កាលពីថ្ងៃទី១២ ខែសីហាកន្លងទៅនេះ បេក្ខភាព The Rapper ទាំងពីររូប ហើយក៏ជាអ្នកបោះមេចម្រៀង Disstrack កាលពីពេលថ្មីៗនេះ លោក LONG BUNN និងលោក VANNO បានបែរមកចាប់ដៃគ្នាសហការទំលាក់បទមនោសញ្ចេតនាថ្មីមួយវិញដែលមានចំណងជើងថា«លោកយាយ»។ ដោយដំបូងឡើយ លោក LONG BUNN បានធ្វើការលាក់ឈ្មោះបទចម្រៀងនេះសិន និងទាញចំណាប់អារម្មណ៍ទស្សនិកជនជាមួយនឹងការដាក់ច្រៀង Featuring ជាមួយលោក VANNO ប៉ុណ្ណោះ ដែលធ្វើអោយទស្សនិកជនជាច្រើនមានការចាប់អារម្មណ៍ជាខ្លាំង ថាពួកគេអាចនឹងចេញបទចម្រៀង Disstrack អ្វីម្យ៉ាងជាមួយនឹងគ្នា។ គួរបញ្ជាក់ផងដែរថា លោក VANNO និងលោក LONG BUNN គឺជាមិត្តដើររួមគ្នា និងសិក្សារៀនសូត្រនៅសាលាបង្ហាត់បង្រៀនរ៉េបតែមួយ ម្ល៉ោះហើយកាលពីសង្គ្រាម Disstrack ថ្មីៗនេះ មិនមែនជារឿងចម្លែកទេ ដែលអាចអោយគ្រប់គ្នាសន្និដ្ឋានថាអ្នកទាំងពីរស្ថិតនៅក្នុងខាងតែមួយ។

ប៉ុន្តែ បន្ទាប់ពីបានធ្វើការចេញផ្សាយបទថ្មីនេះរួចមក ទស្សនិកជនជាច្រើនក៏មានការភ្ញាក់ផ្អើលជាមួយនឹងចំណងជើងនៃបទចម្រៀងនេះវិញ។ យ៉ាងណាមិញ បើសង្កេតជាងនេះ បទចម្រៀងនេះក៏ត្រូវបានចេញផ្សាយឡើងនៅក្នុងថ្ងៃខួបកំណើតរបស់លោក LONG BUNN ផងដែរ ហើយលោកបានលើកឡើងថាមានកាដូសម្រាប់បណ្តាអ្នកគាំទ្ររបស់លោក ដូចនេះវាសក្តិសមមានហេតុផលហើយដែលលោកនឹងចេញបទចម្រៀងមួយនេះឡើង។ ខណៈក្រលេកមើលមកខាងលោក VANNO វិញផងដែរ ទន្ទឹមនឹងលោកបានជូនពរថ្ងៃកំណើតមិត្តរបស់លោកហើយ លោកក៏បានចែករំលែកស្តេធឺសទាក់ទងនឹងបទថ្មីរបស់លោក Juvie ដែលមានចំណងជើងថា«Lying» ផងដែរ ដោយបានសរសេរឡើងថា«មិនបាច់ឆ្ងល់ទេម៉េចបានខ្ញុំចេញបទ Unfair»។