តារាសម្តែងជនជាតិបារាំង Gaspard Ulliel ដែលគ្រោងនឹងបង្ហាញមុខក្នុងរឿងភាគ Marvel នាពេលខាងមុខនេះ “Moon Knight” បានទទួលមរណភាពនៅអាយុ ៣៧ ឆ្នាំ។ គ្រួសាររបស់គាត់បានប្រាប់ទីភ្នាក់ងារសារព័ត៌មាន AFP ថាគាត់បានស្លាប់កាលពីថ្ងៃពុធ បន្ទាប់ពីមានឧប្បត្តិហេតុជិះស្គីនៅលើភ្នំ Alps។
Ulliel ដែលជាតារាសម្តែងល្បីឈ្មោះម្នាក់របស់ប្រទេសបារាំងបានបង្ហាញខ្លួននៅក្នុងរឿង It's Only the End of the World និង Saint Laurent។

តារាសម្តែងរូបនេះកំពុងជិះស្គីនៅតំបន់ Savoie កាលពីថ្ងៃអង្គារ នៅពេលដែលគាត់បានបុកជាមួយមនុស្សម្នាក់ទៀត។ គាត់បានរងរបួសខួរក្បាលយ៉ាងធ្ងន់ធ្ងរ ហើយត្រូវបានគេបញ្ជូនតាមយន្តហោះទៅកាន់មន្ទីរពេទ្យក្នុងទីក្រុង Grenoble ជាកន្លែងដែលគាត់បានស្លាប់នៅថ្ងៃបន្ទាប់។ អ្នកជិះស្គីម្នាក់ទៀតមិនត្រូវបានបញ្ជូនទៅមន្ទីរពេទ្យទេ ហើយការស៊ើបអង្កេតកំពុងដំណើរការ។ ដំណឹងនៃការស្លាប់របស់គាត់បានកើតឡើងមួយថ្ងៃ បន្ទាប់ពីឈុតខ្លីៗសម្រាប់រឿង Moon Knight ដែលគាត់សម្តែងជា Midnight Man ត្រូវបានចេញផ្សាយតាមអ៊ីនធឺណិត។

អត្ថបទដកស្រង់ពី BBC
បកប្រែនិងកែសម្រួលដោយ Mr. Blue