នៅពេលធំឡើង អ្នកប្រហែលជាបានឃើញអត្ថប្រយោជន៍សុខភាពរបស់ទឹកដោះគោដែលត្រូវបានផ្សព្វផ្សាយគ្រប់ទីកន្លែងពីផ្ទាំងរូបភាព និងការផ្សាយពាណិជ្ជកម្មដ៏ល្បីៗផ្សេងៗ។ ទឹកដោះគោមានផ្ទុកទៅដោយជាតិកាល់ស្យូម វីតាមីន A វីតាមីន B12 ផូស្វ័រ ប៉ូតាស្យូម និងស័ង្កសី ក្នុងចំណោមសារធាតុចិញ្ចឹមផ្សេងទៀត (តាមរយៈ WebMD)។

មិនត្រឹមតែប៉ុណ្ណឹងទេ ទឹកដោះគោអាចផ្តល់អត្ថប្រយោជន៍យ៉ាងសម្បើមដល់សុខភាព នៅពេលវាលូតលាស់។ យោងតាមគេហទំព័រ WebMD ទឹកដោះគោគឺជាប្រភពប្រូតេអ៊ីនដ៏អស្ចារ្យ ដែលអាចជំនួយដល់ការផលិត និងជួសជុលកោសិកា។ បន្ថែមពីលើនេះ កាល់ស្យូមនៅក្នុងទឹកដោះគោអាចជួយពង្រឹងសុខភាពឆ្អឹង ដែលមានសារៈសំខាន់សម្រាប់ការលូតលាស់ធ្មេញរបស់កុមារ។ ដូច្នេះ​ប្រសិនបើ​ទឹកដោះគោ​មាន​រសជាតិ​ឆ្ងាញ់ និង​មាន​ជីវជាតិ អ្នក​ប្រហែលជា​គិតថា​ បើអ្នកផឹកវា​ច្រើនប៉ុណ្ណាក៏គ្មានបញ្ហា​នោះទេ​។ បើអ្នកគិតបែបនេះ អ្នកច្បាស់ជាត្រូវគិតម្តងទៀតហើយ។ ដោយសារតែមានប្រូតេអ៊ីន (និងអរម៉ូន) ច្រើននៅក្នុងទឹកដោះគោ, ការទទួលទានវាលើសអាចបណ្តាលឱ្យមានការរំខានដល់ការរំលាយអាហាររបស់រាងកាយទាំងមូល (យោងតាមរយៈ LiveStrong) ។

កុំផឹកទឹកដោះគោច្រើនកែវក្នុងមួយថ្ងៃ ការផឹកទឹកដោះគោច្រើនពេក អាចនាំអោយមានការរលាក ដែលអាចលេចឡើងជាទម្រង់នៃមុន, បញ្ហាផ្លូវដង្ហើម និងប្រតិកម្មអាលែហ្សី (តាមរយៈ LiveStrong)។ លើសពីនេះ អ្នកដែលមានបញ្ហាចំពោះជាតិស្ករ lactose ច្រើនតែជួបប្រទះនូវភាពមិនស្រួលក្នុងការរំលាយអាហារ ដូចជារាគ ឬហើមពោះនៅពេលផឹកទឹកដោះគោ (តាមរយៈ Eat This, Not That!)។ ក្នុងចំណោមផលរំខានធ្ងន់ធ្ងរនៃការផឹកទឹកដោះគោច្រើនពេកគឺ ការបាក់ឆ្អឹង។ ការសិក្សាឆ្នាំ 1997 ដែលត្រូវបានចេញផ្សាយនៅក្នុងទស្សនាវដ្តីសុខភាពសាធារណៈអាមេរិក បានពិនិត្យលើស្ត្រីជាង 77,000 នាក់ ដែលមានអាយុចន្លោះពី 34 ទៅ 59 ឆ្នាំក្នុងរយៈពេល 12 ឆ្នាំ។ វាត្រូវបានគេរកឃើញថា អ្នកចូលរួមដែលទទួលទានទឹកដោះគោពីរកែវ ឬច្រើនកែវជារៀងរាល់ថ្ងៃ មានហានិភ័យកើនឡើងនៃការបាក់ឆ្អឹងត្រគាក និងកំភួនដៃ ច្រើនជាងអ្នកដែលទទួលទានទឹកដោះគោត្រឹមតែមួយកែវ ឬតិចជាងក្នុងមួយសប្តាហ៍។ លើសពីនេះ ការសិក្សាឆ្នាំ 2014 ដែលត្រូវបានចេញផ្សាយនៅក្នុងទស្សនាវដ្តីវេជ្ជសាស្ត្រអង់គ្លេសបានរកឃើញថា មានការកើនឡើងហានិភ័យនៃការស្លាប់ក្នុងចំណោមបុរស និងស្ត្រីដែលផឹកទឹកដោះគោបីកែវ ឬច្រើនជាងនេះជារៀងរាល់ថ្ងៃ។

ដូច្នេះតើគួរផឹកទឹកដោះគោប៉ុណ្ណាទើបទទួលបានអត្ថប្រយោជន៍ល្អ និងជៀសផុតពីហានិភ័យផ្សេងៗ? ខណៈពេលដែលទឹកដោះគោបីកែវ គឺជាការណែនាំរបបអាហារប្រចាំថ្ងៃសម្រាប់មនុស្សពេញវ័យដោយក្រសួងកសិកម្មសហរដ្ឋអាមេរិក (តាមរយៈសុខភាពឆ្អឹងរបស់អាមេរិក), ប៉ុន្តែអ្នកស្រាវជ្រាវ និងអ្នកជំនាញខាងចំណីអាហារ Gail Cresci បានប្រាប់ Cleveland Clinic ថា ការផឹកតិច គឺទទួលបានលទ្ធផលច្រើន។ "ប្រសិនបើអ្នកចង់ផឹកទឹកដោះគោឱ្យឆ្អឹងរឹងមាំ ខ្ញុំណែនាំមិនឱ្យលើសពីមួយកែវក្នុងមួយថ្ងៃ។ ធ្វើបែបនេះបន្ថែមលើរបបអាហារចម្រុះដែលសម្បូរជាតិកាល់ស្យូម"៕