្រហារលើ ហើយបន្ទាប់មកអោយនឹងចល័តកងទ័ពរុស្ស៊ីទៅកាន់ប្រទេសបេឡារុស្ស៊ី និងភាគខាងលិចប្រទេសរុស្ស៊ីនៅខែកញ្ញា។
-
រុស្ស៊ីឆ្លើយតបនឹងរបាយការណ៍អំពីសង្គ្រាមជាមួយណាតូ
យោងតាមសារព័ត៌មាន Newsweek ចុះផ្សាយថ្ងៃទី១៥ ខែមករាបានអោយដឹងថា ទីក្រុងមូស្គូបានចំអកអត្ថបទមួយនៅក្នុងកាសែតអាល្លឺម៉ង់ដែលនិយាយថាទីក្រុងប៊ែរឡាំងកំពុងរៀបចំផែនការទប់ទល់នឹងជម្លោះប្រដាប់អាវុធដែលអាចកើតឡើងរវាងណាតូនិងរុស្ស៊ី។
អ្នកនាំពាក្យកិច្ចការបរទេសរុស្ស៊ីអ្នកស្រី Maria Zakharova បានច្រានចោលការទស្សន៍ទាយពីសង្គ្រាមរបស់ទីក្រុងប៊ែរឡាំង ដោយថានេះត្រឹមជាអ្វីដែលអាចរកឃើញក្នុង"ហោរាសាស្ត្រ" ប៉ុណ្ណោះ។
អ្នកស្រី Zakharova បានចំអកសេណារីយ៉ូដែលបានរាយការណ៍ឡើងនោះនៅក្នុងការបង្ហោះលើTelegram។អ្នកស្រីបាននិយាយថា "ខ្ញុំបានអាន'ផែនការសម្ងាត់' របស់អាឡឺម៉ង់ដែលបានបែកធ្លាយនៅក្នុងសារព័ត៌មានBildនោះហើយ។ វាដូចត្រឹមជាហោរាសាស្ត្រពីឆ្នាំមុនរបស់តារានិករ Pisces នៅក្នុងតារានិករ Cancer យ៉ាងដូច្នោះឯង" ។
អ្នកស្រីបន្តថា “ខ្ញុំរំពឹងថាការវិភាគនេះត្រូវបានធ្វើឡើងដោយក្រសួងការបរទេសអាល្លឺម៉ង់ដែលដឹកនាំដោយអ្នកស្រី Annalena Baerb ទៅចុះ។
-
អ៊ីរ៉ង់អះអាងវាយប្រហារលើទីស្នាក់ការចារកម្ម Mossad នៅអ៊ីរ៉ាក់
យោងតាមសារព័ត៌មាន Reuters ចុះផ្សាយថ្ងៃទី១៦ ខែមករាបានអោយដឹងថា ប្រព័ន្ធផ្សព្វផ្សាយរដ្ឋបានរាយការណ៍កាលពីយប់ថ្ងៃចន្ទថា កងឆ្មាំបដិវត្តន៍អ៊ីរ៉ង់បាននិយាយថា ពួកគេបានវាយប្រហារទីស្នាក់ការចារកម្មរបស់អ៊ីស្រាអែលនៅក្នុងតំបន់ពាក់កណ្តាលស្វយ័ត Kurdistan របស់ប្រទេសអ៊ីរ៉ាក់។ ខណៈដែលកងកម្លាំងវរជនបាននិយាយថាពួកគេក៏បានវាយប្រហារនៅក្នុងប្រទេសស៊ីរីប្រឆាំងនឹងក្រុមរដ្ឋអ៊ីស្លាមផងដែរ។
ការវាយប្រហារនេះកើតឡើងនៅខណៈពេលមានការព្រួយបារម្ភអំពីការកើនឡើងនៃជម្លោះរីករាលដាលពាសពេញមជ្ឈិមបូព៌ា ចាប់តាំងពីសង្គ្រាមរវាងអ៊ីស្រាអែល និងក្រុមអ៊ីស្លាមប៉ាឡេស្ទីន Hamas បានចាប់ផ្តើមកាលពីថ្ងៃទី 7 ខែតុលា ដោយសម្ព័ន្ធមិត្តរបស់អ៊ីរ៉ង់ក៏បានចូលរួមនៅក្នុងជម្លោះនេះដែរពីប្រទេសលីបង់ ស៊ីរី អ៊ីរ៉ាក់ និងយេម៉ែន។
