ត្រឹមរំលងបាន២ថ្ងៃប៉ុណ្ណោះ លោកជីដេវីតក៏បានធ្វើបទចំរៀងតបតជាមួួយនឹងលោកវណ្ណដាវិញហើយនូវបទចំរៀង«ចុម!អាអូនអត់ដេក» និងទទួលបានការចូលទស្សនាជាច្រើនយ៉ាងរហ័ស និងធ្វើអោយលោកជីដេវីតកើនឡើងចំនួន Subscriber នៅក្នុងយូធូបរហូតដល់១លាននាក់ឯណោះ។ 

ថ្វីបើបទចម្រៀង Diss Track មួយបទនេះរបស់លោកជីដេវីតមានចង្វាក់ភ្លេងបែបសប្បាយៗ និងកំប្លែងៗ តែក៏បានធ្វើអោយមហាជនមានការចាប់អារម្មណ៍ជាច្រើន និងព្យាយាមផ្ទៀងត្រចៀកស្តាប់មិនអោយបាត់មួយពាក្យឡើយ។ ខុសពីការរំពឹងទុករបស់មនុស្សមួយចំនួនដែលយល់ឃើញថាលោកជីដេវីតនឹងផ្ចាញ់ផ្ចាល់មកវិញដោយរសជាតិហូវៗបែបឃោឃៅហើយ តែលោកជីដេវីតបែរជាឆ្លើយតបមកវិញតាមបែបការផ្តឺផ្តងញ៉ោះសប្បាយៗយ៉ាងត្រជាក់។ អ្នកខ្លះក៏មានការពេញចិត្តនូវអត្ថន័យ និងខ្លឹមសារនៃបទចំរៀងរបស់លោកជីដេវីតផងដែរថាមានបង្កប់នូវអត្ថន័យអប់រំល្អ និងមិនមានប្រើប្រាស់ពាក្យពេចន៍អសីលធម៌ឡើយ។ 

ចំណែកឯមនុស្សមួយចំនួនទៀតក៏សម្តែងការសោកស្តាយព្រោះគេចង់អោយបទចម្រៀងរបស់លោកកាន់តែកាចជាងនេះ។ យ៉ាងណាមិញថ្វីបើបទចម្រៀងរបស់លោកជីដេវីតនៅស្លូតបែបនេះយ៉ាងណាក្តី តែអត្ថន័យប៉ារ៉ូលបទចំរៀងរបស់លោកក៏មានបង្កប់នូវការផ្តីផ្តងមុតស្រួច និងឆ្លើយតបសំខាន់ៗគួរអោយកត់សម្គាល់ផងដែរ។ ជាក់ស្តែងនៅលើប៉ារ៉ូលមួយចំនួនដែលលោកលើកឡើងថា Top សហគមន៍ឆាកធំជាងផ្ទះ ឌឺដងបងដើរតួចិត្តល្អ បងរត់ទៅបួសគំនិតបងប្រពៃ លុបយូធូបក៏មិនឃើញកើតអី មកវិញនៅតែអ៊ែមដល់អាអូនចង់ភ័យ និងខឹងគោវ៉ៃរទេះជាដើម។