CNA-Washington-

ក្បួនរថយន្តយោធារុស្សីដ៏វែងលាតសន្ធឹងប្រវែង៦៤គីឡូម៉ែត្រដែលចាប់រូភាពបានដោយផ្កាយរណបក្រុមហ៊ុនអាមេរិកកាលពីថ្ងៃច័ន្ទនៅផ្នែកខាងជើងទីក្រុង Kyiv នៃអ៊ុយក្រែនដែលបានវាយរុញច្រានត្រឡប់មកវិញនៃការវាយប្រហារ។ រូបភាពផ្កាយរណបដែលផ្តល់ឲ្យដោយក្រុមហ៊ុន Maxar ជាក្រុមហ៊ុនរបស់អាមេរិក បានបង្ហាញនូវរូបភាពក្បួនរថយន្ត ដែលបានប្រមូលផ្តុំតាំងពីថ្ងៃអាទិត្យ ដែលបានរីកដូចផ្សិតមានប្រវែង ៦៤គីឡូម៉ែត្រនៃរថយន្តយោធា។ គេបាននិយាយទៀតថានេះជាក្បួនរថយន្តយោធាដ៏វែងចាប់តាំងពីមានការឈ្លានពានទៅលើអ៊ុយក្រែន។

MaXar បាននិយាយទៀតថា នៅតាមបណ្តោយផ្នែកខ្លះនៃដងផ្លូវ រថយន្តខ្លះបានឃ្លាតពីគ្នាក្នុងចម្ងាយល្មមខណៈដែលនៅផ្នែកខ្លះទៀតអង្គភាពនិងយុទ្ធោបករណ៍បានធ្វើដំណើរទន្ទឹមគ្នា២ឬ៣រថយន្តនៅតាមដងផ្លូវ។ ផ្ទះជាច្រើនខ្នងនិងអគារត្រូវបានឃើញឆេះនៅផ្នែកខាងជើងនិងពាយ័ព្យនៃ Ivankiv នៅក្បែរផ្លូវដែលរថយន្តកំពុងធ្វើដំណើរ ក្រុមហ៊ុននេះបានបន្ថែម ។ Maxar បាននិយាយថាផ្កាយរណបរបស់ខ្លួនបានចាប់យករូបភាព នៃការដាក់ពង្រាយកងទ័ពជើងគោកបន្ថែមនិងអង្គភាពឧទ្ធម្ភាគចក្រវាយលុកនៅប៉ែកខាងត្បូងបែលឡារុស ដែលមានចម្ងាយតិចជាង៣២គ.មខាងជើងព្រំប្រទល់ជាមួយអ៊ុយក្រែន។

ចាប់តាំងពីចាប់ផ្តើមនៃការវាយលុករបស់រុស្សីនៅថ្ងៃព្រហស្បត៍ កងកម្លាំងអ៊ុយក្រែនបានការពារផ្លូវដែលឆ្ពោះទៅកាន់ទីក្រុង Kyiv ប្រឆាំងនឹងការវាយលុកដោយកងកម្លាំងរុស្សីដែលបានប្រមូលផ្តុំនៅជុំវិញទីក្រុង។ បើយោលទៅតាមប្រភព២ដែលសម្ភាសន៍ដោយ AFP កាលពីថ្ងៃច័ន្ទ អ្នកការទូតម្នាក់និងមន្ត្រីសន្តិសុខម្នាក់ទៀតបាននិយាយថា ក្រុងមូស្គូបានរៀបចំការវាយលុកសារជាថ្មីដែលមានទំហំធំ។ មន្ត្រីអគ្គសេនាធិការកងទ័ពអ៊ុយក្រែនម្នាក់បានបង្ហោះតាម Facebook ដោយនិយាយថា កងកម្លាំងរុស្សីបានប្រមូលផ្តុំទ័ពក្នុងរយះពេល២៤ម៉ោងមុននេះ ដោយផ្គុំជាមួយរថពាសដែកនិងកាំភ្លើងធំ ដើម្បីឡោមព័ទ្ធនិងវាយសម្រុកចូលកាន់កាប់ទីក្រុង Kyiv និងទីក្រុងធំៗដ៏ទៃទៀតក្នុងអ៊ុយក្រែន។

ទីក្រុងវ៉ាស៊ិនតោន បាននិយាយថាការប្រឹងប្រែងដ៏សំខាន់របស់រុស្សីនៅតែឆ្ពោះទៅមុខសំដៅទីក្រុង Kyiv ប៉ុន្តែត្រូវបានពន្យឺតនៅក្នុងថ្ងៃទី៥ នៃការឈ្លានពាននេះ។ កាលពីថ្ងៃច័ន្ទ នៅតាមផ្លូវដ៏សំខាន់ដែលឆ្ពោះទៅមុខសំដៅទីក្រុង Kyiv រុស្សីបានសម្រុកទៅមុខបាន៥គ.មហើយនៅសល់៣០គ.មទៀតពីទីក្រុង មន្រ្តីជាន់ខ្ពស់នៃក្រសួងការពារជាតិអាមេរិកបាននិយាយ។