កាលពីថ្ងៃទី៤ ខែមីនាកន្លងទៅនេះ ក្រុមចម្រៀងហ៊ីបហប់ជើងចាស់ក្មេងខ្មែរបានធ្វើការចេញផ្សាយ M/V ថ្មីនៅលើបទចម្រៀងចាស់របស់ខ្លួនមួយបទមានចំណងជើងថា“Can’t Stop” ពីក្នុងអាល់ប៊ុមក្មេងអ្នកឡែដែលបានចេញផ្សាយកាលពីជាងពីរឆ្នាំកន្លងមកនៅអំឡុងចុងឆ្នាំ២០២០។​​​ គួរបញ្ជាក់ផងដែរថាបទចម្រៀង«Can’t Stop» Audio Version នេះត្រូវបានចេញផ្សាយដំបូងនៅថ្ងៃទី១៨ ខែកញ្ញា ឆ្នាំ២០២០​​​កន្លងទៅ នៅលើយូធូបផ្លូវការរបស់ក្រុមចម្រៀងក្មេងខ្មែរផ្ទាល់ ដែលជាបទចម្រៀងទី១០ក្នុងចំណោមបទទាំង១០ពីក្នុងអាល់ប៊ុមក្មេងអ្នកឡែ។ 

គួររំលឹកផងដែរថា M/V បទចម្រៀង «Can’t Stop» នេះគឺជា M/V ទី៤ហើយដែលត្រូវបានចេញផ្សាយពីក្នុងអាល់ប៊ុមក្មេងអ្នកឡែ តាមពីក្រោយបទចម្រៀងទាំង៣ទៀតដែលមានតាមលំដាប់រួមមានបទចម្រៀងដំបូងបំផុតរបស់លោកពីក្នុងអាល់ប៊ុមក្មេងអ្នកឡែ«ចុងភៅ» ត្រូវបានចេញផ្សាយ M/V នៅថ្ងៃទី១៧ ខែកុម្ភៈ ឆ្នាំ២០២០កន្លងទៅ រីឯបទ«វិទ្យាល័យ»របស់លោកនៅថ្ងៃទី១ ខែសីហា ឆ្នាំ២០២០ និងបទ«ក្មេងខ្មែរ is me» នៅថ្ងៃទី៣ ខែមីនា ឆ្នាំ២០២១។ 

យ៉ាងណាមិញផងដែរបទ«Can’t Stop» មកទល់ពេលនេះកំពុងឈរនៅលំដាប់ Top Trending នៅលើតារាងយូធូបកម្ពុជាដោយគិតត្រឹមតែរយៈពេល១ថ្ងៃប៉ុណ្ណោះ និងត្រឹមតែជាបទធ្លាប់បានចេញផ្សាយរួចមកហើយតាមពីក្រោយបទចម្រៀងរបស់លោកកៅពន្លឺសមាជិកនៃក្រុមក្មេងខ្មែរផងដែរនូវបទ«ស្តេចពិត» ដែលឈរនៅលំដាប់លេខរៀងទី៤។ កត់សម្គាល់ឃើញផងដែរថាបទចម្រៀង«តួច្រណែន»របស់លោកហេងពិទូដែលត្រូវបានកញ្ញា Sophia Kao យកមក Cover ឡើងវិញក៏កំពុងតែទទួលបានចំណាប់អារម្មណ៍សាជាថ្មី និងឈរនៅលំដាប់ Trending ទី៩ផងដែរ។