ការផ្ទុះដ៏ធំមួយនៅភាគអាគ្នេយ៍នៃទីក្រុងម៉ូស្កូត្រូវបានសង្ស័យថាអាចបណ្តាលមកពីដ្រូនរបស់អ៊ុយក្រែនដែលមានបំណងវាយប្រហារមកលើរោងចក្រផលិតមីស៊ីលល្បឿនលឿនជាងសំឡេងរបស់រុស្ស៊ី។
"ការបំផ្ទុះពីលើអាកាស" នៅទីក្រុង Kolomna ប្រសិនបើត្រូវបានបញ្ជាក់ នឹងបណ្តាលអោយមានការផ្សាយដំណឹងពីបរាជ័យក្នុងការការពាររបស់លោក Vladimir Putin ។
យោងតាមប្រភពអនុវត្តច្បាប់នៅក្នុងទីក្រុងដែលមានចម្ងាយត្រឹមតែ 70 ម៉ាយពីទីក្រុងមូស្គូបាននិយាយថា"បន្ទុះនេះបានកើតឡើងនៅលើអាកាសជាមួយនឹងកម្រិតកម្ពស់នៃប្រូបាប៊ីលីតេ វាគឺជាដ្រូន" ។
“ទោះជាយ៉ាងនេះក្តី មិនអាចប្រាកដបានទេព្រោះមិនទាន់រកឃើញបំណែកណាមួយនៅឡើយ”។
Kolomna គឺជាទីកន្លែងប្រភពនៃការិយាល័យរចនាវិស្វកម្មមេកានិករបស់រុស្ស៊ី ដែលជារោងចក្រការពារដែលបានអភិវឌ្ឍទាំងមីស៊ីលល្បឿនលឿន Kinshal និងមីស៊ីលយុទ្ធសាស្ត្រប្រតិបត្តិការ Iskander-M ដូចដែលបានសង្កត់ធ្ងន់ដោយប្រព័ន្ធផ្សព្វផ្សាយអ៊ុយក្រែនក្នុងការរាយការណ៍អំពីហេតុការណ៍នេះ។
ប្រភេទកាំជ្រួចមីស៊ីលទាំងពីរនេះត្រូវបានដាក់ពង្រាយជាមួយនឹងឥទ្ធិពលដ៏សាហាវនៅអ៊ុយក្រែនដោយកងកម្លាំងរបស់លោកពូទីន។
រោងចក្រនេះក៏ផលិតប្រព័ន្ធការពារប្រឆាំងយន្តហោះ និងកាំជ្រួចប្រឆាំងរថក្រោះផងដែរ។
ទាហានឆ័ត្រយោងរុស្ស៊ីក៏ឈរជើងនៅទីនោះដែរ។
តំបន់នេះត្រូវបានគេកំណត់គោលដៅជាក់ស្តែងកាលពីដើមសប្តាហ៍នេះនៅពេលដែលកំទេចកំទីនៃ"ដ្រូនមិនធ្លាប់ស្គាល់មួយផ្ទុកដោយសារធាតុផ្ទុះ" ត្រូវបានរកឃើញនៅក្នុងវាលព្រិលនៅជិតភូមិ Gubastovo ចម្ងាយប្រហែល 60 ម៉ាយពីទីក្រុងម៉ូស្គូ និង 7 ម៉ាយពី Kolomna ។
នៅក្នុងហេតុការណ៍ចុងក្រោយនេះ សាក្សីបាននិយាយថាមាន "សំឡេងដ៏ខ្លាំង" ត្រូវបានឮមុនពេលមានបន្ទុះនេះ ដែលបន្ទាប់មកក៏មានផ្សែង និងពន្លឺជះមក។
សាក្សីម្នាក់បាននិយាយថា៖ «សំឡេងហួចមួយត្រូវបានឮមុនរយៈពេលប្រហែល ១០ នាទី បន្ទាប់មកក៏មានបន្ទុះ…»។
មាន "ផ្សែង" ហើយបន្ទាប់មកមាន "ពន្លឺ" ។
អ្នកនាំពាក្យអនុវត្តច្បាប់បាននិយាយថា៖ «មន្ត្រីអនុវត្តច្បាប់ បុគ្គលិករបស់ក្រសួងសង្គ្រោះបន្ទាន់ត្រូវបានបញ្ជូនទៅកន្លែងដើម្បីពិនិត្យមើលរបាយការណ៍ទាំងនេះ»។
ការស្វែងរកបំណែកកំពុងដំណើរការ។
បន្ទាប់ពីមានការទម្លាក់ដ្រូនកាលពីថ្ងៃអង្គារ អ្នកផ្សព្វផ្សាយចលនារបស់លោក ពូទីន លោកAnton Krasovsky ដែលខឹងសម្បារបានផ្ទុះឡើងនៅក្នុងទូរទស្សន៍រដ្ឋមួយអំពីភាពបរាជ័យនៃការបញ្ឈប់ដ្រូនដែលចូលមកវាយប្រហារទាំងនេះ ដែលវាបង្ហាញថារុស្ស៊ីកំពុងតែ "ចាញ់" សង្រ្គាមនេះហើយ។