កាលពីថ្ងៃទី២៤ ខែមេសាកន្លងទៅនេះ លោក MEEZY24K រួមនឹងលោក HASHA នៃក្រុម La Cima Cartel បានធ្វើការទំលាក់ MV បទចម្រៀង«អូនសីតា» នៅលើឆាណែលយូធូបផ្លូវការរបស់ក្រុម La Cima Cartel ផ្ទាល់។ គួររំលឹកផងដែរថាកាលពីពេលមុនចេញផ្សាយបទចម្រៀងនេះបន្តិច លោក MEEZY24K ក៏បានធ្វើការចែករំលែកវិដេអូរបស់លោកច្រៀងលេងបទ«អូនសីតា» នេះផ្ទាល់ផងដែរនៅលើ Instagram Story ដោយបានកែទំនុកច្រៀងយ៉ាងច្រលើមតែម្តងទៅជា«អូឡាឡាឡា! ពួកបង La Cima មួយណាធ្វើបាបចិត្តអូន មុខស្រពោនបែបហ្នឹងជីវ៉ា» ដែលនេះគឺជាតំរុយដំបូងនៃការជិតចេញផ្សាយ MV របស់លោក។ យ៉ាងណាមិញផងដែរ បទ«អូនសីតា» នេះគឺជា MV ទី៤ហើយដែលត្រូវបានចេញផ្សាយក្នុងចំណោមទាំង៧បទនៃអាល់ប៊ុម " Cartel Meeting Vol.3 " បន្ទាប់ពីបទ«ធ្មេញមាស» «10» និង«ស្រាមួយកែវ»។ សង្កេតឃើញថានៅក្នុងសប្តាហ៍នេះ បទរបស់ក្រុម La Cima Cartel ចំនួន៣បទកំពុងជាប់នៅក្នុងតារាង Trending Youtube កម្ពុជា ដែលក្នុងនោះមានបទ«កំរ» បទ«មួយខ្សឺត» និងបទ«10» នៃអាល់ប៊ុមថ្មីនេះ។ ដោយគួរអោយចាប់អារម្មណ៍ផងដែរថា នៅក្នុងនោះបទ«មួយខ្សឺត» និងបទ«ធ្មេញមាស» គឺជាបទចូលរួមច្រៀងដោយសមាជិកក្រុម La Cima Cartel ច្រើនជាងគេបង្អស់ និងទទួលបានប្រជាប្រិយភាពជាងគេ។ តើទស្សនិកជនយល់ឃើញយ៉ាងណាដែរចំពោះបទចម្រៀងនៅក្នុងអាល់ប៊ុម ​​​Cartel Meeting Vol.3 នេះ?