កាលពីថ្ងៃទី០៣ ខែមករាកន្លងទៅនេះ លោកគ្រូភ្លេងនៃក្រុមបេក្ខជនប្រឡង The Rapper រហ័សនាមថារិទ្ធ ប្រុសពៅ បានធ្វើការបង្ហោះឡើងនូវវិដេអូកម្សាន្តមួយទាក់ទងនឹងកូនសិស្សរបស់លោក Long Bunn ដែលជាអតីតបេក្ខជន The Rapper មួយរូបដែរនៅលើបណ្តាញសង្គមហ្វេសប៊ុក។

ភាពស្និទ្ធស្នាលរបស់លោកគ្រូរិទ្ធ ប្រុសពៅ ដែលមានឈ្មោះពិតហៅថាខាត់​​​ ដារ៉ារិទ្ធិ និងកូនសិស្សឯទៀតរបស់លោក សង្កេតឃើញថាត្រូវបានបង្ហាញឡើងជាញឹកញាប់ ដោយមិនត្រឹមតែជាមួយលោក Long Bunn ប៉ុណ្ណោះទេ តែក៏នៅមានដូចជាលោក  Angelo លោក Bo Bo និងលោក Buubee ជាដើម ដែលសុទ្ធសឹងជាបេក្ខជន The Rapper ទាំងអស់។ 

មិនតែប៉ុណ្ណោះលោកក៏នៅបង្ហាញរូបថតស្និទ្ធស្នាលជាមួយនឹងកូនសិស្សផ្សេងៗទៀតរបស់លោកជាច្រើននាក់ផងដែរ រហូតដល់ពួកគេលលេងនឹងគ្នាថា«ទាំងនេះគឺសុទ្ធសឹងតែជាកូនៗរបស់លោកហើយ»។ ទាក់ទងនឹងកូនសិស្សសំណព្វរបស់លោក លោក Long Bunn វិញ លោករិទ្ធ ប្រុសពៅបានបង្ហាញឡើងជាមួយនឹងវិដេអូមួយប្រាប់ពីសកម្មភាពដំណើរដើមទងរបស់ពួកគេក្នុងការសម្រេចចិត្តឈូសសក់ចោលតាមពាក្យសន្យា បន្ទាប់ពីពួកគេបានសន្យាថានឹងកោរសក់ប្រសិនបើបទ«Childhood» របស់លោក Long Bunn ទទួលបាន១លានទស្សនា។ 

លោកគ្រូរិទ្ធិ ប្រុសពៅបានភ្ជាប់ជាមួយនឹងខេបសិនថា«តាមការសន្យា បទ Childhood 1លាន View ពួកយើងនឹងធ្វើការឈូសសក់ លាមាត់ហេងៗ ឆ្នាំ២០២៤»។ តាមរយៈវិដេអូនោះ ក៏សង្កេតឃើញថាមានកូនសិស្សផ្សេងៗទៀតរបស់លោកបានចូលរួមកោរសក់ជាមួយពួកគេផងដែរ។ និងបន្ទាប់មក ក្រោយពីបានឈូសសក់រួចរាល់​​​ ពួកគេទាំងអស់គ្នាក៏បានថតរូបជុំគ្នាមួយប៉ុស្តិ៍ ដោយភ្ជាប់ជាមួយនឹងខេបសិនរបៀបលលេងថា«ឆ្នាំថ្មី កោរសក់ចូល Gang 2024»។ ចំណែកលោក Long Bunn វិញក៏បានបង្ហោះរូបភាពរបស់លោកភ្ជាប់ជាមួយខេបសិនឡើងថា«New Year New ក្បាល»។ គួរបញ្ជាក់ផងដែរថា បទ«Childhood» របស់លោក Long Bunn មកទល់ពេលនេះទទួលបាន១.៨លានទស្សនាហើយ។