តារាចម្រៀងរ៉េប វ័យ​​​២៥ឆ្នាំ ម្ចាស់បទហ៊ីបហប់ដ៏ប្លែក “Alexanderwang” ដែលចេញផ្សាយកាលពីដើមខែធ្នូកន្លងទៅនេះ លោក Kwan បានវិលត្រលប់ជាមួយនឹងចំណងដៃថ្មីបទចម្រៀងបែបមនោសញ្ចេតនាម្តងវិញហើយ។ កាលពីថ្ងៃទី៨​​​ ខែកុម្ភៈកន្លងទៅនេះ លោក Kwan បានធ្វើការទំលាក់នូវ Poster បទចម្រៀងថ្មីរបស់លោកដែលមានចំណងជើងថា “នឹក” នៅលើបណ្តាញសង្គមហ្វេសប៊ុកដោយកំណត់ជាមួយនឹងកាលបរិច្ឆេទចេញថានៅថ្ងៃទី១០​​​ ខែកុម្ភៈនៅមុនថ្ងៃបុណ្យនៃក្តីស្រលាញ់នេះហើយ។ យ៉ាងណាមិញសង្កេតឃើញថានេះគឺជាបទចម្រៀងទី៧ហើយសំរាប់នៃការចេញផ្សាយបទចំរៀងរបស់លោក។ នៅក្នុងបទចម្រៀងមុនៗរបស់លោក ដែលមានដូចជាបទ Love is Pain, I got a lot, Rockstar, Feelingdown ជាដើម លោកធ្លាប់បានសហការជាមួយនឹងសិល្បករដទៃទៀតរួចមកហើយដូចជាលោក Allergy និងលោក Scotty Blvck ជាដើម។ 

ចំណែកកាលពីពេលថ្មីៗនេះលោកក៏ទើបតែបានចែករំលែកឡើងវិញនូវបទចាស់របស់លោកមួយបទ«Love is Pain» ដែលជាការបកស្រាយរួមគ្នាជាមួយនឹងលោក Scotty Blvck នៅលើបណ្តាញសង្គមហ្វេសប៊ុកថ្មីៗនេះទៀតផង។ រីឯនៅក្នុងបទចម្រៀងថ្មីរបស់លោកមួយនេះវិញ លោកធ្លាប់បានចែករំលែកការបង្ហោះដែលទាក់ទងនឹងបទចំរៀងមួយនេះ និងទំនងជាគ្រោងចេញផ្សាយតាំងតែពីខែមុនមកម្ល៉េះ ប៉ុន្តែក៏ត្រូវប្តូរមកក្នុងខែថ្មីនេះវិញដោយបានចែករំលែករួបថតពីក្នុងបទចម្រៀងជាមួយនឹងមនុស្សស្រីម្នាក់ ព្រមទាំងបានបញ្ជាក់យ៉ាងច្បាស់នឹងចេញផ្សាយឆាប់ៗនេះ។ នៅក្នុងបទចម្រៀងថ្មីនេះ លោក Kwan បានលើកឡើងថាវាគឺជាអារម្មណ៍ដែលយើងកំពុងនឹកនរណាម្នាក់ដែលមិនបាននឹកយើងវិញ ដោយខានបានជួបគ្នាយូរមកហើយ បើពេលនេះគេមិនបាននឹកយើងក៏មិនថ្វីដែរ ព្រោះមនុស្សដែលនឹកយើង យើងក៏មិនបាននឹកវិញដូចគ្នា ដូច្នេះស្មើគ្នាហើយ។ តើទស្សនិកជនយល់ថាបទថ្មីរបស់លោក Kwan មួយនេះអាចជាបទមនោសញ្ចេតនាសុទ្ធ រឺក៏មានលាយឡំនឹងភ្លេងហ៊ីបហប់ដែររឺទេ?